Read Mizo Lushai Zakaria 13 Bible Online

Zakaria 13 - Mizo Lushai bible

Zakaria 13

¹Chumi ni-ah chuan Davida chhûngte leh Jerusalem-a chêngte sualna leh bawlhhlawhna tlêng fai tûr tui a lo luang chhuak ang.

²Chumi ni chuan ram chhûnga an lam ṭhin milem zawng zawng chu ka tibo vek ang a, an hre reng tawh lo vang, tih hi Engkim LALPA thuchhuak a ni. Zâwlneia inchhâlte leh thlarau bawlhhlawhte chu ram ata ka hnawt bo vek ang.

³Tu pawh, zâwlnei anga thu puang lui zêl chu amah hringtu, a nu leh paten a hnênah, “LALPA hminga dâwt i sawi avângin i thi ngei tûr a ni,” an ti ang a, amah hringtu a nu leh pa chuan a thu puang lai chu an vit hlum ang.

⁴Chutih hunah chuan, chûng zâwlneite chuan an inlârna hmuh chu an zahpui ang a, mi bum nân sahmul kawrfual an ha tawh lo vang.

⁵“Zâwlnei ka ni lo, ka naupan têt ata lo nei mi ka ni,” a ti zâwk ang.

⁶“A nih, hêng i taksaa pemte hi engtizia nge?” an tih chuan, anin, “Ka ṭhiante inah min tipalh a ni,” a ti ang.

⁷“Harh teh, khandaih, ka berâm vêngtu, Ka thawhpui chu bei rawh,” Engkim LALPA thuchhuak chuan a ti. “Berâmpu chu vua la, berâmte chu darh rawh se, A note chungah pawh kut ka thlâk ang.

⁸Ram chhûngah hetiang thil hi a thleng dâwn a ni,” LALPA thuchhuak chuan a ti. “Mi hmun thuma ṭhena hmun hnih an tlu ang a, an thi ang, Hmun thuma ṭhena hmun khat chu an zuah ang.

⁹Zuahte chu meiin ka fiah ang a, Tangkarua tihthianghlim angin ka tithianghlim ang a, Rangkachak fiah angin ka fiah ang. Min ko vang a, ka lo chhâng ang, ‘Ka mi in ni,’ ka ti ang a, Annin, ‘LALPA, kan Pathian chu i ni,’ min ti ang.”