Read Mizo Lushai Numbers 27 Bible Online

Numbers 27 - Mizo Lushai bible

Numbers 27

¹Josefa thlah, Manasea chuan fapa Makira a nei a; chu mi fa chu Gileada a ni; Gileada chuan fapa Hefera a nei a, chu mi fa Zelofehada chuan fanu hêngte hi a nei: Malaii te, Novaii te, Hoglaii te, Milkaii te, Tirzaii te.

²Anni chu Inbiakna bûk kawngkaah Mosia te, puithiam Eleazara te, hruaitute leh pungkhâwmho hmaah an lo kal a.

³“Kan pa chu Kora ho, LALPA laka helte zîngah khân a tel ve lo va; mahse, thlalêrah a thi ta a, fapa a nei lo va, ama sual vânga thi a ni a.

⁴Fapa a neih loh avângin kan pa hming hi chhungkaw chhiarna zîngah a bo bîk tûr em ni? Kan pa chhûngte zîngah chanvo atân ram min pe ve rawh u,” an rawn ti a.

⁵Mosia chuan chu thu chu LALPA hnênah a thlen a.

⁶LALPAN Mosia hnênah,

⁷“Zelofehada fanute thu hi a dik e, an pa unaute zîngah chanvo tûr ram in pe ve tûr a ni; an pa chan ai chu chang rawh se.

⁸Israel-te chu hrilh rawh: Mi fapa nei lovin thi sela, a ram chu a fanuin a chang tûr a ni.

⁹Fanu a neih loh chuan a unauten an nei ang.

¹⁰Unau a neih loh chuan a pamiten an chang ang;

¹¹pami a neih loh chuan a laichîn chhûng hnaiin a chang ang a, a nei hlen ang. Mosia hnêna LALPA thupêk angin he dân hi Israel-te tân dân nghet a ni ang,” a ti a.

¹² LALPA chuan Mosia hnênah: “Abarim tlângah chho la, Israel mite ka pêk tûr ram chu thlîr rawh.

¹³I thlîr zawhah i u Arona ang khân i chipuite hnênah hruai i ni ve ang.

¹⁴Zin thlalêrah, ka thupêk ang chiaha in tih loh avâng leh ka chunga Israel pungkhâwmho Meriba hmuna an vui khân, in pahnihin, an hmuhah min chawimawi lo a nih kha. Meriba tui hi Zin thlalêr, Kades bula awm kha a ni,” a ti a.

¹⁵Mosia chuan LALPA hnênah,

¹⁶“Mi zawng zawng nunna petu LALPA chuan Israel pungkhâwmho hruaitu tûr mi ruat teh se.

¹⁷Ani chuan an hma hruaiin an hnung dâl ṭhîn sela, LALPA mi, Israel pungkhâwmho hi vêngtu nei lo berâm ang mai ni suh se,” a ti a.

¹⁸LALPA chuan Mosia hnênah, “Nuna fapa Josua, pa rilru nei tak chu hruai la, a lu-ah i kut nghat ang che.

¹⁹Puithiam Eleazara hnênah hruai la, a hmaah leh Israel pungkhâwmho hmaah, an hma ngeiah, i aiawhtuah ruat rawh.

²⁰I thuneihna chu hlân rawh; tichuan, Israel mi, pungkhâwmho chuan a thu an zâwm dâwn nia.

²¹Urim leh Thumim hmanga Pathian râwn hi puithiam Eleazara tih tûr a ni ang a; a thu ngaichângin Josua chuan Israel pungkhâwmho chu bûk khuar tûrin emaw, insawn tûrin emaw a hrilh ṭhîn ang,” a ti a.

²²LALPA thupêk ang chuan Mosia chuan a ti a, Josua chu puithiam Eleazara leh Israel pungkhâwmho hmaah a dintîr a.

²³LALPA thupêk ang chuan Josua lu-ah Mosia chuan a kut a nghat a, a aiawhtu atân a ruat ta a.