Read Mizo Lushai Mika 7 Bible Online

Mika 7 - Mizo Lushai bible

Mika 7

¹Ka mang a va ang êm! Nipui thei leh grep ṭo Zawngtu ang mai ka ni. Ka châk êm êm grep leh theipui hmin hmasa A awm tawh si lo.

²Leiah hian mi rinawm an awm tawh lo, Mi nun ngîl tu mah an awm tawh hek lo; Thisen chhuah tumin an inchâng ṭheuh va, Mahni unau pawh man tumin an inveh a.

³Thil sual tih an thiam hle a, Hruaituten thilpêk an phût a, Rorêltuten thamna an ngiat a, Thiltitheite an duh duhin an pâwt a, Chutiang ti tûr chuan an inlungrual a ni.

⁴An zînga mi ṭha ber pawh buar ang chauh a ni, Mi dik ber pawh hnimhlîngnei ang mai a ni. Anmahni vêngtuin a sawi lâwk tawh angin Hrem an tuar ni a lo hnai ta. Tûnah pawh an chiai ta hle a ni.

⁵I ṭhenawmte ring suh la, i ṭhian bulte chungah innghat suh, I nupui pawm lai ngei pawh eng mah hrilh suh.

⁶Fapain a pa a hmusit a, Fanuin a nu a pawisa lo va, Movin a pasala nu a do vang. Mihring hmêlma chu ama chhûngkaw zînga mi ngei a ni ang.

⁷Kei erawh chuan LALPA ka thlîr a, Min chhandamtu Pathian chu ka nghâk reng ang, Ka Pathian chuan ka aw a ngaithla dâwn si a.

⁸Ka hmêlmapa, min dichim suh, Tlu mah ila ka tho leh dâwn, Thimah awm mah ila LALPA chu ka êng a ni.

⁹ LALPA chungah thil sual ka tih avângin A zilhna tuar tûr rêng ka ni, Ka chungthu a rêl fel a, Ka dikna a târlan hma chu, Tichuan, êngah min la chhuak ang a, A felzia chu ka hmu ang.

¹⁰“Khawiah nge LALPA, i Pathian chu?” titu ka hmêlma chuan a hmu ang a, a zak hle ang; Ka mit ngeiin a tlu lai ka hmu ang a, Tuallaia chirhdiak angin an rap ang.

¹¹I kulh bangte din thar ni a lo thleng dâwn, Chumi ni chuan in ram china ruat chu tihzau a ni ang.

¹²Chumi ni chuan Asuria aṭang te, Aigupta khawpui aṭang te, Aigupta leh Eufretis lui inkâr aṭang te, Tuifinriat leh tuifinriat inkâr aṭang te, Tlângram hla tak tak aṭang te chuan i hnênah, I mite chu an lo kal ang.

¹³Ram luahtute thil sual tih mawh chu ramin a phur ang a, Ram chu a ṭiau vek ang.

¹⁴I mi, i ro chante chu, i tiangin vêng la, Ngaw hnuaia khawhar taka awmte chu Hnimhring hmunah hruai chhuak rawh. Tûn hma ang khân tlattîr ang che.

¹⁵Aigupta ram aṭanga in lo chhuah lai nite ang khân, Anni chu ka thil tih mak ka hmuhtîr ang;

¹⁶Ropui hle mah se hnamte chuan an hmu ang a, An hrilh a hai hle ang. An kâ an hup ang a, An bengte pawh an tingawng ang.

¹⁷Rûl angin vaivut an liak ang a, Leia rannung bawkvâka kalte ang mai an ni ang. An kulh aṭangin thlabârin an lo chhuak ang a, LALPA, kan Pathian chu, an rawn pan ang, An hlau êm êm ang che u.

¹⁸Nang anga sualte ngaidama, Rochan la awmte khawlohna la bo ṭhîn. Pathian dang an awm em? Nang zawng, i thinur reng lo va, Khawngaihna lantîr hi i lâwmzâwng tak a ni.

¹⁹Kan chungah ngilneihna i lantîr leh ang a, Kan sual zawng zawng min hnehsak ang a, Kan khawlohna zawng zawng Tuifinriat mawngah i thlâk dâwn si a.

²⁰Hmasânga kan pute hnêna i tiam tawh ang khân, Jakoba lakah i rinawm a, Abrahama chungah khawngaihna i lantîr ta.