Read Mizo Lushai Nahuma 3 Bible Online

Nahuma 3 - Mizo Lushai bible

Nahuma 3

¹Thisen chhuahna khawpui, dâwta khat, Râllâk sum chhêk khâwmna, Bâng lova inrawkna hmun chu A chung a pik e.

²Chu! Tiang hlap ri te, tawlailîr thâwm te, Sakawr tlân ri khup khup te, Sakawr-tawlailîr ri bawp bawp te chu!

³Sakawr chungchuangten an rawn bawh a, Khandaih an lek zawr zawr a, An fei vilik chu a de zawk zawk bawk a, Thi leh hliam an let phung a, Ruang a intiang vûm thûr a, Ruangah chuan an inpal tlu nawk nawk mai.

⁴Chûng thilte chu nawhchizuarnu sual vânga lo awm a ni, Nu hmêlṭha tak, mi lêm thiam tak a ni. Hnam dangte dawi â-a, bawiha siamtu a ni.

⁵Engkim LALPA thuchhuak chuan heti hian a ti: “Ka hmêlmâk che a ni, I hmai thlengin i pawnfên ka hlîm ang a, Hnam tinin i saruak chu an hmu ang a, Ram tinin i zahpui chu an hmu bawk ang,

⁶Bawlhhlawh tenawm ka theh ang che a, Tenawmah ka siam ang che, Hmuh tlâk lohvah ka siam dâwn che.

⁷A hmu che apiangin an tlânsan ang che a, ‘Ninevi chu a chhe zo ta, tu nge sûn ang le? Thlamuan tûr che khawi aṭangin nge kan hmuh tâk ang?’ An ti ang.

⁸Nail lui kama awm, tui hual vêl, Thebes khua aiin i chan a ṭha zâwk dâwn em ni?

⁹Ethiopia leh Aigupta chu a chakna hnâr a ni a, A duh duha a tih theih an ni; Put leh Libua pawh a lamṭang an ni.

¹⁰Chuti chung chuan sala man leh ram danga hruai bo an ni a, Kawtthlêr pêng ṭhuamah an nautête chu Lei vuak nân an hmansak a, Ṭhumvâwrin an miliante an insem a, An mi ropui zawng zawng khaidiatin an hlîng bawk.

¹¹Nang pawh i rui ang a, i let dêr ang, I hmêlmate laka phen tûr i zawng ruai ang.

¹²I kulh zawng zawng pawh Theipui hmin hmasa sâwi ṭilh, A eitu kâa tla lût ang hi a ni ang.

¹³I sipaite pawh hmeichhia ang an ni, In ram luhnate chu hmêlma tân a inhawng huai a, A kawngkalhna thingtlâwnte pawh meiin a kâng ral ta,

¹⁴An hual dâwn che, tui chawi khâwl la, Kulhte tinghet rawh, Lei chîl diak la, leirawhchan tûr hlum tlang Siam peih diam rawh.

¹⁵Chutah chuan meiin a kâng ral ang che a, Khandaiha thah i ni ang. Khauvin thlai a ei ral ang maiin an ei ral ang che. Khau angin pung khâwm rawh u, Thlai eitu khaukhuap ang maia tamin.

¹⁶Vâna arsi aia tam sumdâwngten an bâwr che a, Mahse, khau angin thla an zâr ang a, An thlâwk bo vek ang.

¹⁷In hotute chu khau ang lek an ni; In vêngtute pawh khau rual; Khaw vawh nia banga fu khâwm, Ni a lo lana thlâwk bo leh ta ang mai hi an ni. Khawiah nge an awm tâk tu man an hre tawh lo.

¹⁸Aw Asuria lalpa, nangmah vêngtute an muhîl a, I miropuite an tlu zo ta. I mite pawh tlângah an tlân darh a, Hruai khâwm leh tûr tu mah an awm tawh si loh hi â.

¹⁹I nâ hi engtin mah tihdam theih a ni lo, Hliam i tuar hi na tak a ni. I chanchin hria apiangin lâwmin kut an ben khum che, Suahsual i bâwl ṭhin kha, tu nge tuar lo awm?”