Read Mizo Lushai Mika 6 Bible Online

Mika 6 - Mizo Lushai bible

Mika 6

¹Khai le, LALPA thu hi lo ngaithla teh u, Aw LALPA, i chungthu hi tlângte hrilh la, Mualten i thu sawi hi lo hre teh se.

²Tlângte u, LALPAN a mite a demna hi lo hria ula, Nangni, leilung nghahchhan hlunte u, ngaithla teh u. LALPA chuan a mite a dem a, Israel-te chu a khing ta.

³“Ka mite u, engtin nge maw ka lo tih che u le? Eng kawngin nge ka tihhah che u, Min chhâng teh u.

⁴Aigupta ram ata ka hruai chhuak che u a, In saltânna ram ata ka tlan chhuak che u a, In hruaitu atân Mosia te, Arona te, Miriami te ka rawn tîr a nih kha,

⁵Aw, ka mite u, Moab lal Balaka thil ruahman kha hre reng ta che u, Beora fapa Balaama chhânnate pawh kha, Sitim aṭanga Gilgal in thlen thlenga In thil tawnte kha hre reng ula, LALPA thil tih dikzia kha in hria ang.”

⁶ LALPA hmaah eng nên nge ka kal anga, Pathian Chungnungbera chu engtin nge chibai ka bûk ang? Bâwngno kum khat tling hâlral thilhlanah Ka hlân dâwn em ni ang?

⁷Berâm sâng tam tak leh hriak luipui sâng sâwmah te LALPA chu a lâwm dâwn em ni? Ka sual avângin ka fa tîr chu ka hlân ang a, Ka bawhchhiat manah ka rîla rah chu ka hlân ang maw?

⁸Aw mihring, thil ṭha chu a entîr tawh che a ni lâwm ni? LALPAN a phût che chu eng nge ni? Dik taka thil tih te, khawngaihna ngainat te, Thuhnuairawlh taka i Pathian nêna lên dun te hi a ni lâwm ni?

⁹I hming ṭih hi a finthlâk a ni, LALPA chuan khawpui chu ring takin a au va, ‘Khawpuia pung khâwm hnamte u, ngaithla rawh u,’ tiin.

¹⁰“Mi sualin an ina thil bawlhhlawh an chhêk khâwm te, Tehna dik lo an hmang te hi ka hua a ni.

¹¹Bûk ngul dik lo leh bûklung dik lo hmangtute chu Ka hrem ngei dâwn a ni.

¹²In mi hausate nun a râwng hle a, Mipui pawh dawthei, mi bum chîng in ni.

¹³In sualnate avângin na takin ka hrem ang che u a, Ka ti ṭiau vek ang che u.

¹⁴In ei ang a, in tlai lo vang, in ril a ṭâm reng ang. In chhêk khâwm ang a, in hum chuang lo vang, In khâwl sa pawh khandaihin ka tichhe vek ang.

¹⁵Thlai in chîng ang a, a rah in seng lo vang, Oliv in her ang a, a hriak in ei lo vang, Grep in sâwr ang a, a uain in in chuang lo vang.

¹⁶Omria awm dân angin in awm a, Ahaba chhûngkaw sualna zawng zawng in ti ve a, An awm dân in lâk avângin khawpuia awm zawng zawng, Ka tiboral vek ang a, Mite nuihzatbûr leh hmuhsit in ni ang.”