Read Mizo Lushai Zakaria 12 Bible Online

Zakaria 12 - Mizo Lushai bible

Zakaria 12

¹Israel chungchânga LALPA thuchhuak chu: Vânte kaipharha, leilung nghahchhan phûmtu leh Mihring Thlarau dahtu LALPA chuan heti hian a ti:

²“Ngai teh, Jerusalem chu a vêla mite tlûkchhiat nân Tawktarhah ka siam ang, Jerusalem an hual hunah Judai ram pawh an hual tel ang.

³Chumi ni chuan Jerusalem bei tûrin khawvêl hnam tin An pung khâwm ang a, Jerusalem chu khawvêla hnam tin tân Tihchêt rual loh lungpuiah ka siam ang. Tihchêt tum apiang an inhliam zâwk ang.

⁴Chumi ni chuan sakawr zawng zawng ka ṭhâwng darh phut ang a, A chungchuangte pawh an chiai ang,” Tih hi LALPA thuchhuak a ni. Juda chhûngte chu ka vêng tlat ang, Hnam dang indona sakawr mitte ka tidel ang.

⁵Juda hruaitute chuan, “Engkim Pathian, LALPA chuan Jerusalem-a a mite chu a tichak ṭhîn,” an ti rilru a.

⁶Chumi ni-ah chuan Juda hruaitute chu thingai chunga meivâm dah ang leh buhpâwl zînga meichher alh dah ang an ni ang a, an chhehvêla awm hnam dang, an ding lam leh vei lama mite chu an kâng ral ang a; Jerusalem erawh chu a hmun ngaiah nghet takin a ding reng ang.

⁷LALPA chuan Judai rama chêngte chu a chhan hmasa ang; tichuan, Davida thlahte pawimawhna leh Jerusalem-a chêngte pawimawhna chuan Judai ram thingtlânga chêngte pawimawhna a khûm loh nân.

⁸Chumi ni-ah chuan LALPA chuan Jerusalem-a chêngte chu a hum tlat ang a; tichuan, an zînga chak lo ber pawh Davida anga chak a lo ni ang a, Davida chhûngte pawh Pathian ang, an hmaa LALPA Vântirhkoh awm ṭhînte ang an ni ang.

⁹Chumi ni-ah chuan Jerusalem rawn beitu hnamte chu tiboral tûrin ka lo thawk ang.

¹⁰Davida chhûngte leh Jerusalem-a chêngte chu lainatna leh mi duhsak theihna thinlungin ka tikhat ang a, an chhuna chu min en ang a, fa neihchhun sûn ang leh fa tîr fapa sûn ang maiin an lung a chhe hle ang.

¹¹Chumi ni-ah chuan Jerusalem ṭap thâwm chu Megido phaia an pathian Hadad-rimona an ṭah thâwm ang maiin a nasa ang.

¹²Rama awmte chu a hnam hnamin an ṭap ang; Davida chhûngte leh an nupui te, Nathana thlahte leh an nupui te,

¹³Levia thlahte leh an nupui te, Simeia thlahte leh an nupui te,

¹⁴Israel hnam dang zawng zawng leh an nupuite chu a hrang ṭheuhvin an ṭap ang, mipa leh hmeichhia chu a hrangin.