Read Mizo Lushai Numbers 34 Bible Online

Numbers 34 - Mizo Lushai bible

Numbers 34

¹ LALPA chuan Mosia hnênah,

²“Israel mite chu hrilh rawh. Kanan ram in thlen hun chuan in ram atâna ka pêk tûr che u ram chin chu hetiang hi a ni ang.

³Chhim lam ri chuan Zin thlalêr aṭangin Edom ram a chhun ang a, khawchhak lam ri chu Tuipui Thi tâwpah a inṭan ang a,

⁴chhim zâwngin Akrabim kalkhânah kal tlangin Zin thlalêra Kades-barnea a chhun ang. Hmâr zawngin Hazar-adar thlengin a kal ang a, Azmon a pan ang a,

⁵Aigupta ramri luite hawiin a inher ang a, Mediteranean tuipui a chhun ang.

⁶“Khawthlang lam ri chu Mediteranean tuipui a ni ang.

⁷Hmâr lam ramri chu Mediteranean tuipui aṭangin Hor tlâng chhunin a kal ang a,

⁸chuta ṭangin Hamath kalkhânah a kal ang a,

⁹Zedad leh Zefron kal tlangin Hazar-enan a chhun ang, chu chu hmâr lam ramri chu a ni ang.

¹⁰“Khawchhak lam ramri chu Hazar-enan aṭangin Sefam-ah a kal ang a.

¹¹Ain chhak lam Ribla panin a chhuk ang a, Galili dîl chhak lam tlâng pangah a chhuk zêl ang a;

¹²Jordan luidungah, Tuipui Thi a chhun ang. Ramri hual chhûng ram hi in ram tûr chu a ni,” a ti a.

¹³Mosia chuan Israel mite chu a hrilh a, “He ram hi a ni in insem tûr ram, hnam kua leh a chanve hnêna LALPA pêk chu.

¹⁴Reubena leh Gada thlahte leh Manasea thlah zâtve te chuan an chhûngkaw tam dân azirin ram an insem tawh a,

¹⁵Jordan lui, Jeriko zâwn, khawchhak lam ram chu an nei tawh a ni,” a ti a.

¹⁶ LALPA chuan Mosia hnênah,

¹⁷“Puithiam Eleazara leh Nuna fapa Josua chuan i ai awhin ram chu an sem tûr a ni.

¹⁸Hnam tin aṭangin hruaitu thlang chhuak la, chûng mite chuan sempui rawh se.

¹⁹Chûng mite chu hêngte hi an ni ang: Juda hnamah Jefunea fapa Kaleba;

²⁰Simeona hnam aṭangin Ammihuda fapa Semuela;

²¹Benjamina hnam aṭangin Kislona fapa Elidada;

²²Dan hnam aṭangin Joglia fapa hotu Bukia;

²³Josefa thlah Manasea hnam aṭangin Efoda fapa hotu Haniela,

²⁴Efraim hnam aṭangin Siftana fapa hotu Kemuela;

²⁵Zebulun hnam aṭangin Parnaka fapa hotu Elizafana;

²⁶Isakara hnam zîng aṭangin Azana fapa hotu Paltiela,

²⁷Asera hnam aṭangin Selomia fapa hotu Ahihuda;

²⁸Naftali hnam aṭangin Amihuda fapa hotu Pedahela,” a ti a.

²⁹Hêng mite hi LALPA chuan Kanan ram Israel-ten an chan ṭheuh tûra semtu atân a ruat a ni.