Read Mizo Lushai Numbers 31 Bible Online

Numbers 31 - Mizo Lushai bible

Numbers 31

²“Israel-te phuba chu Midian-ho chungah la zet la, i laichînte hnêna hruai i ni dâwn nia,” a ti a.

³Mosia chuan mipui hnênah, “Midian-ho do tûrin râlthuam inbel rawh u; Midian-ho chungah LALPA phuba in la tûr a ni.

⁴Israel hnam tin aṭangin mi sâng ṭheuh, indonaa kal tûr, indâwk chhuak rawh u,” a ti a.

⁵Tichuan, Israel hnam tin aṭangin mi sâng ṭheuh an indâwk chhuak a, an vaiin sîngkhat leh sânghnih an ni.

⁶Indonaa kal tûr chuan hnam tin zînga mi sâng dawh chhuah chu puithiam Eleazara fapa Finehasa hovin indo tûr chuan a tîr ta a, bungbêl thianghlimte leh tawtawrâwt ham tûr chu an keng a.

⁷Mosia hnênah LALPA sawi ang khân Midian-ho chu an bei a, mipa zawng zawng an that a.

⁸Mi dang rualin Midian lal panga Evia te, Rekema te, Zura te, Hura te, Reba te pawh hi an that a, Beora fapa Balaama pawh indonaah chuan an that a.

⁹Israel mite chuan Midian hmeichhiate chu an fate nên an man a, an bâwng te, berâm leh kêl rualte leh an thil neih dang pawh an lâksak vek a.

¹⁰Chûng rama an chênna khuate leh an bûkte chu an hâlsak vek bawk a.

¹¹An thil lâk leh man, mihring leh ran nên, an kawi vek a.

¹²Mosia te, puithiam Eleazara te leh Israel pungkhâwmho hnênah, an riahhmun Moab phaizâwl Jeriko zâwn Jordan lui kamah chuan an rawn hâwn a.

¹³Mosia te, puithiam Eleazara te leh Israel pungkhâwmho te chu riahhmun pâwnah anni chu hmuak tûrin an lo chhuak a.

¹⁴Indona aṭanga lo haw sipai sâng hotute leh za hotute chungah Mosia chu a thin a ur ta hle a.

¹⁵Mosia chuan an hnênah, “Hêng hmeichhiate hi engati nge in la zuah?

¹⁶Balaama fuihpawrhin Peor-ah khân Israel mite chu LALPA lakah thil sual a tihtîr a nih kha.

¹⁷Mipa tawh phawt chu, naupang tê pawh that vek ula, hmeichhia pawh mipa pâwl tham tawhho zawng chu that vek rawh u.

¹⁸Hmeichhe naupang, mipa la pâwl tham lohho kha erawh chu zuah ula, nei mai rawh u.

¹⁹Mi that leh mitthi ruang khawih zawng zawng chu riahhmun pâwnah riak rawh u; ni thum ni-ah leh ni sarih ni-ah in mi mante nên inthianfai ang che u.

²⁰Silhfên te, savuna siam thil rêng rêng te, kêl hmula siam zawng zawng te, thinga siam zawng zawngte nên tihthianghlim zet tûr a ni,” a ti a.

²¹Puithiam Eleazara chuan indonaa kalte hnênah, “Mosia hnêna LALPA thupêk chu hei hi a ni:

²²Rangkachak te, tangkarua te, dar te, thîr te, ṭin te, suan te,

²³meia rawha chhe mai thei lo chu meiah in rawh ang a, a thianghlim ang, tlenfaina tui erawh chu theh tûr a ni. Meia rawh theih loh chu sil tûr a ni.

²⁴In silhfênte pawh a ni sarih niin in su ang a, in thianghlim ang a, chumi hnuah riahhmunah in lo lût thei ang,” a ti a.

²⁵ LALPA chuan Mosia hnênah,

²⁶“Nang nên, Puithiam Eleazara nên, Israel pungkhâwmho hruaitute nên râllâk thil an rawn hawn, mihring leh ran te chu chhiar ula,

²⁷inzâtin hmun hnihah ṭhen phawk ula, ṭhen khat chu indonaa kalte pe ang che u; a dang chu Israel pungkhâwmho hnênah pe ang che u.

²⁸Indonaa kalhote chan aṭangin mihring te, bâwng te, sabengtung te, berâm leh kêl te, zanga zêlah pakhat LALPA tân lâksak la,

²⁹LALPA tâna serh hran chu Eleazara pe ang che.

³⁰A zâtve, Israel pungkhâwmho chan aṭang chuan mihring te, bâwng te, sabengtung te, berâm leh kêl te, sawmngaa pakhat zêl lâksak la, LALPA biakbûk enkawltu Levia chite pe ang che,” a ti a.

³¹LALPA thu ang chuan Mosia leh puithiam Eleazara chuan an ti a.

³²Anmahni puala an thil lâk chhiar lovin indonaa kalte thil rawn hawn chu heti zât hi a ni: Berâm leh kêl nuairuk leh sîngsarih leh sângnga;

³³bâwng sîngsarih leh sânghnih,

³⁴sabengtung sîngruk leh sângkhat,

³⁵hmeichhe naupang mipa la pâwl loh sîngthum leh sânghnih;

³⁶a zâtve indonaa kalte chan chu berâm leh kêl nuaithum leh sîngthum leh sângsarih leh zanga a ni;

³⁷LALPA tâna lâk chu zaruk leh sawmsarih leh panga a ni.

³⁸Bâwng chu sîngthum leh sângruk a ni a, LALPA tâna lâk chu sawmsarih leh pahnih a ni.

³⁹Sabengtung chu sîngthum leh zanga a ni a, LALPA tâna lâk chu sawmruk leh pakhat a ni.

⁴⁰Hmeichhe naupang chu sîngkhat leh sângkhat an ni, LALPA tâna lâk chu mi sawmthum leh pahnih an ni.

⁴¹LALPA thupêk angin LALPA tâna serh hran chu puithiam Eleazara chu an pe a.

⁴²Indonaa kalte thil hawn zâtve,

⁴³Israel mipuite hnêna Mosian a sem chu kêl leh berâm nuaithum leh sîngthum leh sângsarih leh zanga a ni.

⁴⁴Bâwng chu sîngthum leh sângruk a ni;

⁴⁵sabengtung chu sîngthum leh zanga a ni.

⁴⁶Hmeichhe naupang chu sîngkhat leh sângruk an ni.

⁴⁷Israel mipuite chan aṭang chuan sawmngaa pakhat zêl, ran pawh mihring pawh a la a; LALPA Biakbûk enkawltu Levia chite hnênah LALPA thu ang chuan a pe a.

⁴⁸Sipai sâng hotute leh za hotute chu Mosia hnênah an lo kal a,

⁴⁹Mosia hnênah, “Kan hote kan han chhiar a, pakhat mah kan inhloh lo.

⁵⁰Rangkachaka siam incheina: bânbun te, ngûn te, khaidiat ṭhi te, nemna zungbun te, bengbeh te, kâwnghrên te, mahni pual atâna kan lâkte hi, LALPA chuan kan nun min vênhimsak manah LALPA hnênah kan rawn hlân a ni,” an ti a.

⁵¹Mosia leh Eleazara chuan rangkachak chher sa chu an lo dawng a.

⁵²Sipai hotuten LALPA hnêna thilpêk an rawn ken rangkachak chu kg. zathum lai a ni.

⁵³Sipai narânho erawh chuan mahni puala an lâk chu an nei mai a.

⁵⁴Mosia leh puithiam Eleazara chuan rangkachak chher sate chu LALPA chuan a mite a hriat reng theih nân Biakbûkah chuan an dah a.