Read Mizo Lushai Numbers 8 Bible Online

Numbers 8 - Mizo Lushai bible

Numbers 8

¹ LALPA chuan Mosia hnênah,

²“Arona chu hrilh rawh, khâwnvâr a hâlin a khâwnvâr pasarih chuan a hma lam a ên tûr a ni,” a ti a.

³Arona chuan chutiang chuan a ti a, Mosia hnêna LALPA thupêk ang chuan hma lam ên tûr chuan khâwnvârte chu a chhi a.

⁴Khâwnvâr dahna chu a bul vâwng leh a zâr, pangpâr lema chei te nên chuan, rangkachaka chher a ni; siam dân tûr Mosia hnêna LALPA sawi ang chiaha chher a ni.

⁵ LALPA chuan Mosia hnênah,

⁶“Israel mite zîng aṭangin Levia chite hi tihrang la, thian thianghlim rawh.

⁷Hetiang hian thian ang che: tlenfaina tui theh la, an hmul zawng zawng ziat fai rawh se, an puan su sela, inbualtîr rawh.

⁸Bâwngtuai rawn la sela, a ruala hlan tel tûr buhbâl thilhlan atân chhangphut ṭha chi hriaka hmeh rawn la tel rawh se; sual thawina thilhlana hlan tûr bâwngtuai dang la bawk ang che.

⁹Israel-ho chu pung khâwm tûrin ko la, Levia chite chu Inbiakna bûk hmaah chuan dintîr ang che.

¹⁰Israel mite chuan Levia chite lu-ah chuan an kut an nghat ang a,

¹¹LALPA rawngbâwltu an nih theih nân Arona chuan Levia chite chu Israel-te zîng ata chu ka ta ni tûrin thên thilhlanah a hlân tûr a ni.

¹²Levia chite chuan bâwngtuai lu-ah chuan an kut an nghat ang a, an sual thawina tûrin bâwngtuai pakhat chu sual thawina thilhlanah hlansak tûr a ni, pakhat chu hâlral thilhlana hâl tûr a ni.

¹³“Levia chite chu Arona leh a fate kaihhruai tûrin LALPA tân thên thilhlanah i hlân tûr a ni.

¹⁴Israel mite zîng aṭang chuan Levia chite chu i tihrang ang a, ka ta an lo ni tawh ang.

¹⁵I tihthianghlima i hlan hnu chuan Levia chite chu Inbiakna bûka rawngbâwl tlâk an ni tawh ang.

¹⁶Israel-te fa tîr, chhûl keuho, ka neih tûrte aiah anni hi ka nei dâwn a ni, anni neitu chu keimah chauh hi ka ni.

¹⁷Aigupta mite fa tîr ka tihhlum lai khân Israel mite fapa upa berte leh an ran piang hmasa berte chu ka tân ka zuah a ni.

¹⁸Tûnah Israel-te fa tîr aiah Levia chite hi ka nei dâwn a ni.

¹⁹Arona leh a fate puitu atân an hnêna Israel-te thilpêk an ni; Israel mite tân Hmun Thianghlimah rawng an bâwl ang a; Israel mite chungah thil ṭha lo a thlen loh nân Inbiakna bûka an kal tûr anni hian an lo vêng ṭhîn ang,” a ti a.

²⁰Mosia hnêna LALPA thupêk ang chuan Mosia te, Arona te leh Israel pungkhâwmho chuan Levia chite chu an hlân a.

²¹Levia chite chu an intifai a, an puante an su a, Arona chuan LALPA hnêna thên thilhlanah anni chu a hlân a. Sual thawina thilhlan pawh chu a tihsak a.

²²Levia chite chungchânga LALPA thupêk zawng zawng chu mite chuan an ti a. Tichuan, Levia chite chu Hmun Thianghlima Arona leh a fate hnuaia rawngbâwltu an ni ta a.

²³ LALPA chuan Mosia hnênah,

²⁴“Kum sawmhnih leh panga an tlinin Levia chite chu Inbiakna bûkah hna an thawk ṭheuh tûr a ni;

²⁵kum sawmnga an tlin chuan an châwl tûr a ni.

²⁶Hemi hnu hi chuan an Levia chipui, Inbiakna bûka hna thawk an pui ve thei ang: anmahni pual chuan eng mah an ti tûr a ni tawh lo; Levia chite thawh dân tûr chu hetianga rel tûr a ni,” a ti a.