Read Mizo Lushai Mika 1 Bible Online

Mika 1 - Mizo Lushai bible

Mika 1

¹Judai rama Jothama te, Ahaja te, Hezekia te an lal laia Moreset khaw mi, Mika hnêna LALPA thu lo thleng, Samaria leh Jerusalem chungchâng a hmuh chu:

²Mi zawng zawngte u, ngaithla ula, Lei leh a chhûnga awm zawng zawngte u, ngaihven rawh u; Lalpa PATHIAN chuan a chênna hmun thianghlim aṭangin A dem che u a ni.

³En teh u, LALPA chu a chênna aṭangin a lo kal a, A lo chhuk ang a, lei hmun sângte a rawn rap ang.

⁴Mei bula khawihnûn a tui ṭhîn ang hian Tlângte chu a hmaah chuan an tui ang a, Awih panga tui a luang thlûr sung angin Kawrte pawh a siam seng sung ang.

⁵Hêng zawng zawng hi Jakoba bawhchhiatna avâng leh, Israel chhûngte sualna avâng a ni. Jakoba bawhchhiatna bul chu khawiah nge? Samaria khuaah a ni lâwm ni? Judai ram milem biakna te hi eng nge a bul? Jerusalem khua a ni lâwm ni?

⁶Chuvângin, Samaria chu khaw ram, bawlhhlawh chhêkkhâwmna hmunah ka siam ang a, Chutah chuan grepte an chîng ang. A lungte chu kawrruamah ka lum bo vang a, A lungphûmte pawh a chhe vek ang.

⁷An pathian lim zawng zawng ka tikeh sawm ang a, An thilpêk khâwmte pawh ka hâlral ang. An milem zawng zawng ka tichhe vek ang a, An nawhchizawrh hlawh khâwl khâwm chu, Mi dangin nawhchizuar lei nân an hmansak ang.

⁸Hei vâng hian lungngaiin ka ṭap ang a, Saruak ke lâwngin ka vâk ruai ang, Sihal angin ka û ang a, Vanghâwngsei angin ka râk tuar tuar ang.

⁹An hliam tuar chu tihdam rual a ni lo, Judai ram a lo thleng ve ta a, Ka mite chênna Jerusalem kawngka hial a lo thlen tâk hi.

¹⁰Gath khua chu eng mah hrilh suh u, An hriatah ṭap rêng rêng suh u. Beth-le-Afra mite u, vaivut zîngah tâl rawh u.

¹¹Safir hmuna chêngte u, saruak leh zak chungin kal zêl rawh u, Zanan hmuna chêngte chu an lo chhuak ngam lo va, Beth-ezel mite chu mangangin an rûm a, Chu chu in hriat chuan him rual a ni bîk lo tih in hria ang.

¹² LALPA hnên ata chhiatna nasa takin Jerusalem kulhkawngka a lo thlen tâk hial avângin Maroth hmuna mite chuan Chhan chhuah hun nghâkhlel takin an thlîr.

¹³Nangni, Lakis khaw mite u, Sakawr tawlailîr rual chu buatsaih peih diam rawh u, Nangni hi Zion fanu sualna bul in ni: Israel-te bawhchhiatna chu nangmahni aṭanga chhuak a ni.

¹⁴Tichuan, Moreset-gath chu thlahna thilpêk pe ula, Akzib chhûngkua chu Israel lalte bumtu an ni.

¹⁵Moresa mite u, nangmahni hnehtu ka rawn tîr dâwn, Israel mi huaisente chu Adulam-a pûkahte an biru ang.

¹⁶Mulukawlh lu ang maiin in fa duh takte sûnin in lu ziat fai rawh u, Salah an hruaisak dâwn si che u a.