Read Mizo Lushai Zakaria 1 Bible Online

Zakaria 1 - Mizo Lushai bible

Zakaria 1

¹Daria lal kum hnihna, thla riatnaah chuan Ido-a fa, Barakia fapa zâwlnei Zakaria hnênah LALPA thu heti hian a lo thleng a:

²“In thlahtute chungah kei LALPA hi ka lungni lo hle a ni.

³Chuvângin, an hnênah heti hian va sawi rawh: Engkim LALPA chuan heti hian a ti: ‘Ka lam lo hawi rawh u,’ Engkim LALPA thuchhuak chuan a ti. ‘Kei pawh in lam ka lo hawi ang,’ Engkim LALPA chuan a ti.

⁴‘In thlahtute ang khân awm suh u. Engkim LALPA chuan zâwlnei hmasate hmangin an hnênah, ‘in sual sim ula, in thil sual tihte bânsan rawh u,’ a tih pawhin an ngaithla duh lo va, an zâwm duh hek lo,’ LALPA thuchhuak chuan a ti.

⁵‘Khawiah nge in thlahtute chu an awm tâk? Zâwlneite pawh an dam kumkhua em ni?

⁶Ka rawngbâwltu zâwlneite hmanga ka thu leh ka thuruat, in thlahtute ka hrilh chu, an zâwm lo va. Tichuan, an thil sual tihte inhrechhuakin, Engkim LALPA chuan kan awm dân leh kan thil tih ang zêlin min hrem a nih hi,’ an ti,” a ti a.

⁷Daria lal kum hnihna, thla sâwm leh pakhat, Sebat thla, ni sawmhnih leh pali ni chuan Ido-a fa, Barakia fapa zâwlnei Zakaria hnênah LALPA thu zânah a lo thleng a.

⁸Ngai teh, mi pakhat, sakawr sen chunga chuang ka hmu a, ruama hnimbuk zîngah a ding a, a hnung lamah chuan sakawr sen te, a sendâng te, a vâr te an awm a.

⁹“Ka pu, hêng hi eng tihna nge?” ka ti a. Vântirhkoh mi betu khân, “Eng tihna nge ka han entîr ang che,” tiin mi chhâng a.

¹⁰Tichuan, hnimbuk zînga ding chuan, “Hêng hi lei pum pui fang chhuak tûra LALPA mi tirh an ni,” tiin a lo chhâng a.

¹¹Tin, LALPA tirhkoh, hnimbuk zînga dingte chuan, “Lei pum pui kan fang chhuak a, khawvêl pum pui hian ṭanpui an ngai hle a, an chau hle tih kan hmu,” an ti a.

¹² LALPA tirhkoh chuan, “Engkim LALPAN kum sawmsarih chhûng i lo thinursan tawh Jerusalem leh Judai ram khawpuite hi eng chen nge lainat lova i awm dâwn?” a ti a.

¹³ LALPA chuan Vântirhkoh mi betu kha thlamuanawm takin a chhâng a.

¹⁴Tichuan, Vântirhkoh mi betu chuan ka hnênah, “He thu hi puang rawh, Engkim LALPA chuan heti hian a ti: ‘Jerusalem leh Zion chu ka lainat takzet asin.

¹⁵Rei lo tê ka mite chunga ka thinur chhûngin hnam dangten an lo tuartîr nghek mai a, nuamtâwl mai mai chîng ṭhîn hnam chungah chuan ka lungni lo takzet a ni,’ a ti a.

¹⁶“Chuvângin, LALPA chuan heti hian a ti: ‘Jerusalem chu ka lainat êm a, ka kîr leh ang a, ka in pawh ka tungding leh ang,’ ” Engkim LALPA thuchhuak chuan a ti. “Jerusalem chu din thar leh a ni ang.”

¹⁷Engkim LALPA chuan heti hian a ti: “Ka khawpuite chu a hmuingîlin an lo vul leh ang a, LALPA chuan Zion tlâng chu thlamuang takin a awmtîr ang a, Jerusalem chu a thlang leh ta, tiin puang rawh,” mi ti a.

¹⁸Ka han dâk a, ka han hawi vêl a; ngai teh, ki pali ka hmu a,

¹⁹Vântirhkoh mi betu hnênah chuan, “Hêng hi eng tihna nge?” ka ti a. Ani chuan, “Hêng kite hi Juda te, Israel te, Jerusalem-te tiduhdahtu tûr an nih hi,” tiin min chhâng a.

²⁰ LALPA chuan thîrdêng pali min hmuhtîr leh a,

²¹“Hêng hi eng ti tûra lo kal nge an nih?” ka ti a. Ani chuan, “Ding chhuak thei tawh lo tûr khawpa Judai ram tichhiaa, a mite phîn darhtu hnamte chu tizâm tûr leh tudawl tûrin hêng mite hi an lo kal a ni,” a ti a.