Read Mizo Lushai Mika 4 Bible Online

Mika 4 - Mizo Lushai bible

Mika 4

¹Ni hnuhnûnghahte chuan LALPA awmna tlâng chu Tlâng ropui ber a la ni ang a, Tlâng zawng zawng a khûm vek ang. Tah chuan mi tinrêng an lo kal duah duah ang.

²Hnam tam tak an lo kal ang a, heti hian an ti ang: ‘Hawh u, LALPA tlângah i chho vang u, Jakoba Pathian in awmnaah chuan, A kawng min lo kawhhmuh ang a, A kawngah chuan kan kal ang,’ Zion aṭangin dân chu a lo chhuak ang a, Jerusalem aṭang hian LALPA chuan thu a sawi ṭhîn a ni.

³Mi tin inkâr thu a rêl ang a, Hla taka hnam chak takte thu pawh a remsak ang. An khandaihte lei leh nân an chher ang a, An feite chu thei ṭang tanna kawmah an siam bawk ang. Hnam dang chungah hnam dangin hriam an lek tawh lo vang a, Indo dân pawh an zir tawh hauh lo vang.

⁴Mi tin mahni grep leh theipui hlimah an ṭhu ang a, Tu mah an hlau lo vang, Engkim LALPA chuan a ti.

⁵Hnam tinin mahni pathian ṭheuh an bia ang a, A thu an zâwm ang, Keini pawhin kan Pathian LALPA chu kan bia ang a, A thu kan zâwm kumkhua tawh ang.

⁶“Chumi ni chuan kebaite ka khâwm ang a, Saltângte leh ka hrem tuarte chu ka hruai khâwm ang,” Tih hi LALPA thuchhuak a ni.

⁷Kebaite chu hnam tundinna bul atân ka hmang ang a, Hnawh darhte chu hnam chak takah ka siam ang. LALPA chuan Zion tlângah chatuanin ro a rêlsak tawh ang.

⁸Aw nang, ran rual vênna in sâng, Zion fanute chênna tlâng, Tûn hmaa in ram chu in nei leh dâwn a, Jerusalem mite chu an ram pêk an ni leh dâwn.

⁹Engtizia nge i ṭah vak vak le? Lal i nei na nge? Remruatsaktu che chu a awm ta na nge? Hmeichhe nau vei angin natnain a man tâk che hi.

¹⁰Aw Zion fanu, hmeichhe nau vei angin tâl la, rûm rawh, Ramhnuaia awm tûrin khawpui chhuahsan rawh, Babulon-ah kal la, tah chuan i him ang. Chuta ṭang chuan LALPA chuan i hmêlmate kut ata a tlan chhuak ang che.

¹¹Hnam tam tak an pung khâwm ang a, an do rawn ang a, ‘Zion chu tibawrhbâng ila, i thlîr zui teh ang u,’ an ti.

¹²Mahse, LALPA rilru an hmu lo va, A remruat an hrethiam hek lo, Ani chuan hruiha chîl tûr buhphal angin Anni chu a seng khâwm ta si a.

¹³Aw Zion fanu, tho la, anni chu rap hrep rawh, Thîr ki ka pe ang chia, dâr tinkâwm ka pe bawk ang che, Chu chuan mi tam tak i tisawm vek dâwn nia. Mi thil an lâksakte chu LALPA hnênah rawn hlân ula, An sum leh pai te pawh lei pum pui neitu LALPA hnênah hlân ang che u.