Read Mizo Lushai Zephania 2 Bible Online

Zephania 2 - Mizo Lushai bible

Zephania 2

¹Zah nachâng hre lo hnamte u, In-au khâwm ula, pung khâwm rawh u;

²Buhsi anga len bo in nih tûr hun ruat thlen hma, LALPA thinur na tak in chunga a lo thlen hma leh LALPA thinrimnain a nan hma che u hian.

³Ram chhûnga mi tlâwm, a thupêk zâwmtute chuan LALPA chu zawng rawh u, Dik takin ti ula, thuhnuairawlh takin awm rawh u, LALPA thinur ni-ah chuan in him mial mahna.

⁴Gaza khua an rauhsan ang a, Askelon pawh a chhe vek ang. Asdod mite chu chhûn laiah an ûm chhuak ang a, Ekron khaw mite pawh an kawi chhuak vek ang.

⁵Tuipui kama chêng, Keriot mite u, In chung a pik e! LALPAN in chungthu a sawi hi: Filistia mite chênna Kanan ram chu, luahtu awm lo khawpin ka tichhe vek ang a,

⁶Tuipui kamte chu a hnim vek ang a, Berâm huang leh berâmpute bûk khuarna hmun a ni ang.

⁷Juda hnam thi bângten chûng ram chu an nei ang a, An berâmte chu an tlattîr ang. Zânah Askelon mite in ruakah an riak ang a, LALPA an PATHIAN-in a duhsak ang a, A tihmuingîl leh ang.

⁸Moab mite chapozia te, Amon mite an chhiatziate ka hria a, An ram chhuhsak tuma chapo taka ka mite an vau dânte pawh ka hre reng a ni.

⁹Engkim LALPA, Israel-te Pathian chuan heti hian a ti: Moab chu Sodom angin a chhia ang a, Amon mite pawh Gomora mite ang an ni ang. An ram chu chi leilung, kângṭhaia khat, Eng atân maha tlâktlai tawh lo a ni ang. Ka mi, thi bângten an rûn ang a, Ka hnam zînga la dam chhunten an neihsak ang.

¹⁰An chapo man an hmu dâwn, Engkim LALPA mite an hmuhsita an nuihzatbûr avângin.

¹¹ LALPA chu an tân ṭihbaiawm tak a ni ang. A ni, lei chunga pathian zawng zawng chu a hrêk chau vang a, Tuipui kama chêng hnam tinrêng ten Amah chu mahni hmun ṭheuhvah chibai an bûk ang.

¹²Nangni, Ethiopia mite pawh Ka khandaiha thah in ni ang.

¹³Hmâr lam ram chungah a kut a lek ang a, Asuria chu a tichhia ang; Ninevi khua pawh a tiṭiau vek ang a, Thlalêr ramrovah a chantîr ang.

¹⁴Chutah chuan ranrual leh sa tinrêng, A rualin an bawk ang a, Thlalêr chhimbuk leh hrângkirte chu, Ban chhîp bâwkah an riak ang a, Tukverhahte an hrâm ang a, Kailâwnahte choak an fu ang a, Sidar thing inte pawh a chhe rem rum ang.

¹⁵Hei hi khawpui chapo, pawisak nei lo, ‘Kei aia chak tu nge awm?’ ti rilru ṭhîntu awm dân chu a ni. Mahse, heti khawp hian a chhe ta si a, Ramsate riahhmun mai a lo ni ta, A hmu apiangin diriam takin an chek khum tlawk tlawk ang.