Read Mizo Lushai Numbers 5 Bible Online

Numbers 5 - Mizo Lushai bible

Numbers 5

¹ LALPA chuan Mosia hnênah;

²“Israel-te chu hrilh rawh: vuna phâr natna vei te, thipût lai te, mitthi ruang khawih vânga bawlhhlawhte chu riahhmun ata an hnawt chhuak tûr a ni.

³Chutianga bawlhhlawhna nei chu hnawt chhuak vek rawh u; riahhmunah kei pawh ka awm ve si a, an tibawrhbâng ang e”, a ti a.

⁴Israel mite chuan Mosia hnêna LALPA thu sawi chu an awih a, daipâwnah an hnawt chhuak ta vek a.

⁵ LALPA chuan Mosia hnênah,

⁶“Israel-te chu hrilh rawh: LALPA thu bawhchhiain tu pawhin mi chungah thil sual ti sela, thupha a chawi tûr a ni.

⁷A thil sual tih man chu kim takin a rûl ang a, tihsualna pa chu hmun ngaa ṭhena hmun khat a pêk belh tûr a ni.

⁸Pêk tûra chu thi sela, laichîn hnai a neih bawk si loh chuan a rulhna tûr sum chu puithiam chanpual atân LALPA hnêna pêk tûr a ni. Hei hi sual thawina thilhlana berâmchal bâka pêk tûr a ni.

⁹Israel miten chutiang thilpêk chu an rawn hlan chuan a dawngtu puithiam chuan a nei ang.

¹⁰Puithiamte chuan thilhlan an lo dawn rêng rêng an nei zêl tûr a ni,” a ti a.

¹¹ LALPA chuan Mosia hnênah,

¹²“Israel-te chu hetiang hian thu hrilh rawh: Tu nupui pawh rinawm lovin

¹³mi dangin mutpuiin uire sela, a pasal chuan a hriat chiah lohva, chesual ngei si, inpuang si lo, kut man ni bawk si lo chu,

¹⁴a pasalin a rinhlelha, a thîka, a nupui chu a chesual emaw, sual lo emaw a rinhlelh tlat si chuan,

¹⁵a nupui chu puithiam hnênah a hruai ang a, barli chhangphut kg. khat thilhlan tûra tuk zât chu, hriak telh loh, rimtui hâl tûr pawh tel lovin a rawn keng bawk tûr a ni; chu chu nupui rinhlelhawmte fiah nân thilhlan, an pasalten an rawn ken ṭhin tûr chu a ni.

¹⁶“Puithiam chuan hmeichhia chu a hruai ang a, LALPA hmaah a dintîr ang a,

¹⁷hlumbêlin tui thianghlim a la ang a, Biakbûk chhuata vaivut chu a sâwk ang a, tuiah chuan a phul tûr a ni.

¹⁸Hmeichhia chu LALPA hmaah chuan a dintîr ang a, a sam thlahin thîkthu avânga fiahna tûr chhangphut thilhlan ṭhenkhat chu a hûmtîr tûr a ni.

¹⁹Puithiam chuan hmeichhia chu chhia a chhamtîr tûr a ni. ‘Tu man an mutpui loh chea, i pasal laka thil bawlhhlawh i tih loh chuan ânchhe thlentu tui chhe lak ata hi i fihlîm ang;

²⁰amaherawhchu, i pasal laka khaw dang i hawia, i pasal ni lo mipain an mutpui chea, an tihbawrhbân che chuan i fihlîm lo vang,’ a ti ang a.

²¹Puithiam chuan hmeichhia chu a vau ang a, chhia a chhamtîr ang a, a hnênah, ‘LALPA chuan i chipuite ânchhe dawngah siam che rawh se;

²²ânchhe tuichhia i in tûr hian, i pum tipuar sela, i malpui inkâr tisâwng rawh se,’ a ti ang a, hmeichhia chuan, ‘Amen, Amen,’ a lo ti ang.

²³Puithiam chuan ânchhe dawn tûr a chhamte chu lehkhaah a ziak ang a, tui chhiaah chuan a tleuh fai tûr a ni.

²⁴A pum tina mai thei tui chhia chu a intîr hmain,

²⁵thîkthu avânga fiahna tûr thilhlan chhangphut a hûmtîr kha puithiam chuan a lâksak ang a, LALPA hmaah a thên ang a, maichâmah a rawn dah tûr a ni.

²⁶Chhangphut thilhlan kha a vaia hlan vek a nih entîr nân a thên a thên ang a, maichâmah a hâl ral tûr a ni.

²⁷Chumi zawhah chuan hmeichhia chu tui chhia kha a intîr tawh ang, a bawrhbâna a lo uire ngei a nih chuan tui chhia a in veleh a pum a na ang a, a dul a puar ang a, a mal inkâr a sâwng ang; mi ânchhedawngtu a ni ang.

²⁸Hmeichhia chu a bawrhbân lohva, a thianghlim chuan eng mah a ti lo vang: nau a pai leh mai tûr a ni.

²⁹Hetiang hi nupui, pasalte laka khaw dang hawi intibawrhbângte chungthu rêl dân tûr chu a ni.

³⁰A pasalin mi dang laka a nupui chu a thîk miau si chuan puithiamin hmeichhia chu LALPA hmaah a dintîr ang a, hêng thil hi a lo ti ang.

³¹A pasal chuan thiam lohna a nei lo vang a, a hmeichhia chuan thiam lohna a neih chuan a tuar tûr a ni,” a ti a.