Read Mizo Lushai Numbers 25 Bible Online

Numbers 25 - Mizo Lushai bible

Numbers 25

¹Israel-te Sitim ruama an awm lai chuan Moab nulate an ngai a,

²chûng chuan an pathian biakna ruai ṭhehahte an sâwm a, an kîl ve a, milemte chibai an bûk ve ta mai a.

³Israel miten Peor-a Baal an be ve ta mai chu LALPA chuan a haw hle a.

⁴Mosia hnênah, “Israel hruaitu zawng zawng ko la, thu ka pêk che angin hêng mite hi chhûn êngah khai hlum rawh; tichuan, LALPA thinur na tak chu Israel-te hian an pumpelh dâwn nia,” a ti a.

⁵Mosian Israel hotute hnênah chuan, “In hote zînga Peor-a Baal be vete kha that vek rawh u,” a ti a.

⁶Inbiakna bûk kawngkaa pawiti taka an ṭah lai chuan Mosia leh Israel pungkhâwmho hmuhah, Israel mi pakhatin Moab nula a bûkah a rawn hruai lût a.

⁷Arona tupa Finehasa, Eleazara fapa chuan a hmu a, pungkhâwmho zîng aṭang chuan a chhuak a, fei a la a,

⁸Moab nula hruaitu, Israel tlangvâl chu, a bûkah a zui lût a, an pahnih chuan an dulah a chhun tlang a. Tichuan, Israel-te zîngah hri lêng chu a tâwp ta a.

⁹Hri vei avânga thi chu mi sînghnih leh sângli an tling hman a ni.

¹⁰ LALPA chuan Mosia hnênah,

¹¹“Eleazara fapa Finehasa chuan ka tân ṭhahnem a ngaih êm avângin kei pawh Israel mite laka ka thinur a dai ta a; chuvângin, ka tiboral vek ta lo a ni.

¹²Tichuan, a tân leh a thlahte tân inṭhianna thu ka thlung ta e;

¹³a thlahte nên ka puithiam an ni kumkhua ang a; ka tân ṭhahnem a ngai êm a, Israel-te an sual avânga thi tûr a chhanhim tâk avâng hian,” a ti a.

¹⁴Israel tlangvâl Moab nula avânga thi ta chu Simeona thlah zînga hotu Salua fapa Zimria a ni.

¹⁵Moab nula chu Midian hnam lal pakhat, Zura fanu, Kusii a ni.

¹⁶ LALPA chuan Mosia hnênah,

¹⁷“Midian-ho hi bei ula, tu tlâwm dêr rawh u;

¹⁸Peor-ah an bum che u a, hri lên laia an chhun hlum, an lal fanu Kusii hmangin in chungah thil ṭha lo tak an tih kha,” a ti a.