Read Mizo Lushai Zephania 3 Bible Online

Zephania 3 - Mizo Lushai bible

Zephania 3

¹“Hel hmang leh bawlhhlawh, Hnehchhiah chîng khawpui chu, A chung a pik e!

²Zilhna a pawm lo va, a ngaithla duh lo, LALPA a ring lo va, a Pathian chu a hnaih duh hek lo.

³Khaw hotute chu sakeibaknei rûm ang an ni a, Rorêltute pawh chinghne koham ang an ni, A tûk atân eng mah an khêk thei lo.

⁴Zâwlneite chu an ngaih a sam a, bum an chîng a, Puithiamte pawhin thil thianghlim an tibawlhhlawh a, An duh duhin Dân chu an bâwlzân a.

⁵A chhûnga awm LALPA chu a dik a, thil sual a ti ngai lo, Tûk tin khêl lovin dik takin ro a rêl ṭhîn. Mi sualte erawh chuan zah nachâng rêng an hre lo.

⁶Hnamte chu ka nuai bo va, an kulh bang ka tichhia a, An kawtthlêrte ka tiram a, tu man an tlawh tawh lo vang. An khawpuite chu a chhe ta a, A ruak vek a, tu mah an chêng tawh lo vang.

⁷‘Anni chuan min ṭih ang a, zilhna an pawm ang a, Khaw chhûnga chêngte chu ka tiboral lo vang, An chunga tih ka tum pawh ka ṭhulh ang,’ Ka lo ti a; mahse, suahsual bâwl zui zêl an duh ta zâwk a ni.

⁸Chuvângin, hnamte ka chachhuah ni chu lo nghâk rawh u,” Tih hi LALPA thuchhuak a ni. “Ka tum chu hei hi a ni: Hnam te, lal ram te ka ko khâwm ang a, An chungah ka thinur, ka thinurna mei sa tak chu ka leih ang, Ka thîkna mei chuan khawvêl pum hi a kâng ral ang.

⁹Chutih hunah chuan mite hmui chu ka tidanglam ang a, An vaiin LALPA hming chauh an lam ang a, Rilru hmun khatin a rawng an bâwl ang.

¹⁰Mi be ṭhîntu, Ethiopia lui râla darhhote chuan, Ka tân thilhlan an rawn keng ang.

¹¹Chumi ni chuan ka chunga in bawhchhiatna thiltihte chu In zahpui tawh lo vang a, In zîng ata mi chapo, induh tak takte chu ka la bo dâwn si a, Ka tlâng thianghlimah chuan chapo takin in awm ngai tawh lo vang.

¹²In zînga mi tlâwmte leh mi hnuaihnungte chu ka hum ang a, LALPA hming chu an tân himna a ni ang.

¹³Israel zînga la damte chuan thil sual an ti lo vang a, Dâwt an sawi lo vang a, Bum an chîng tawh hek lo vang. An eiin an in ang a, thlamuang takin an awm tawh ang.”

¹⁴Aw, Zion fanu, hlim takin zai la, Aw Israel, ring takin au rawh. Jerusalem fanute u, in thinlung zawng zawngin lâwm rawh u.

¹⁵ LALPA chuan a hremna tûr che u a la bo ta, I hmêlmate a hruai bo ta, LALPA, Israel lal chu, in zîngah a awm a, Thil ṭha lo i hlau tawh lo vang.

¹⁶Chumi ni chuan Jerusalem hnênah, ‘Aw Zion, hlau suh, I kutte chu zawi suh se,’ an ti ang.

¹⁷LALPA, i Pathian, hnehtu huaisen chu i hnênah a awm a, I chungah a lâwm êm êm a, A hmangaihna chuan i nun a tithar ang, Zîng taka zaiin i chungah a lâwm ang.

¹⁸I mi, kût hmang pha ve lova mangangte chu ka hruai khâwm ang a, Tichuan, sawichhiat an ni tawh lo vang.

¹⁹“Chumi hunah chuan nangmah tiduhdahtu zawng zawng chu, An chungchâng ka ngaihtuah ang a, Kebaite pawh ka chhan chhuak ang a, Hnawh darhte ka khâwm ang a, Ram tina mualpho taka awm ṭhînte kha, Hming mawi an nei ang a, mi tinin an hria ang.

²⁰Chumi hunah chuan ka hruai khâwm ang che u a, Ka hruai haw ang che u. Leia mi zawng zawngin an hmu ang che u a, An chawimawi ang che u. Ka chawimawi ang che u. Ka tihhmuingîl leh ni che u chu In mit ngeiin in hmu ang,” LALPA chuan a ti.