Read Mizo Lushai Mika 3 Bible Online

Mika 3 - Mizo Lushai bible

Mika 3

¹Nangni Jakoba chhûngte chunga hotute leh Israel-te zînga rorêltute u, ngaithla rawh u, Rorêl dân dik hre tûr in ni lâwm ni?

²Nangni thil ṭha huaa, thil sual ngainate u, Ka mite vun in lip a, an ruha tî in hlehsak a,

³Ka mite chu in ei a, an vun in lip a, An ruh te in titliak a, thlêngah in chan darh a, Bêla chhum tûrin an sa in chan sawm a.

⁴Chuvângin, LALPA chu au mah se a chhâng lo vang, Chutih hunah chuan an lakah a hmêl a thup zâwk ang. Thil sual an tih reng avângin.

⁵Ka mite hruaikawitu zâwlneite chungthu-ah LALPA chuan heti hian a ti: Ei tûr petu hnênah chuan, ‘A muanawm e,’ an ti a, Ei tûr pe duh lotu chu ensanah an vau a.

⁶Tichuan, inlârna awm lo, zân thim a thleng ang a, Hrilhlâwkna awm lo thimin a nang ang che u. Zâwlneite nî a liam ang a, an tân hun thim a lo thleng ang.

⁷Hmutheitute an zak ang a, hrilhlâwktute an mualpho vang, Pathianin a chhân loh avângin an vaiin zakin an kun reng ang.

⁸Kei erawh chu Jakoba bawhchhiatna leh Israel sual puang chhuak tûrin LALPA Thlarau chuan thiltihtheihna te, Dikna te leh chakna tein min thuam a.

⁹Jakoba leh Israel chhûngte chunga hotu leh rorêltu, Dikna ngainêpa, thu dik dâwta chantîr ṭhînte u, Hei hi hre rawh u:

¹⁰Zion chu thisenin in sa a, Jerusalem pawh suahsualnain.

¹¹Rorêltute chuan thamna beiseiin ro an rêl a, Puithiamte pawhin hlawh ûmin an zirtîr a, Zâwlneiten sum beiseiin thu an puang a; Chuti chung chuan ngaihngam taka LALPA ṭawng chhanin, ‘LALPA chu kan hnênah a awm a, Kan chungah chhiatna eng mah a thleng lo vang,’ an ti ṭhîn.

¹²Tichuan, nangmahni avângin Zion chu lo anga leh phut a ni ang a, Jerusalem pawh a chhe rem rum ang a, Tempul awmna tlâng chu ramhnuai a chang zo vang.