Read Mizo Lushai Hagaia 2 Bible Online

Hagaia 2 - Mizo Lushai bible

Hagaia 2

¹Thla sarihna, ni sawmhnih leh pakhat ni chuan LALPA thu zâwlnei Hagaia hnênah hetiang hian a lo thleng a:

²“Sealtiela fapa, Zerubabela, Judai ram awptu hnênah te, Jehozadaka fapa Josua, Puithiam lalber hnênahte leh mi la awm zawng zawng hnênah te heti hian thu sawi rawh:

³“Tûn hmaa he in ropui lai hmu phâk in zîngah tu nge awm? Tûna mi hi eng nge ang in tih? Nêp in ti hle e lo?

⁴Nimahsela, nang Zerubabel, ṭan la rawh,” tih hi LALPA thuchhuak a ni. “Jehozadaka fapa Josua, Puithiam lalber, nang pawh ṭan la rawh. Nangni, ram chhûnga mi tinrêngte u, ṭan la rawh u,” tih hi LALPA thu chhuak a ni. “Thawk zêl ula, in hnênah ka awm reng ang,” Engkim LALPA chuan a ti.

⁵“Aigupta ram aṭanga in chhuah laia in hnêna thu ka thlun tawh ang khân ka Thlarau in hnênah a awm reng a, zâm rêng rêng suh u,”

⁶Engkim LALPA chuan heti hian a ti: “Rei lo tê-ah lei leh vân te, tuipui leh khawmualte ka sâwinghîng dâwn.

⁷Hnamte chu ka sâwinghîng ang a, hnam tinrêngin an sum leh paite chu an rawn la khâwm ang a, he in hi ropuinain a khat ang,” Engkim LALPA chuan a ti.

⁸“Tangkarua hi ka ta a ni, rangkachak pawh ka ta a ni,” Engkim LALPA chuan a ti. “A hmasa ai khân tûna mi hi a ropui zâwk ang,” Engkim LALPA chuan a ti.

⁹“He hmunah hian thlamuanna ka pe dâwn a ni,” Engkim LALPA thuchhuak chuan a ti.

¹⁰Lal Daria lal kum hnihna, thla kuana, ni sawmhnih leh pali ni chuan LALPA thu zâwlnei Hagaia hnênah a lo thleng a.

¹¹Engkim LALPA chuan heti hian a ti: “Hemi chungchângah hian Dânin eng nge a sawi puithiamte zâwt rawh u.

¹²Tuin emaw sa thianghlim a puan hmâwrah fûn sela, chu sa fûn chuan chhang emaw, satuihâng emaw, uain emaw, hriak emaw chaw eng pawh a deh a thianghlim ve ang em?” tiin. Puithiamte chuan, “Thianghlim ve lo vang,” tiin an chhâng a.

¹³Hagaia chuan, “Mitthi ruang khawih avângin mi bawlhhlawhin hêng thilte hi tawk sela, a bawlhhlawh ang em?” a ti a. Puithiamte chuan, “Aw, a bawlhhlawh ang,” an ti a.

¹⁴Tichuan, Hagaian, “Ka mit hmuhin hêng mite leh he hnam hi chutiang chu an ni,” tih hi LALPA thuchhuak a ni; “An thawh rah zawng zawng te, an thilhlante pawh a bawlhhlawh a ni,” a ti a.

¹⁵“LALPA Tempul lungphûm in phûm hma leh tûn hnu hunte hi vawiin aṭangin ngun takin chhût rawh u.

¹⁶Phur sawmhnih thar beiseiin phur sâwm chauh a thar a; uain ûm sawmnga neih beiseiin ûm sawmhnih chauh a neih ṭhin kha.

¹⁷In thawh chhuah zawng zawng a hrikin ka tichhia a, a ngêt te, rialte hmanga ka hrem che u pawhin ka lam in lo hawi duh chuang lo,” tih hi LALPA thuchhuak a ni.

¹⁸“Vawiin ni sawmhnih leh pali ni, thla kuana, Tempul lungphûm in rem zawh ni aṭang hian ngun takin chhût teh u.

¹⁹Buh inah a chî a la awm em? grep te, theipui te, theibuhfai te, oliv-te rah lo mah sela tûn aṭangin mal ka sâwm ang che u.”

²⁰ LALPA thu chu chumi thla, ni sawmhnih leh pali ni vêk chuan a lo thleng leh a.

²¹“Judai ramawptu, Zerubabela chu, lei leh vân ka tinghîng dâwn tih hrilh rawh.

²²Lalte ka titlâwm ang a, ram dang sawrkâr chaknate ka tichhe vek ang. An sakawr-tawlailîrte leh a khalhtute chu leiah ka theh thlu ang a, sakawr leh a chungchuangte an tlu phung ang a, ngûnhnâmin an inchhun hlum ang.”

²³Engkim LALPA chuan heti hian a ti, “Chumi ni chuan, ka chhiahhlawh, Zerubabel, Sealtiela fapa, ka chelh tlat ang che,” LALPA chuan a ti. “Ka thlang tawh che a, ka hming nemna zungbun atân ka siam ang che,” Engkim LALPA thuchhuak chuan a ti.