Read Mizo Lushai Numbers 6 Bible Online

Numbers 6 - Mizo Lushai bible

Numbers 6

¹ LALPA chuan Mosia hnênah,

²“Israel-te chu heti hian hrilh rawh: Mipain emaw, hmeichhiain emaw Nazarit-ho thutiam anga LALPA hnênah a inhlan chhûng chuan,

³uain leh zu a nghei tûr a ni; uain thûr leh zu thûrte pawh a in tûr a ni lo, grep rah sâwr tui pawh a in tûr a ni lo, a rah pawh, a tharlâm emaw, pho ro emaw pawh a ei tûr a ni lo.

⁴Nazarit thutiama a inphuar chhûng chu grep aṭanga siam eng mah, a sâwr fu pawh a ei tûr a ni lo va.

⁵Nazarit thutiama a inphuar chhûng chu a lu pawh ziah kâwn tûr a ni hek lo; LALPA tâna a inhlan chhûng chuan serh hran a ni a, a samte pawh a ṭhan ṭhanin a ṭhang mai tûr a ni.

⁶LALPA tâna a inhlan chhûng hian mitthi ruang a khawih tûr a ni lo.

⁷A nu leh pa ruang pawh, a unaupa leh a farnu ruang pawh khawihin a intibawlhhlawh tûr a ni lo, a inserh hran lai a ni si a.

⁸Nazarit mi a nih chhûng chu LALPA tâna serh hran a ni.

⁹A bula mi thi thut sela, a ruangin a sam chu khawih palhin tibawlhhlawh sela, ni sarih a nghâk ang a, a sam chu a ziat kawlh vek tûr a ni; tichuan, a thianghlim leh thei ang.

¹⁰A ni riat ni chuan ṭhuro pahnih emaw, pârva no pahnih emaw Inbiakna bûkah puithiam hnênah a rawn keng ang a,

¹¹ani chuan sual thawi nân pakhat chu a lo hlansak ang a, pakhat chu hâlral thilhlanah a hâl ang a, mitthi ruangin a khawih avânga amah thenna chu a tihsak ang a, chumi ni vek chuan a sam chu a serh thar leh tûr a ni.

¹²Nazarit mi atân LALPA hnênah a inhlân thar leh ang a, kum khat vêla upa berâmno, a pa, bawhchhiat man thilhlanah a hlân ang. A inserhhranna kha tihbawlhhlawh a nih avângin tûn hmaa Nazarit mi a nih chhûng kha a thlâwn mai a ni ang.

¹³“Nazarit miin a hun a tlâk hnuin hetiang hian thil a ti tûr a ni: Inbiakna bûkah a lo kal ang a,

¹⁴LALPA hnêna thilhlan atân hêngte hi a rawn keng tûr a ni: hâlral thilhlan atân berâmno, a pa, kum khat vêla upa, hmêlhem lo; sual thawina thilhlan atân berâmno, a nu, kum khat vêla upa, hmêlhem lo; remna thilhlan atân berâmchal hmêlhem lo;

¹⁵buhbâl thilhlan atân kho chhûngah dawidim telh loh, chhangphut ṭha chia siam, hriak nêna hmeh, chhang tlang te, hriaka tâl chhang pan te, in tûr thilhlan atân uain te hi.

¹⁶Puithiam chuan LALPA hmaah a rawn keng ang a, sual thawina te, hâlral thilhlan te chu a hlân ang.

¹⁷Berâmchal chu remna thilhlanah a hlân ang a, a rual chuan buhbâl thilhlanah dawidim telh loh chhang kho khat chu in tûr thilhlan uain nên chuan a hlân bawk ang.

¹⁸Tin, Nazarit mi chuan a sam serh chu Inbiakna bûk kawngka bulah chuan a ziat fai ang a, remna thilhlan hâlnaah chuan a rawh tûr a ni.

¹⁹Puithiam chuan berâmchal dâr chhum hmin leh khova dah dawidim telh loh chhang tlang pakhat leh chhang pan pakhat chu a la ang a, Nazarit mi hnênah chuan, a lu a meh fai hnuah, a pe tûr a ni.

²⁰Chu chu puithiam chuan thên thilhlanah a thên ang a, puithiam tâna serh hran a ni ang, a bawp leh a irno, puithiam chan tûra serh hran ṭhinte nên. Chumi zawh chuan Nazarit mi khân uain a in thei tawh ang.

²¹“Hei hi Nazarit mi tih tûr chu a ni; mahse, chu mi chuan tih tûr tuk bâk thilhlan pêk a lo tiam chuan, a tiam ang chu a ti ngei tûr a ni,” a ti a.

²² LALPA chuan Mosia hnênah:

²³“Arona leh a fate chu hrilh rawh, hetiang hian mipui tân malsâwmna an dîl tûr a ni:

²⁴ LALPA chuan malsâwm che uin vêng che u rawh se,

²⁵ LALPA hmêl chu in chungah êng sela, khawngaih che u rawh se.

²⁶ LALPA chuan in lam lo hawi sela, thlamuanna pe che u rawh se.

²⁷Chutiang chuan Israel mite chungah ka hming in chham ang a, keiin mal ka sâwm ang,” a ti a.