Read Mizo Lushai Numbers 29 Bible Online

Numbers 29 - Mizo Lushai bible

Numbers 29

¹“Thla sarihna, ni khat ni chuan, inkhâwmpui urhsûn nei ang che u. In hna pangngai in thawk tûr a ni lo. Hemi ni hian tawtawrâwt in hâm ṭhîn tûr a ni.

²Hâlral thilhlanah bâwngtuai pakhat, berâmchal pakhat, berâm a pa pasarih, kum khat vêla upa, hmêlhem lo vek hlân ang che u.

³Buhbâl thilhlanah chhangphut ṭha chi oliv hriak nêna pawlh, bâwngtuai pakhatah kg. thum, berâmchal pakhatah kg. hnih,

⁴berâmno pakhatah kg. khat hlân tel bawk ang che u.

⁵In sual thawina tûr kêlpa, sual thawina thilhlanah hlân ang che u.

⁶Chûng chu thla thar hâlral leh buhbâl thilhlan ṭhin leh ni tina hâlral leh buhbâl thilhlan ṭhin leh a dân tûr anga in tûr uain hlan ṭhinte bâka hlan tûr a ni. Chûng chu meia thilhlan, LALPA tâna rimtui a ni.

⁷“Thla sarihna, ni sâwm ni chuan inkhâwmpui urhsûn in nei tûr a ni; chaw nghei ula, in hna pangngai thawk suh u.

⁸LALPA hnênah hâlral thilhlanah bâwngtuai pakhat, berâmchal pakhat, berâmno a pa pasarih, kum khat vêla upa, hmêlhem lo vek, hlân ang che u.

⁹Buhbâl thilhlanah chhangphut ṭha chi oliv hriak nêna pawlh, bâwngtuai pakhatah kg. thum, berâmchal pakhatah kg. hnih,

¹⁰berâmno pakhatah kg. khat hlân bawk ang che u.

¹¹In sual thawina tûr kêlpa, sual thawina thilhlanah in hlân bawk tûr a ni; mipui sual thenfaina tûr kêlpa hlan ṭhin bâkah leh ni tin hâlral thilhlan, buhbâl leh in tûr thilhlan ṭhin bâkah in hlân tûr a ni.

¹²“Thla sarihna, ni sâwm leh ni nga ni chuan inkhâwmpui urhsûn nei ṭhîn rawh u; in hna pangngai in thawk tûr a ni lo, ni sarih chhûng chu LALPA chawimawiin kût in hmang tûr a ni.

¹³A ni khat ni chuan hâlral thilhlanah bâwngtuai sâwm leh pathum, berâmchal pahnih, kum khat vêla upa berâmno a pa sâwm leh pali, hmêlhem lo vek, LALPA lâwmzâwng tak chu in hlân tûr a ni.

¹⁴Chûng rual chuan buhbâl thilhlanah chhangphut ṭha chi, Oliv hriak pawlh, bâwngtuai pakhatah kg. thum,

¹⁵berâmchal pakhatah kg. hnih, berâmno pakhatah kg. khat in hlân tel bawk tûr a ni.

¹⁶Sual thawina thilhlanah kêlpa pakhat pawh in hlân tûr a ni. Ni tina hâlral leh buhbâl thil hlan ṭhin, in tûr thil hlan nên tiam lovin in hlân tûr a ni.

¹⁷A ni hnih ni chuan hâlral thilhlanah bâwngtuai sâwm leh pahnih, berâmchal pahnih, berâmno a pa sâwm leh pali, kum khat vêla upa, hmêlhem lo vek, LALPA hnênah in hlân tûr a ni.

¹⁸Bâwng tuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni.

¹⁹Ni tina hâlral leh buhbâl thilhlan leh in tûr thilhlan bâkah sual thawina thilhlanah kêlpa in hlân bawk tûr a ni.

²⁰“A ni thum ni chuan hâlral thilhlanah bâwngtuai sâwm leh pakhat, berâmchal pahnih, berâmno a pa sâwm leh pali, kum khat vêla upa, hmêlhem lo vek, LALPA hnênah in hlân tûr a ni.

²¹Bâwngtuai te, berâmchal te, leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni.

²²Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni.

²³“A ni li ni chuan hâlral thilhlanah bâwngtuai sâwm, berâmchal pahnih, berâmno a pa sâwm leh pali, kum khat vêla upa, hmêlhem lo vek, LALPA hnênah in hlân tûr a ni.

²⁴Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni.

²⁵Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni.

²⁶“A ni nga ni chuan hâlral thilhlanah bâwngtuai pakua, berâmchal pahnih, berâmno a pa sâwm leh pali, kum khat vêla upa, hmêlhem lo vek, LALPA hnênah in hlân tûr a ni.

²⁷Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni.

²⁸Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni.

²⁹“A ni ruk ni chuan hâlral thilhlanah bâwngtuai pariat, berâmchal pahnih, berâmno a pa sâwm leh pali, kum khat vêla upa, hmêlhem lo vek, LALPA hnênah in hlân tûr a ni.

³⁰Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni.

³¹Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni.

³²“Ni sarih ni chuan hâlral thilhlanah bâwngtuai pasarih, berâmchal pahnih, berâmno a pa sâwm leh pali, kum khat vêla upa, hmêlhem lo vek, LALPA hnênah in hlân tûr a ni.

³³Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi oliv hriak pawlh in hlân tel tûr a ni.

³⁴Ni tin hâlral leh buhbâl thilhlan leh in tûr thilhlan bâkah sual thawina thilhlanah kêlpa in hlân bawk tûr a ni.

³⁵“A ni riat ni chuan inkhâwmpui urhsûn in nei leh ang a, in hna pangngai in thawk tûr a ni lo.

³⁶Hâlral thilhlanah bâwngchal pakhat, berâmchal pakhat, berâmno a pa pasarih, kum khat vêla upa, hmêlhem lo vek, LALPA lâwmzâwng tak chu in hlân tûr a ni.

³⁷Bâwngchal te, berâmchal te, berâmno te chu buhbâl thilhlan leh in tûr thilhlan, ran chi hrang hrang pakhat ruala telh tûr tuk zât in hlân tel zêl bawk tûr a ni.

³⁸Ni tina hâlral leh buhbâl leh in tûr thilhlan ṭhin bâkah sual thawina thilhlanah kêlpa in hlân bawk tûr a ni.

³⁹“Intiamkam hlen thilhlan te, mahni duh thu-a thilhlan te, hâlral thilhlan te, buhbâl thilhlan te, in tûr thilhlan te, remna thilhlan te in hlan ṭhin bâkah khîng khi in hlân ngei tûr a ni,” a ti a.

⁴⁰ LALPA thupêk zawng zawng chu Mosian Israel-te chu a hrilh a.