Read Mizo Lushai Mika 5 Bible Online

Mika 5 - Mizo Lushai bible

Mika 5

¹Khawpui kulh chhûnga mite u, in sipaite kha khâwm rawh u, Min hual tâk hi, Israel hruaitu pawh a bekah tiangin an vuak dâwn hi.

²Nang Bethlehem, Efrata, Judai khawpui zîngah tê hle mah la, I chhûng aṭangin Israel rorêltu ka tân a lo chhuak dâwn si a, Ani chu hmasâng ata thlahtu bul aṭanga lo chhuak a ni.

³Nau veiin a hrin hma chu Lalpan a mite chu a hawisan ang, Tichuan, a unau la dam zawngte chu an lo kîr ang a, Israel zîngah an tel ang.

⁴Pathian LALPA hming ropui tak leh LALPA chakna chuan a mite chu A vêng ang a, a châwm ang, Lei pum puiah a ropui dâwn êm a, A mite chu thlamuang takin an awm ang.

⁵Hetiang hian remna a awm dâwn a ni: ‘Asuria-in kan ram an rawn rûn a, Kan kulhah te an lo luh pawhin vêngtu leh hruaitu tam tâwk nên ka lo do lêt ang.

⁶Asuria ram chu khandaihin an hneh ang a, Nimroda ram chuan khandaih hriam an tuar ang. Asuria-in kan ram an rûn a, ramri an lo thlen chuan, Ani chuan min chhanhim ang.

⁷Jakoba thlah la awm chhunte chu hnam tam tak tân LALPA hnên aṭanga daifîm tla, Thlai châwmtu ruah ang an ni ang. Mihringah an innghat tawh lo vang a, Tu mah an rinchhan tawh lo vang.

⁸Jakoba thlah la awm chhunte chu Hnamte leh mi tam tak tân Ramsa zînga sakeibaknei ang an ni ang a, Berâm rual zînga sakeibaknei vânglai A kalna apianga berâm seha pawtsawm ṭhîn, Tu ma ngam loh ang hi an ni ang.

⁹I hmêlmate chungah i kut i lek ang a, I hmêlma zawng zawng chu tihboral an ni ang.

¹⁰Chumi ni chuan in sakawrte ka lâk bosak ang che u a, In tawlailîrte ka tichhia ang,’ Tih hi LALPA thuchhuak a ni.

¹¹‘In ram chhûnga khawpuite ka tichhia ang a, In kulh zawng zawng ka tichim ang.

¹²In dawithiam ka tichhia ang a, Aienthiam in nei tawh lo vang.

¹³In milim te, lung serh in phun te ka tihchhiatsak ang che u a, In kutchhuakte chu chibai in bûk tawh lo vang.

¹⁴In pathiannu, Aseri lim in phunte chu Ka nam tlûksak ang che u. In khawpuite ka tichhe vek ang.

¹⁵Ka thu awih lo hnamte chungah chuan Thinur takin phuba ka la ang.’