Read Mizo Lushai Habakuka 2 Bible Online

Habakuka 2 - Mizo Lushai bible

Habakuka 2

¹Ka vênbûkah ka lâwn ang a, Ka hnêna a sawi tûr nghâkin awmhmun ka rem teh ang.

² LALPA chuan heti hian min chhâng a: “Inlârna thu chu lungphêkah ziak rawh, Tlân pah pawha chhiar theih khawpa chiangin ziak rawh.

³He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo.

⁴En teh, mi chapo chuan a sual avângin a tuar ang a, Mi dik erawh chu a rinawm avângin a him ang.

⁵Zu hian mi a bum ṭhîn, Mi chapo chu a awm hle hle thei lo va, A duhâmzia chu Seol anga zau a ni, Thihna angin chin lêm a nei lo va, Hnam tin hruai khâwma, Mi zawng zawng la khâwm ṭhîntu chu.

⁶Mite chuan tiel leh hmusit takin ‘Rûkrûka intihausa chu a chung a pik e, Mi neih chhuhsakin eng chen nge i intihhausak dâwn le?’ An lo ti ang.

⁷I leibatnate chuan an rawn ṭhîng thut ang che a, An rawn timangang hle ang che, An kut i tuar mai ang.

⁸Hnam tam tak i rawk a, Mi thisen i chhuah a, ram i suasam a, Khawpui leh a chhûnga chêngte i tiboral a. Chuvângin, a thi bângte chu i chungah an ṭuan ve ang.

⁹Dik lo taka sum leh pai hai lûta, Mi sual kut tuar hlauva in ṭha pui pui satu chu A chung a pik e.

¹⁰Hnam tam tak tihral i tum hi, In chhûngkaw mualphona tûr a ni, Nang ngei pawhin i tuar phah ang.

¹¹Bang aṭangin lungten an au khum ang che a, Khanchhukte chuan an lo chhâwn ang.

¹²Khaw siam nâna thisen chhuaha, Khawpui din nâna sualna hmangtu chung chu a pik e.

¹³Kâng ral mai tûr in sa-in mite an thawkrim a, Hnamte pawh thil sâwt lovah an intihah a, Chûng chu Engkim LALPA ruat a ni.

¹⁴Tuifinriat hi tuiin a khat vek angin, Lei pum puiah LALPA ropuizia an hria ang.

¹⁵Tihmualpho tuma mahni ṭhiante An ruih hnêp thlenga in tûr petu chu A chung a pik e.

¹⁶Nang pawhin i in ve ang a, i mualpho vang, I rui ang a, i pai i pai ang. Mi zahawm chu nuihzatbûr i ni ang a, LALPA hremna chu i tuar ngei ang.

¹⁷Ramsa i tihlum a, an ṭi zo va, Mihring thisen i chhuah a, Ramah te, khawpuiah te, a chhûnga chêng chungahte Tharum i thawh a. Chutiang bawkin i chungah an ti ve ang.

¹⁸Chher chawp milem hi eng nge a ṭangkaina? Themthiam kutchhuak mai a ni, Eng mah a ni lo, A siamtu chuan ama kutchhuak ngei Milim, ṭawng thei hlei lo chu innghah nân zu hmang ta a!

¹⁹Thingtum hnêna, ‘Tho teh,’ ti a, Lungtum, ṭawng thei lo hnêna, ‘Ding teh,’ titu chu A chung a pik e. Rangkachak leh tangkaruaa luan, Nunna nei lo milem chuan a zirtîr ang che maw?

²⁰ LALPA chu a in thianghlimah a awm a, Lei pum pui hi a hmaah ngawi ṭhiap rawh se.”