Read Mizo Lushai Numbers 30 Bible Online

Numbers 30 - Mizo Lushai bible

Numbers 30

¹Mosia chuan Israel hnam hruaitute hnênah,

²“Miin LALPA hminga thil eng emaw a hnêna pêk a intiamkamin emaw, thil eng emaw ti lo tûra a intiamkamin emaw a thu chu a bawhchhe tûr a ni lo, a sawi ang chuan a hlen ngei tûr a ni.

³“Nula pate ina la awm pawhin LALPA hnênah eng emaw pêk intiamkamin emaw, eng emaw ti lo tûra a intiamkamin emaw,

⁴a pain a lo hriata, a ngawihsan mai chuan a thu chu a hlen ngei tûr a ni.

⁵A pain a thu chu hlen a phalsak loh tlat chuan, a fihlîm mai ang. A pain a thutiam hlen a phalsak loh avângin LALPA chuan a ngaihhnathiam ang.

⁶“Hmeichhia pasal nei lovin tum lui rânin emaw, ngaihtuah chiang mang lovin emaw, thil eng emaw pêk intiamkamin emaw, thil eng eng emaw ti lo tûra intiamkam chungin emaw pasal nei ta sela,

⁷a pasalin a hriata, a ngawihsan mai chuan, a thu chu a hlen ngei tûr a ni.

⁸A pasalin a hriata, hlen a phalsak loh chuan a intiamkamna ata chu a fihlîm ang. LALPA chuan a ngaihhnathiam ang.

⁹“Hmeithaite leh mâkchhiat tâwkte erawh chuan pêk an tiam chu an pe tûr a ni a, ti lo tûra an tiam chu an ti lo tûr a ni.

¹⁰“Pasal nei laiin eng emaw pêk te, eng emaw ti lo tûr tein intiamkam sela,

¹¹a pasalin a hriata a hnial loh chuan a thu chu a hlen vek tûr a ni.

¹²A pasalin a hriata, a khapsak chuan a fihlîm mai ang. A pasalin a thutiam chu a khapsak tlat avângin LALPA chuan a ngaihhnathiam ang.

¹³Hmeichhiain thil pêk, tih loh tûr emaw, intiamkamna a neih rêng rêng chu a pasalin a phalin a phal lo thei a ni.

¹⁴A pasalin a intiamkam tih a hriat ni ngeia a hnial loh chuan pêk a tiam emaw, tih loh a tiam emaw chu a hlân ngei tûr a ni, a pasalin a intiamkamna thu a nemnghehsak tihna a ni.

¹⁵A hnu deuhvah a pasalin a intiamna chu a sûtsak chuan a hlen loh mawh chu a pasal chuan a phur ang.”

¹⁶Hei hi pasal nei lo, pate ina la awm emaw, pasal nei laiin emaw intiamkamna an neiha tih dân tûr LALPAN Mosia a hrilh chu a ni.