Read Mizo Lushai Numbers 35 Bible Online

Numbers 35 - Mizo Lushai bible

Numbers 35

¹Jeriko zâwn, Jordan râlah, LALPA chuan Mosia hnênah,

²“Israel mite chu hrilh rawh: an ram chan chhûngah Levia chite tân khaw ṭhenkhat, a chhehvêla ran tlatna tûr nên an pe tûr a ni.

³Chûng khuate chu Levia chite ta a ni ang a, chutah chuan an awm khâwm tûr a ni. Ran tlatna tûr ramah chuan an bâwng te, kêl te, berâmte an tlattîr tûr a ni.

⁴Levia chite in hleh tûr ram âwl chu khua aṭanga tawng sângkhat thleng tûr a ni.

⁵Ram âwl zawng zawng chuan kil li a nei ang a, kil tin tawng sânghnih a ni ang a, a laiah khua chu a awm tûr a ni.

⁶Levia chite in pêk khaw ruk chu tualtlânna khuaah hman tûr a ni.

⁷Hêng khaw paruk bâkah khaw dang sâwm li leh pahnih, a chhehvêl ram âwl nên, in pe bawk tûr a ni, a vaiin khaw sawmli leh pariat a nih chu.

⁸Hnam tinin, an ram chan a zau leh zau loh athuin Levia chite awmna tûr khua an siamsak tûr a ni,” a ti a.

⁹ LALPA chuan Mosia hnênah,

¹⁰“Israel mite chu hrilh rawh: Jordan lui in kaia, Kanan ram in thlen hun chuan,

¹¹tual that palhte humhimna tûr tualtlân lehna khua ruat ang che u;

¹²Israel pungkhâwmhovin an thu an rêl fel hmain chûng khuaahte chuan an tlân ang a, thisen phuba latuin a that mai dâwn lo nia.

¹³Chutianga tualtlânna tûr khua paruk ruat ang che u,

¹⁴Jordan ral chhak lamah khaw thum in ruat ang a, Kanan ramah khaw thum bawk in ruat dâwn nia, chûng chu tualtlânna khua a ni ang.

¹⁵Israel mi te, ram dang mi te leh in zînga lo pêm te tân hêng khaw rukte hi an tualtlânna tûr a ni, mi that palh chu, tu pawh chutah chuan an tlân thei ang.

¹⁶“Miin thîr hmanga mi a beiha a tihhlum chuan tual that a tling a, tual that chu tihhlum ngei tûr a ni.

¹⁷Lunga chhu hlum a nih pawhin tual that a ni, tual that chu tihhlum ngei tûr a ni.

¹⁸Talhtuma vaw hlum a nih chuan tual that a ni, tual that chu tihhlum ngei tûr a ni.

¹⁹A laichîn hnai, thisen phuba latu tûr chuan a hmuhna apiangah tualthattu chu a that ve thei ang.

²⁰A huat avângin mi a namthlu chawrh thei a, lo chângruin engin emaw a vawm thei a,

²¹an inhuat avângin a hnek chawrh thei bawk a, chutianga mi a tih chu a thih chuan tual a that a ni: tual that chu tihhlum ngei tûr a ni; thisen phuba latu chuan a hmuhna apiangah a that thei ang.

²²“Huat vâng ni lovin mi a nêk thut thei a, chângru lêm lovin mi a vawm palh thei a,

²³hmu lovin a lung vawm chuan mi a dêng palh thei a; inhmêlmâkna pawh an nei ngai lo va, tihnat pawh a tum ngai lo va; mahse, a mi tih chu a thi hlauh thei.

²⁴Chutiang thilah chuan dân angin an ngaihtuah ang a.

²⁵Phuba latu lakah an hum tûr a ni; a tualtlânna khuaah khân an tlântîr ang a, puithiam lalber ṭang lai thih thlengin chutah chuan a awm tûr a ni.

²⁶Mi tihlumtu chuan a tualtlânna khua chu a kalsan vaih chuan

²⁷thisen phuba latuin a lo thah pawhin a thisen mawh chu a phur lo vang.

²⁸Puithiam lalber ṭang lai a thih erawh chuan ama in leh lovah a haw leh thei ang.

²⁹He dân hi in awmna apiangah i hmang kumkhua tûr a ni.

³⁰“Mihring that chu hretu eng emaw zât thu avâng chauhva tihhlum tûr a ni; thuhretu pakhat chauh thu avângin mi tihhlum tûr a ni lo.

³¹Tual that, tihhlum ngei tûr chu tlan theih a ni lo, a thi ngei tûr a ni.

³²Tualtlânna khuaa tlân chu puithiam lalber ṭang lai a thih hma chuan an khaw lamah haw duh mah se, a nun humna tûrin a intlanchhuah phal tûr a ni lo.

³³In awmna ram chu tibawrhbâng suh u: thisen chhuah hian ram a tibawrhbâng a ni; thisen luanna ram chu thisen chhuahtu thisen ngawt lo chuan tihthianghlim leh theih a ni lo.

³⁴Ka ram, in chên vena ram chu, in tibawrhbâng tûr a ni lo; kei LALPA hi, ka mi Israel-te zîngah ka awm zêl ṭhîn a ni,” a ti a.