Read Mizo Lushai Hagaia 1 Bible Online

Hagaia 1 - Mizo Lushai bible

Hagaia 1

¹Lal Daria lal kum hnihna, thla rukna, ni khat ni chuan LALPA thu zâwlnei Hagaia hmangin Sealtiela fapa Zerubabela, Judai ramawptu hnênah leh Jehozadaka fapa Josua, Puithiam lalber hnênah a lo thleng a.

²Engkim LALPA chuan heti hian a ti: “Hêng mite hian, LALPA In sak a la hun rih lo ve, an ti,” tiin.

³Tichuan, LALPA thu chu zâwlnei Hagaia hnênah a lo thleng a.

⁴“Ka in a chhiat rem rum laia, nangni, in ṭha leh nuam tak taka in chêng hi a dik em ni?” tiin.

⁵Engkim LALPA chuan heti hian a ti: “In awm dân hi ngun takin chhût teh u.

⁶Tam tak in chîng a, tlêm tê in thar a; in ei a, in tlai si lo; in sin a, in lum si lo, inhlawhfa hlawh chu ip pawpa thlâk ang mai a ni.”

⁷Engkim LALPA chuan heti hian a ti, “In awm dân hi ngun takin chhût teh u.

⁸Tlângahte han kal ula, thing han la ula, Tempul chu sa rawh u. Chu chu ka lâwmzâwng tak a ni; tichuan, chawimawiin ka awm dâwn nia,” LALPA chuan a ti.

⁹“Tam tak seng in beisei a, en teh u, a lo tlêm hle si. Ina in rawn hawn pawh ka lo chhêm darh a. Eng vângin nge?” tih hi Engkim LALPA thuchhuak a ni. “Mahni in sa-in in buai ṭheuh va, ka in chu chhe rem rum a, in hlamchhiah vâng a ni.

¹⁰Tichuan, nangmahni avângin vân daifîm a tla lo vang a, leiin thlai rah a chhuahsak hek lo vang che u.

¹¹Ram pumah khua ka tikhêng ang a, tlâng te, buh te, grep te, Oliv te a ro zo vang a, leia thil ṭo zawng zawng te, mihring te, ram te leh in thil chîn zawng zawng chuan an tuar ang.”

¹²Sealtiela fapa Zerubabela te, Jehozadaka fapa Josua, Puithiam lalberte leh mi la awm zawng zawngte chuan, LALPA, an Pathian thu, zâwlnei Hagaia thute chu an zâwm a. Ani chu LALPA, an Pathian tirh a ni a; tichuan, mipui chu LALPA hmaah chuan an zâm ta a.

¹³Mipuite hnênah LALPA chuan, “In hnênah ka awm zêl dâwn,” a ti.

¹⁴Tichuan, LALPA chuan Sealtiela fapa Zerubabela, Judai ram awptu te, Jehozadaka fapa Josua, Puithiam lalber te leh mi la awm zawngte rilru chu a chawk tho ta a.

¹⁵Lal Daria lal kum hnihna, thla rukna, ni sawmhnih leh pali ni chuan Engkim LALPA, an Pathian In sa ṭan tûr chuan an lo thawk ta a.