Read Mizo Lushai Zakaria 10 Bible Online

Zakaria 10 - Mizo Lushai bible

Zakaria 10

¹“Khua a khenin LALPA churuah dîl ula, LALPA chuan chhûm te, kâwlphe te a siam a, Thlai tinrêng ruah a châwmtîr a ni.

²Milemte chuan thil ho mai mai an sawi a, Aien thiamte thil hmuh pawh chu eng mah a ni lo. Mumang dik lo an mang a, Dâwtin mi an thlamuan thlâwn a, Chuvângin, mipuite chu berâm angin an darh a, Vêngtu nei lovin hrehawm an tuar.

³Berâmpute chungah chuan ka thinur takzet a ni, Hruaitute chu ka hrem ngei dâwn. Engkim LALPA chuan a berâm Juda-te chu a ngaihsak a, Indo nâna a sakawr chhuan angin a tichak ang.

⁴A kil lung te, khen marna thîr te, indona thalngul te, Rorêltute an zîng aṭangin an lo chhuak ang.

⁵Anni chu indonaa mi chak tak an ni ang a, Kawtthlêr chirhdiak angin hmêlmate an chîl ang, LALPA an hnêna a awm avângin an bei nasa mai ang, Sakawr chunga chuang mite pawh an hneh ang.

⁶Juda chhûngte chu ka tichak ang a, Josefa chhûngte chu ka chhanhim ang, Anni chu ka lainat êm a, ka hruai kîr leh ang a, Hnawh chhuah la ni ngai lo ang an ni ang. Kei LALPA, an Pathian hi an dîlna chhâng ṭhîntu ka ni.

⁷Efraim mite chu mi huai rual angin an chak ang a, Uain in ṭhînte angin an hlim ang. An faten an chakzia an hre reng ang a, An thiltih avângin LALPA chu an chhuang hle ang.

⁸Anni chu faifûkin ka ko khâwm ang, Ka tlan tawh sate an ni si a, Tûn hma ang khân an pung leh ang.

⁹Hnam dang zîngah hnawt darh mah ila, Ram hla tak aṭang pawhin min hre reng ang. Anni chu an fate nên dam takin An lo haw tlâng leh ang.

¹⁰Aigupta ram aṭangin ka hruai kîr leh ang a, Asuria ram aṭangin ka khâwm ang. Gilead ramah leh Lebanon-ah ka hruai lût ang a, Chûngah pawh chuan an leng chuang lo va.

¹¹Tuifâwn pawh a reh ang a, Nail lui thûk laite pawh a kang chat ang a, Hnam chapo Asuria chu a tlâwm ang a, Aigupta ram lal pawh a tlâwm bawk ang.

¹² LALPA hmingin ka mite chu ka tichak ang a, A hming chu an rinchhan ber a ni ang,” LALPA thuchhuak chuan a ti.