Read Mizo Lushai Habakuka 1 Bible Online

Habakuka 1 - Mizo Lushai bible

Habakuka 1

¹Inlârnaa zâwlnei Habakuka thil hmuh chu:

²Aw LALPA, min pui tûrin ka auh che hi, Eng chen nge, min ngawihsan dâwn? ‘Mi sualten mi vaw hlum takngial dâwn,’ tia ka auh che pawhin, Engati nge min chhân loh?

³Engati nge dik lo taka thil an tih min hmuhtîra, Râwng taka an che i ngaihtheih zêl le? Inrawk leh invuak a hluar a, Inhau leh invelh a tam hle hi.

⁴Dam hian awmzia a nei tawh lo va, Dikna a lal tawh hek lo. Mi sualten mi dikte an dinchan khalh a, Chuvângin, dik taka thil tih a ni ta lo.

⁵In vêla hnamte hi thlîr kual ula, En ngun teh u, Mak in ti hle ang, In hriat pawha in awih loh tûr, In hmuh phâkah thil ka tih dâwn hi.

⁶Ngai teh, Kaldai mite chu ka chawk tho dâwn a, Hnam kawlhsen leh thinram tak, Mi ram neihsak tuma ram tina vâkvêl ṭhînte chu!

⁷An hlauhawmin an ṭihbaiawm hle mai, Chapo takin duh duhin an che.

⁸An sakawrte pawh keite aiin an chak a, Thimhlim chinghniate ai pawhin an hlauhawm.

⁹An sakawr chuang mite chu ram hla tak aṭangin Chak takin an lo tlân dur dur a, Mupui âr la tûr bir angin an chak.

¹⁰Mi rûn tûra lo kal an ni vek a, An thâwm hria apiang an thlabâr a, Ṭiauvaivut anga tam sal an man.

¹¹Lalte an palzût a, miliante pawh an nuihzat a, Kulhte lah engah mah an ngai lo, Lei an chhûng pâwng a, an la zêl mai.

¹²Hmân ata tawh Pathian thianghlim, nung reng, LALPA chu i ni lo vem ni? Aw LALPA, anni chu min hrem tûra i ruat an ni a, Aw kan kulhpui, min thununtu atân i ruat an ni.

¹³I mitte chu a thianghlim êm êm a, Thil sual i en reng thei si lo va. Engati nge vervêk taka tite i ngaihtheih viau si? Mi sualten an aia ṭhate an tihduhdah laia Engtizia nge i ngawih reng mai le?

¹⁴Engtizia nge mihring hi tuipui sangha ang leh Rannung bawkvâka kal lal nei lote ang leka i siam ni le?

¹⁵Kaldai-ho chuan mite nghakuaiin an âwk a, Lênin an khuh a, lênkhangin an fûn a, An hlim êm êm lehnghâl a.

¹⁶Tichuan, an lênte chu chibai an bûk a, An lênkhang hnênah inthawina an hlân a, Ei tûr an hmuhna leh nuam an tâwl theihna a nih avângin.

¹⁷Tichuan, an lênte chu tiruak zêlin, Hnamte chu lainat hauh lovin an that zêl dâwn em ni?