Read Mizo Lushai Numbers 3 Bible Online

Numbers 3 - Mizo Lushai bible

Numbers 3

¹Sinai tlânga LALPAN Mosia a biak lai khân Arona leh Mosia thlahte chu hêng hi an ni.

²Arona fapa upa ber chu Nadaba a ni, a dangte chu Abihua te, Eleazara te, Ithamara te an ni.

³Puithiam atâna hriakthih, serh hran an ni.

⁴Nadaba leh Abihua erawh hi chu Sinai thlalêra mei thiang lo hmanga rimtui an hâl avângin, LALPA hmaah an thi a, fa an nei lo; Eleazara leh Ithamara chauh chu an pa Arona dam laia puithiam hna thawk chu an ni.

⁵ LALPA chuan Mosia hnênah,

⁶“Levia chite chu han hruai la, puithiam Arona rawngbâwlsaktuah dah rawh.

⁷Inbiakna bûka hna thawh tûr awm apiang an thawk ang a, puithiam leh mipuite rawng an bâwl tûr a ni.

⁸Inbiakna bûk chhûnga thil awm zawng zawng an enkawl ang a, Inbiakna bûka Israel mite an lo kalin an lo dawngsawng tûr a ni.

⁹Levia chite chauh hi Arona leh a fate chhawr atân Israel hnam zînga mi ka pêkte chu an ni.

¹⁰Arona leh a fate chauh hian puithiam hna an thawk ang a, mi dang lo inrawlh ve chu tihhlum tûr an ni,” a ti a.

¹¹ LALPA chuan Mosia hnênah,

¹²“Israel-te thlah, an fa tîr, piang hmasa, ka ta tûrte aiah Levia chite hi ka la ta a ni, anni chu ka ta, ka pual an ni ang.

¹³Aigupta mite fa tîr ka thah ni aṭang khân fa hrin hmasa berte hi ka ta an ni; Israel-te chu an fa tîr, an ran piang hmasate nên ka zuah a, ka ta tûr vek an ni, LALPA ka nih hi,” a ti a.

¹⁴Sinai thlalêrah LALPAN Mosia hnênah,

¹⁵“Levia thlahte chu a chi leh a chhûngkuaa thliarin an hming ziak rawh; mipa chu thla khat a chin chung lam chu telh vek ang che,” a ti a.

¹⁶Mosia chuan LALPA thupêk ang chuan a ti a.

¹⁷Levia fapate chu Gersona te, Kohata te, Meraria te an ni, an hming hi an thlahte chuan hnam hmingah an pu a.

¹⁸Gersona fate chu Libnia leh Simeia an ni.

¹⁹Kohata fate chu Amrama te, Izara te, Hebrona te, Uzela te an ni.

²⁰Meraria fate chu Malia leh Musia an ni. Hêngho hming hi an thlahte chuan hnam hmingah an pu a ni.

²¹Gersona chia chhiarte chu Libni chi leh Simei chite hi an ni.

²²Mipa zawng zawng thla khat a chin chung lam chu sângsarih leh zanga an tling.

²³Gersona chite chuan Inbiakna bûk khawthlang lamah bûk an rem tûr a ni.

²⁴An hruaitu chu Laela fapa Eliasafa a ni.

²⁵Inbiakna bûka Gersona chite tih tûr chu Inbiakna bûk enkawltu ber an ni a, a in chung te, a thuahna te, a pindan puanzâr te,

²⁶a tual hungna puanzâr te, a tual luhna puanzâr te an kutah a awm ang a, hêng thil chungchângah tih tûr awm apiang titu an ni ang.

²⁷Kohata chia chhiarte chu Amram chi te, Izar chi te, Hebron chi te, Uziel chite hi an ni.

²⁸Mipa zawng zawng, thla khat a chin chung lam chu sângriat leh zaruk an tling, Hmun Thianghlim enkawltu tûrte an ni.

²⁹Kohata thlahte chu bûk chhim lamah an awm tûr a ni.

³⁰An hruaitu chu Uziela fapa Elizafana a ni.

³¹An enkawl tûr chu Thuthlung Bâwm te, dawhkân te, khâwnvâr dahna te leh Hmun Thianghlim Ber luhna puanzâr te a ni ang.

³²Puithiam Arona fapa, Eleazara chu Levia chite hotu a ni; Hmun Thianghlim enkawltute thu lâkna tûr a ni.

³³Merari chia chhiarte chu Mali chi te leh Musi chite hi an ni.

³⁴Mipa zawng zawng, thla khat a chin chung lam chu mi sângruk leh zahnih an tling.

³⁵An hruaitu chu Abihaila fapa Zuriela a ni, Inbiakna bûk hmâr lamah bûk an rem tûr a ni.

³⁶Meraria chite enkawl tûr chu Inbiakna bûk ban rem khâwm te, a kaihna hrui te a ni ang. Hêng thila tih tûr awm zawng zawng chu an tih tûr a ni.

³⁷A hungna ban te, a bulṭhut te, a khen nghehna te, a kaihna hruite pawh an enkawl tûr a ni.

³⁸Inbiakna bûk khawchhak lam, a kawtah Mosia te, Arona te leh an fate chuan bûk an rem tûr a ni. Anni chauh hi a ṭûl hun apianga Israel-te aiawha Hmun Thianghlima rawngbâwltu tûr an ni; mi dang lo tel ve chu tihhlum tûr a ni,’ a ti a.

³⁹LALPA thupêk ang chuan Mosia leh Arona chuan Levia chite chu, an chhûngkuaa thliarin an chhiar a, mi sînghnih leh sânghnih an tling.

⁴⁰ LALPA chuan Mosia hnênah, “Israel thlah fa tîr zawng zawng, mipa thla khat a chin chung lam hming ziak chhuak rawh.

⁴¹Levia thlahte chu Israel-te fa tîr zawng zawng aiah ka ta an ni ang. Israel-te ran piang hmasa ber aiah Levia chite ran chu ka tân dah bawk rawh, LALPA chu ka nih hi,” a ti a.

⁴²LALPA thupêk angin Mosia chuan a ti a. Israel-te fa tîr zawng zawng chu a chhiar a,

⁴³a upat dân indawtin thla khat a chin chung lam mipa zawng zawng hming chu a ziak chhuak a, sînghnih leh sânghnih leh zahnih leh sawmsarih leh pathum an tling.

⁴⁴ LALPA chuan Mosia hnênah,

⁴⁵“Israel-te fa tîr zawng zawng aiah Levia chite chu ka ta an nih tâk thu puang rawh. Israel-te ran no piang hmasa ber aiah pawh Levia thlahte ran chu ka ta a ni.

⁴⁶Israel-te fa tîrho hi Levia chite ai chuan mi zahnih leh sawmsarih leh pathumin an tam a, chûngho zât tlanna chu Israel-te chuan an pe tûr a ni.

⁴⁷Mi pakhat tlanna man chu sekel nga a ni ang, sekel chu Tempula hman lai ang chiaha rit tûr a ni.

⁴⁸Tangka chu Arona leh a fate pe ang che,” a ti a.

⁴⁹Mosia chuan intlanna tangka an lo lâk chuante chu a la khâwm a.

⁵⁰Israel zînga fa tîr aṭangin tangkarua biakbûk tehna anga sekel sângkhat leh zathum leh sawmruk leh panga a la khâwm a.

⁵¹LALPAN thu a pêk angin Arona leh a fapate a pe a.