Read Mizo Lushai Habakuka 3 Bible Online

Habakuka 3 - Mizo Lushai bible

Habakuka 3

¹Fakna hla, Zâwlnei Habakuka ṭawngṭaina:

²Aw LALPA, i thâwm ka lo hriatin hlauhawm ka va ti êm! Aw LALPA, hmâna i thiltihte ang kha han ti leh teh, Kan hun lai ngei hian han ti leh ang che, Thinur hle mah la, min khawngaih ang che.

³Pathian chu Teman aṭangin a lo kal a, Mi Thianghlima chu Paran tlâng aṭangin. (Selah) A ropuina chu vânah a khat a, Lei hi amah faknain a khat ta.

⁴A ênzia chu ni ang a ni a, A kut aṭangin ni zung a lo chhuak a, Tah chuan a ni a thiltihtheihna a thuhrûk.

⁵Hripuiin a hma a hruai a, Thihnain a rawn zui.

⁶A han ding a, lei a tinghîng a, A hawi vêl a, hnamte an khûr, Tlâng hlunte chu a kehsawm a, A lênna ṭhin mualte pawh chu A pil zo ta.

⁷Kus mite puan in chhe rem rum chu ka hmu a, Midian-ho chênna pawh a chul zo ta.

⁸Aw LALPA, luite chuan an tithinrim che em ni? Luipuite leh tuifinriatte chuan an tithinur che em ni? I sakawr, hnehna tawlailîr chunga i chuan tâk le?

⁹I thalngul chu i phawrh a, Thalte pawh a hruiah i vuah ta. Luikawr atân lei chu i kâp khi phawk a,

¹⁰Tlângte chuan an hmu che a, an hlau va, Tuite an luang darh chum chum a, Tuithûkpui chu a ri hum hum a, Sâng tak takin a invawrh.

¹¹I thal lêng nuai nuai leh i fei de zawr zawr avângin, Ni leh thla chu an chesawn ngam lo.

¹²Thinurin lei i fang chhuak a, Thinrimin hnamte i chîl ta hrep a.

¹³I mite chhan tûrin i lo thawk a, I hriak thiha chhan tûrin, Mi suaksualte hotu chu i sawisa a, Ke lêr aṭangin chhîp thlengin a silhfên i hlihsak a. (Selah)

¹⁴A rûka mi retheite ei zawh nuam titu, Ṭhawngaleivir anga min tihchhiat tuma lo thawk Hotupa chu a feiin i chhun ta a.

¹⁵I sakawrte nêna tuipui in han dai chuan A phuan ta buah buah a.

¹⁶Ka han hriat chuan tirilah ka khûr a, Ka kha a inkhâwng a, ka thauvah a man a, Ka ke a phet ta a. Min rûntute a rawn hremna ni chu Ngawi rengin ka nghâk ta a.

¹⁷Theipui rah lovin grep rah dâwn lo mah se, Oliv pawh rah lovin lovah eng mah thar dâwn lo mah se, Huanga berâm bo zovin, ran in ruak vek mah se,

¹⁸Lalpa chungah chuan ka lâwm zêl ang a, Min chhandamtu Pathian chu ka fak zêl ang.

¹⁹Lalpa PATHIAN chu mi tichaktu a ni, Sakhi ke angin ka ke a tichak a, Hmunsâng takah min lêntîr ang.