Read Mizo Lushai Mika 2 Bible Online

Mika 2 - Mizo Lushai bible

Mika 2

¹An khumlaizâwla thil ṭha lo suangtuaha, Thil sual tih tumte chu an chung a pik e! Zînga khaw ên aṭangin a rem veleh thil ṭha lo an ti nghâl ṭhîn.

²Mi ram an awt a, an lâksak a, Inte an awt a, an chhuhsak zêl mai. An chhûngkuain an tiduhdah a, An rote nên tu mah an him lo.

³Chuvângin, LALPA chuan heti hian a ti: “He mite chhiatna tûr hi ka ruahman ta, An pumpelh lo vang, chapo takin an lêng tawh lo vang, An chhiatna hun a thleng dâwn si a.”

⁴Chumi ni chuan, “Kan ralthûm a ni ta dêr mai, Kan mite ram chanpual chu an sem darh a, Kan lote min chhuhsak a, Min pe kîr lovin sala min mantute a sem ta,” Tih hi nangmah deusawh nân ṭah hlaah an sa ang.

⁵Chuvângin, LALPA chuan pungkhâwmho zînga ram a sem hunah Chanvo i nei ve lo vang.

⁶‘Ṭawng suh,’ tiin min ṭawng khum a, “Chûng thu chu sawi teivet suh, Pathian chuan min timualpho lo vang,

⁷Israel chhûngte hi ânchhe dawng em an nih? LALPA Thlarau chuan dawhtheihna a tlachham ta em ni? Chûng thilte chu a ti duh ang maw? Dik taka khawsa ṭhînte hnênah Thil ṭha a thlen dâwn lâwm ni?” an ti a.

⁸Nimahsela, tûn maiah khân ka mite chu hmêlma angin in en a, Indona hmun aṭanga ngaihngam taka ina lo hâwte chu an puan leh kawr in hlihsak a.

⁹Ka mi, hmeichhiate chu, an in nuam tak ata in hnawt chhuak a, An fate hnêna malsâwmna ka pêkte chu in lâksak a.

¹⁰Tho ula, chhuak thuai rawh u, Hei hi in tân hmun râlmuang a ni lo, In khawlohna avângin he hmun hi tihchhiat vek a ni dâwn.

¹¹Mi dawthei leh bumhmang vâk vêlte chuan, ‘Uain leh zu kan pe ṭeuh vang che u,’ ti se, Chutiang mite chu he mite zâwlnei ni âwm lek an ni.

¹²Aw Jakob-ho, in vaiin ka hruai khâwm ngei ngei ang che u, Israel mi, la damte pawh ka la khâwm ngei ang. Phûla berâm tla dual dual leh Huanga an lawi dum dum angin ka hruai khâwm ang a, Tichuan, mipui an sa mur mur tawh ang.

¹³Kawng hawngtu chuan hma a hruai ang a, an lût hum hum ang. An lal leh hotu, LALPA chuan an hma a hruai ang a, Ani chu an innghahna a ni ang.