Read Mizo Lushai Zakaria 11 Bible Online

Zakaria 11 - Mizo Lushai bible

Zakaria 11

¹Lebanon, i kawngkhâr hawng rawh, I sidar thingte a kâng dâwn nia.

²Aw, nang fâr thinglian, ṭap la, chiau vawng vawng rawh, Sidar thingte a tlu vek tawh a, Thing lian pui puite pawh a tlu zo ta. Basan rama sasuate u, ṭap vawng vawng rawh u, Ngaw dur pui chu an ṭhiat zo ta.

³Berâmpute au thâwm tak chu aw! An ropuina a chuai ta si a. Sakeibaknei mangang rûm thâwm chu ngaithla teh u, An chênna Jordan ruamte pawh a chereu zo ta.

⁴Ka Pathian, LALPA chuan heti hian a ti:

⁵“Ran talh tûrte chu châwm thau ula, A talhtuten khawngaih hauh lovin talh rawh se, A hralhtute chuan, ‘LALPA i fak ang u, Kan hausak tâk hi,’ an ti a, Berâmpute lahin an lainat hauh lo.

⁶“He ram mite hi ka khawngaih dâwn tawh lo,” tih hi LALPA thuchhuak a ni. Mite chu a ṭhenawm ram leh chûnga lalte hnênah chuan ka hlân ang a, ram chu an tiṭiau vek ang, an kut ata anni chu ka chhan lo vang.

⁷Tichuan, berâm zuartute tân ranrual talh tûrte chu ka vulh a. Tiang pahnih ka la a, pakhat chu ‘Duhawm’ ka vuah a, a dang chu ‘Phuarkhâwmna’ ka vuah bawk a, ranrual chu ka enkawl ta a.

⁸Thla khat chhûngin berâmpu pathumte chu ka bân a, anni chu ka hua a, anni pawhin min hua a.

⁹Tichuan, an hnênah, ‘In vêngtu ka ni tawh hlei nêm; a thi chu thi ula, a boral pawh boral mai rawh u; a dam chhunte pawh intiboral tawn mai rawh u,’ ka ti a.

¹⁰Hnam tin tâna ka thuthlung chu ka ṭhiat ta tih entîr nân ka tiang ‘Duhawm’ chu ka la a, ka titliak a.

¹¹Chumi ni-a tiang ka titliak chu ran zuartute chuan min thlîr reng a, ka thiltih chu LALPA thu-a ti ka ni tih an hre ta a.

¹²An hnênah, ‘âwm in tih leh ka hlawh min pe ula, in tih loh leh min pe lo ula,’ ka ti a. Tichuan, chêng sawmthum min pe a.

¹³LALPA chuan ka hnênah, “Ka man atâna tâwk hlea an hriat chu bêlvawtu pe rawh,” a ti a. Tichuan, chêng sawmthum chu ka la a, LALPA tân bêlvawtu chu ka pe ta a.

¹⁴Ka tiang dang, ‘Phuarkhâwmna’ chu ka titliak leh a, Juda leh Israel inzawmna chu a chat ta a.

¹⁵ LALPA chuan ka hnênah, “Berâmpu tlâktlailo hmanrua chu la la, a ai va awh rawh,” a ti a.

¹⁶Ngai teh, ranrual enkawltuah, Ran chungah ani chu ka dah a, A bote a zawng lo va, a notête a ngaihsak lo; A hliamte a enkawl lo va, Tla thei lote a châwm hek lo, A thau thau a ei a, An tin lam a khâwng thlawn a.

¹⁷Berâmpu tlâktlailo, a berâm thlahthlamtu chu A chung a pik e. A bân ding lam leh a mit ding lam chu Khandaihin chhun sela, A bân chu zeng rawh se, A mitte pawh del rawh se,” a ti a.