Read Mizo Lushai Numbers 9 Bible Online

Numbers 9 - Mizo Lushai bible

Numbers 9

¹Aigupta an chhuahsan hnu kum hnihna, thla khatnaah chuan Sinai thlalêrah LALPA chuan Mosia hnênah,

²“Israel-te chuan Kalhlên kût a hun takah hmang rawh se.

³Tûn thla ni sâwm leh pali ni hian ni tlâk aṭangin tih dân tûr rêl diam tawh angin in hmang tûr a ni,” a ti a.

⁴Tichuan, Mosia chuan mipui chu Kalhlên kût hmang tûrin a hrilh a,

⁵thla khatna, ni sâwm leh pali tlaiah, Sinai thlalêrah chuan an hmang ta a. Mosia hnêna LALPA thupêk ang chiah zêl chuan mite chuan engkim an ti a.

⁶Mi ṭhenkhat, mitthi ruang an khawih avânga bawlhhlawh an awm a, chûng mite chuan a ni tak chuan Kalhlên kût chu an hmang ve thei lo va.

⁷Mosia leh Arona hnênah an lo kal a, “Mitthi ruang kan khawih a ṭûl avânga bawlhhlawh kan ni a; Israel mi dangte ang bawkin LALPA hnênah thil kan hlân ve thei dâwn lâwm ni?” an rawn ti a.

⁸Mosia chuan, “LALPA thu ka dawn hma chu lo nghâk teh u,” a ti a.

⁹ LALPA chuan Mosia hnênah,

¹⁰“Israel mite chu hrilh rawh. In zînga mi emaw, in thlahte emaw mitthi ruang an khawih avânga an bawlhhlawhin emaw, ram hla taka an zinin emaw, Kalhlên kût hman an duh ve si chuan,

¹¹thla khat hnuah, thla hnihna ni sâwm leh pali ni tlai lamah an hmang ve thei ang. Chhang dawidim telh loh leh lambak nên hmang ang che u.

¹²A sa in ei bâng chu a tûk thlengin dah tûr a ni lo, a ruhte pawh pakhat mah titliak suh u; Kalhlên kût hman dân tûr tuk ang takin in hmang tûr a ni.

¹³Bawlhhlawh ni lo, ram hla taka zin pawh ni si lovin Kalhlên kût hi a hman duh loh chuan a mite zîng ata hnawh chhuah tûr a ni, a hun ruatah ka hnêna thilhlan a rawn hlan duh loh avângin a thil sual tih mawh chu a phur tûr a ni.

¹⁴“In zînga chêng hnam dangin Kalhlên kût hi a hman ve duh chuan a dân ang thlapin a hmang tûr a ni. Tu tân pawh, a khual a tualin, a hman dân tûr a thuhmun a ni,” a ti a.

¹⁵Biakbûk an din zawh ni chuan chhûmin a rawn khuh a, tlaiah chuan a tûk zîng thlengin mei anga êng a awm a.

¹⁶Chutiang chuan chhûmin a khuh a, zânah mei anga êng chu a awm ziah a.

¹⁷Chhûm a kian apiangin Israel-te chuan awmhmun an sawn a, chhûmin a rawn khuhna hmunah chuan awmhmun an khuar leh ṭhîn.

¹⁸LALPA thupêk ang zêlin bûk an sawn a, a thu vêkin bûk an khuar a. Chhûmin Biakbûk a khuh chhûng chu an awmna ngaiah an awm reng ṭhîn a ni.

¹⁹Chhûm chuan rei tak chhûng Biakbûk chu a khuh pawhin LALPA thu chu an awih a, an insawn lo.

²⁰A châng chuan Biakbûk chu chhûmin ni rei lo tê chauh a khuh pawhin LALPA thupêk angin an insawnin an insawn lo.

²¹Zan khat chauh, tlai aṭanga a tûk zîng thleng chauhva a awm châng a awm a, chhûm a kian veleh an insawn mai ṭhîn a ni.

²²Ni hnih khat mai emaw, thla khat dâwn lai emaw, kum khat emaw, a aia rei emaw Biakbûk chunga chhûm a awm chhûng chu an insawn lo, a kian veleh an insawn ṭhîn.

²³Mosia hnêna LALPA thupêk ang zêlin bûk an khuar a, awmhmun an insawn ṭhîn.