Read Mizo Lushai Nahuma 1 Bible Online

Nahuma 1 - Mizo Lushai bible

Nahuma 1

¹Ninevi chungthu, Elkosa mi Nahuman inlârna a hmuh chu:

² LALPA chu Pathian thîkthuchhia, phuba lâk hmang a ni, LALPA chuan thinur takin phuba a la ṭhîn, LALPA chuan amah dotute a thungrûl ṭhîn, A hmêlmate tân thinurna a khâwl khâwm.

³ LALPA chu a dawhthei a, thiltithei tak a ni, Thil sual tite chu hrem lohvin a chhuah lo vang; Ṭhâwngaleivîr leh thlipuite hi LALPA kalkawng a ni a, chhûm hi vaivut a pal khûk a ni.

⁴Tuipui a hau va, a kang ta a, Luite pawh a kang zo ta, Basan ram leh Karmel tlâng a ro va, Lebanon tlâng mawitute chu a chuai zo ta.

⁵A hmaah tlângte an nghîng dur dur a, Mualte pawh an tui zo va, A hmaah chuan lei hi a khûr dur dur a, Khawvêl leh a chhûnga chêng zawng zawngte nên chuan.

⁶A thinrim chu tu nge tuar zo vang? A thinur nasa tak chu tu nge dâl thei? A thinrim chu mei angin a leihbua a, Lungpuite pawh a hmaah chuan an kehsawm ṭhîn.

⁷ LALPA chu a ṭha a ni, Mangan nia himna kulhpui, Amah ringtute ngaihsak ṭhîn a ni.

⁸Tuilian so bulh bulhin thil a tichhia ang hian, Ninevi khua chu a tichhe vek dâwn. A hmêlmate chu hmun thimah chuan a ûm lût vek ang a,

⁹Engati nge LALPA do zâwnga thil in ngaihtuah? A tiboral vek dâwn che u asin, Dodâltu tûr rêng in awm tawh lo vang.

¹⁰Hlîng anga awmin, zu nên nuam tâwl ṭhîn mah se, Buhpâwl ro angin an kâng ral vek ang.

¹¹In zîng aṭangin mi pakhat, LALPA dodâl zâwnga Remruatna sual ngaihtuahtu a lo chhuak ta.

¹² LALPA chuan heti hian a ti: “Asuria-ho chu inthurualin tam hle mah se, An tlâwm ang a, an chhe vek ang. Ka mite u, tirethei ṭhîn che u mah ila, Ka tihrehawm tawh lo vang che u.

¹³A nghâwngkawl i bah chu ka titliak ang a, A phuarna hrui chu ka tichat ang.

¹⁴I chungthu-a LALPA thupêk chu hei hi a ni: I hming putu tûr thlah i nei lo vang a, I pathian biaknaa milem ker leh milim chhûnte chu ka tichhe vek ang a. I sual êm avângin i tân thlân ka buatsaih ta.

¹⁵En teh, tlângahte chanchin ṭha thlena, Remna thu puangtute ke chu! Aw Juda, i kûtte chu hmang la, I thutiamte chu hlen rawh, Mi sualpa chuan a pal tlang tawh lo vang che, Tihboral daih a ni ta e.”