Read Mizo Lushai Numbers 28 Bible Online

Numbers 28 - Mizo Lushai bible

Numbers 28

¹ LALPA chuan Mosia hnênah;

²“Israel mite chu hrilh rawh: a hun ruat takah Pathian hnêna buhbâl thilhlante chu hlan ṭhin tûr a ni, a lâwmzâwng tak chu hlân ṭhîn rawh u.

³Buhbâl thilhlan, LALPA hnêna hlan ṭhin tûr chu hetiang hi a ni: Ni tin hâl ral atân berâmno a pa pahnih, kum khat vêla upa, hmêlhem lo hâlral thilhlan hlan tûr a ni.

⁴Berâm pakhat chu zîngah hlân ula, pakhat chu tlaiah.

⁵Pakhat rual chuan buhbâl thilhlanah chhangphut ṭha chi kg. khat, oliv hriak thlit fîm litar khat nêna pawlh hlan tel tûr a ni.

⁶Hei hi Sinai tlâng ata ni tina hâl ral vek tûra an buhbâl thilhlan ṭhin chu a ni; chu chu LALPA lâwmzâwng tak chu a ni.

⁷Berâm pakhat hlan rualin in tûr thilhlan uain litar khat maichâmah bun ṭhin tûr a ni.

⁸Tlaiah berâm pakhat pawh chu, zîng lama mi ang chiah khân hlan tûr a ni, in tûr thilhlan uain nên. Hei hi ei tûr thilhlan, LALPA lâwmzâwng tak chu a ni.

⁹“Sabat ni chuan berâmno a pa pahnih, kum khat vêla upa, hmêlhem lo te, buhbâl thilhlan, chhangphut ṭha chi kg. hnih, Oliv hriak nêna chawhpawlh te, uain thilhlante hlan tûr a ni.

¹⁰Sabat ni apiangin hâlral thilhlan pangngai bâkah he hâlral thilhlan hi uain nên hlan ṭhin tûr a ni.

¹¹“Thla thar ni apiangin LALPA hnêna hâlral thilhlanah hêngte hi han keng ṭhîn ang che u: bâwngtuai pahnih, berâmchal pakhat, berâmno a pa pasarih, kum khat vêla upa, hmêlhem lo vek.

¹²Buhbâl thilhlanah chhangphut ṭha chi oliv hriak nêna pawlh in rawn hlân bawk tûr a ni.

¹³Bâwngtuai pakhatah chhangphut kg. thum, berâmchal pakhatah kg. hnih; berâmno pakhatah kg. khat; hêng hâlral leh buhbâl thilhlante hi LALPA lâwmzâwng tak chu a ni.

¹⁴In tûr thilhlan chu bâwngtuai pakhatah uain litar hnih, berâmchal pakhatah litar khat telh zêl tûr a ni. Hei hi kum tluanin thla thar ni apianga hâlral thilhlana hlan ṭhin tûr chu a ni.

¹⁵Ni tina in tûr thilhlan uain nên hâlral thilhlan in hlan ṭhin bâkah sual thawina thilhlan atân LALPA hnênah kêlpa pakhat in hlân bawk tûr a ni.

¹⁶“LALPA chawimawi nân Kalhlên kût chu thla hmasa ber, ni sâwm leh pali niin hmang ṭhîn ang che u.

¹⁷Ni sâwm leh panga niin kûtpui chu ṭan a ni ang a, ni sarih chhûng chhang dawidim telh loh chauh ei tûr a ni.

¹⁸Ni hmasa berah chuan inkhâwmpui urhsûn in nei tûr a ni, in hna pangngai in thawk hauh tûr a ni lo.

¹⁹Ei tûr thilhlan atân bâwngtuai pahnih, berâmchal pakhat, berâmno a pa pasarih, kum khat vêla upa, hmêlhem lo vek in hlân tûr a ni.

²⁰Hêng rual hian buhbâl thilhlan bâwngtuai pakhatah kg. hnih,

²¹berâmno pakhat zêlah kg. khat hlan tel bawk tûr a ni.

²²Sual thawina thilhlanah kêlpa pakhat hlân ula, chutiangin in sual chu thian fai ṭhîn ang che u.

²³Hêng hi tûk tin thil hlan ṭhin bâka hlan tûr a ni.

²⁴Chutiangin ni sarih chhûng chu LALPA hnênah ei tûr thilhlan hi hlan ziah tûr a ni; chu chu LALPA lâwmzâwng tak chu a ni. Ni tin hâlral leh in tûr thilhlan ṭhin bâkah hêng hi hlan tûr a ni.

²⁵A ni sarih ni chuan inkhâwmpui urhsûn nei leh ula, mahni hna pangngai in thawk tûr a ni lo.

²⁶“In barli thar, buhbâl thilhlana LALPA hnêna in rawn hlan hun, Chawlhkâr Kûtah pawh inkhâwmpui urhsûn, in nei tûr a ni: in hna pangngai in thawk hauh tûr a ni lo.

²⁷Hâlral thilhlanah bâwngtuai pahnih, berâmchal pakhat, kum khat vêla upa berâmno a pa pasarih, hmêlhem lo vek, hlân ang che u; chu chu LALPA lâwmzâwng tak chu a ni.

²⁸Buhbâl thilhlanah chhangphut ṭha chi, oliv hriak pawlh, bâwngtuai pakhatah kg. thum, berâmchal pakhatah kg. khat leh a chanve,

²⁹berâmno pakhatah kg. khat hlan tel zêl tûr a ni.

³⁰Sual thawina thilhlanah kêlpa pakhat hlân bawk ang che u, chutiang chuan mipui sual in thian fai dâwn nia.

³¹Ni tina hâlral thilhlan bâkah hêng hi uain thilhlan nên in hlân ṭhîn tûr a ni.