Read Mizo Lushai Zephania 1 Bible Online

Zephania 1 - Mizo Lushai bible

Zephania 1

¹Judai ramah Amona fapa Josia a lal laiin, Zefania hnênah LALPA thu a lo thleng a. Ani chu Hezekia thlah, Amaria fapa Gedalia fapa, Kusa fapa a ni.

²“Lei chunga thil awm zawng zawng ka tiboral vek dâwn,” Tih hi LALPA thuchhuak a ni.

³“Mihring leh ramsa ka tiboral vek ang a, Chunglêng sava leh tuifinriat sanghate pawh; Mi sualte ka inchhuihthlûktîr ang a, Lei ata mihring ka nuai bo vang,” Tih hi LALPA thuchhuak a ni.

⁴“Juda-ho chungah kut ka thlâk ang a, Jerusalem-a chêng zawng zawng chungah pawh; Baal hnuhma zawng zawng he hmun ata hi Ka paih chhuak vek ang a, Milem puithiamte hming pawh Tu man an hre reng tawh lo vang.

⁵Ni te, thla te, arsi te in chung zâwla biaa, LALPA chibai bûka, a hnêna thu tiam sia, Milkoma hnêna chhia chham leh site leh

⁶ LALPA hawisana zui duh lote, LALPA zawng lova amah râwn duh lote, Ka tiboral ang.”

⁷Lalpa PATHIAN hmaah chuan ngawi ṭhiap rawh u, LALPA ni chu a hnai ta si a. LALPA chuan inthawina a buatsaih zo va, A mi sâwmte pawh a tithianghlim ta.

⁸“LALPA inthawina ni-ah chuan Hotu te, lal fa te, hnam dang tih dân latute ka hrem ang.

⁹Chumi ni-ah chuan milem biate tih dân anga Kawngka bul zuan khûmtu te, Mi thil an chhuhsak leh rûka An pathian in tikhattute chu ka hrem ang.

¹⁰Chumi ni chuan Jerusalem-a Sangha Kawngkaah An ṭap chuah chuah ang a, Vêngtharah pawh mangangin an au vang a, Mualahte chuan an chiau vawng vawng ang,” Tih hi LALPA thuchhuak a ni.

¹¹“Dâwr hmuna awmte u, ṭap vak rawh u, Sumdâwngtute an awm tawh dâwn si lo, Tangkaruaa sumdâwngtute pawh an awm ta lo.

¹²Chutih hunah chuan Jerusalem chu khâwnvâr chhiin, Zu ṭawk tawh anga awm mai mai, Inchhuang taka titute chu ka vai khâwm ang a, ka hrem ang. ‘LALPA chuan thil chhia emaw, thil ṭha emaw a ti lo vang.’

¹³An sum an rawksak vek ang a, An inte pawh a ram ang, Inte sa mah sela an luah lo vang, Grepte phun mah sela, a tui an in lo vang.”

¹⁴ LALPA ni ropui a lo thleng dâwn ta, A hnai hle tawh a, a lo thleng ṭêp a ni. LALPA nia thâwm chu a râpthlâk êm a, Mi huaisente pawh an ṭê tuar tuar ang.

¹⁵Chumi ni chu thinurna ni, lungngaihna leh manganna ni, Buai ni leh chhiat ni, thimna leh nguina ni, Khaw dur leh thim chhah mup thlen ni a ni ang.

¹⁶Khawpui kulh leh in sângte bei tûra tawtawrâwt ri tuar tuar leh indo au thâwm awm ni a ni ang.

¹⁷Mite chu nasa takin ka timangang ang a, Mitdel angin an kal ang; LALPA laka an sual avângin An thisen chu vaivut leihbuak angin a baw nuai ang a, An ruang pawh bawlhhlawh awm khâwm nûlh ang a ni ang.

¹⁸ LALPA thinur lo thlen ni-ah chuan, An tangkarua leh rangkachakte chuan a chhanhim thei lo vang a, A thinurna mei chuan lei pum pui a kâng ral vek ang. Lei chunga awm zawng zawng tân, Tâwp thutna a thleng ang.