Read Mizo Lushai Numbers 32 Bible Online

Numbers 32 - Mizo Lushai bible

Numbers 32

¹Reubena leh Gada thlahte chuan kêl leh berâm an ngah hle a. Jazer leh Gilead ram chu ran tlat nâna ṭha tak a ni tih an hmuhin

²Mosia te, puithiam Eleazara te leh Israel pungkhâwmho hruaitu te hmaah an lo kal a,

³“Atarot te, Dibon te, Jazer te, Nimra te, Hesbon te, Elealeh te, Sebam te, Nebo te, Beon ram te,

⁴LALPA min hnehsak ramte hi, ran tlatna chi a ni a, keini lahin ran kan ngah a,

⁵rem in tihzâwng a nih chuan Jordan lui râl kai ve lovin he ram hi kan chanvo atân min pe mai teh u” an ti a.

⁶Mosian Reubena leh Gada thlahte hnênah chuan, “In unauten râl an bei ang a, nangni he laiah in lo ṭhu mai mai bîk ang maw?

⁷Engtizia nge Israel mite hi LALPA ram pêka an kal tûr rilru in tihhnual le?

⁸Kades-barnea aṭanga ram en thlithlai tûra mi ka tirh pawh khân in paten mi dang rilru an tihnual a nih kha.

⁹Eskol ruam an han thlena ram chu an han hmuh chian khân LALPA pêk rama kal ngam lo tûrin Israel mite rilru an tizâm a.

¹⁰Chutah LALPA chu a thinur ta hle a.

¹¹‘Aigupta ram aṭanga lo chhuak kum sawmhnih aia upaho chuan Abrahama te, Isaka te, Jakoba te hnêna pêk ka tiam ram chu an thleng ve tawp lo vang, mi zui tak tak lo a ni;

¹²Keniz mi Jefunea fapa Kaleba leh Nuna fapa Josua-te pahnih chauh hi an thleng ve ang, anni hi chuan min zui tak tak a ni,’ tiin thu a tiam hial a nih kha.

¹³LALPA chu a thinur tâk êm avângin thil ṭha lo titute an thih mang hma chu thlalêrah kum sawmli zet kan vâkvai a nih hi.

¹⁴In pate ang hlauh kha in nih hi, mi sual rual, Israel-te chunga LALPA thinur tizualtu in nih hi.

¹⁵Ani chu tûnah in zui duh lo tak tak a nih chuan thlalêrah min hnutchhiah leh ang a, nangni hian Israel mite hi in tihlum vek dâwn a nih hi,” a ti a.

¹⁶Mosia lam chu an hawi a, “Kan berâm rual tân huang kan siam ang a, kan fanaute awmna tûr kulh nei khua kan din ang.

¹⁷Keiniho hian hriamhrei kengin kan unau Israel-te hma kan hruai zêl ang a, an awmna tûr hmun chu kan thlen ang. Kan nupui fanaute erawh chu hêng lai mite avângin kulh nei khuaahte chuan lo awm mai rawh se.

¹⁸Israel mi tinin an ram neih tûr an luah hma chu, in lamah kan kîrsan lo vang.

¹⁹Jordan lui râl ram chu kan neihpui ve lo vang e, Jordan he lam kamah kan chanvo tûr zawng a awm hi,” an ti a.

²⁰Mosia chuan, “Chutiangin in ti meuh ang maw? Indo peiha LALPA hmaa hriamhrei in kena,

²¹LALPA hmaa Jordan lui kânin hmêlmate a hnawh chhuah hma chu in tel ve zêla,

²²LALPAN ram chin a hneh hnua kîr leh chauh tûr in nih chuan, LALPA leh Israel-te chungah thiam lohna in nei lo vang a, he lai ram hi LALPA chuan in neih a remti ngei ang.

²³In duh loh erawh chuan LALPA chungah thil in tisual a ni ang; in sual mawh chu in phur ngei ang.

²⁴In fanaute tân khawpui kulh neite chu din ula, berâm huangte siam ula, in duh ang chuan ti ta che u,” a ti a.

²⁵Gada leh Reubena thlahte chuan Mosia hnênah, “Ka pu, i thu ang chuan i chhiahhlawhte hian kan ti ang.

²⁶Kan nupui fanau te, kan bâwng te, kan berâm leh kêlte chu Gilead ram khaw kulhahte hian an awm ang a.

²⁷I chhiahhlawh te, indonaa hriamhrei keng tlâk zawng zawng te hi chuan i thu angin Jordan lui kan kai ve vek ang,” an ti a.

²⁸Mosia chuan puithiam Eleazara te, Nuna fapa Josua te leh Israel hnam hruaitu te chu thu a chah a.

²⁹“Gada leh Reubena thlah indonaa hriamhrei keng tlâkte hian LALPA hmaa Jordan an kaipui che ua, ram chu in hnehpui chuan Gilead ram hi an chanvo-ah pe ang che u.

³⁰Hriamhrei kenga Jordan an kânpui duh loh che u erawh chuan Kanan ramah, in zîngah, chanvo an nei ve mai tûr a ni,” a ti a.

³¹Gada leh Reubena thlahte chuan, “I chhiahhlawhte hnêna LALPA sawi ang chuan kan ti ang a, Kanan ramah,

³²LALPA hmaah chuan hriamhrei kan keng ang a, kan ram chanvo ve tûr erawh chu khawchhak lama mi hi ni rawh se,” an ti a.

³³Mosia chuan Gada leh Reubena thlahte chu Manasea thlah zâtvete nên Amor lal Sihona leh Basan lal Oga ram chu an khawpui leh a chhehvêl ramte nên chuan a sem a.

³⁴Gada thlahte chuan kulh nei khua - Dibon khua te, Atarot khua te, Aroer khua te,

³⁵Atrot-sofan khua te, Jazer khua te, Jogbeha khua te,

³⁶Bethnimra khua te, Beth-haran khaw kulh te chu an din ṭha leh a, berâm huangte pawh an siam a.

³⁷Reubena thlahte chuan Hesbon khua te, Elealeh khua te, Kiriathaim khua te,

³⁸Nebo khua te, Baal-meon khua te, Sibma khaw kulh te an siam ṭha a, hming an sa thar a.

³⁹Manasea fa, Makira thlahte chu, Gilead khuaah an kal a, an la a. Chuta awm Amor mite chu an hnawt chhuak a.

⁴⁰Mosian Gilead khua chu Manasea fa, Makira chu a pe a, chutah chuan a awm ta a.

⁴¹Manasea fa vêk, Jaira chu a thawk chhuak a, a chhehvêl khuate chu a la a, Havot-jair a vuah a.

⁴²Noba pawh a thawk chhuak a, Kenat leh a chhehvêl khuate chu a la a, ama hming chawiin Noba a vuah a.