Read Mizo Lushai Zakaria 14 Bible Online

Zakaria 14 - Mizo Lushai bible

Zakaria 14

¹Ngai teh, LALPA ni chu a lo thleng dâwn, râlin in thil an lâk chu in mit hmuhah an insem ang.

²Jerusalem bei tûrin hnam tinrêng ka ko khâwm ang a, khawpui chu an la ang a, inte an tichhe vek ang a, hmeichhiate pawh an pâwngsual ang. Khawpuia mihring zâtve chu salah an hruai ang a, a dang zawng chu khawpuiah an la awm ang.

³Tin, LALPA chu a lo thawk ang a, indo nia a chêt ṭhin dân angin chûng hnamte chu a rawn bei ang.

⁴Chumi ni-ah chuan Jerusalem chhak lama Oliv tlângah a ding ang a, Oliv tlâng chu chhak leh thlang hawiin a khi phel phawk ang a, a inkâr ruam chu zau tak a ni ang. Tlâng phel khat chu hmâr lamah a tawlh ang a, a lehlam chu chhim lamah a tawlh ang.

⁵Tlâng kâr ruamah chuan in biru ang a, tlâng inkâr ruam chuan Azel hmun a thleng ang. Juda lal Uzia lal laia lîrnghîng avânga in tlân ang khân chutah chuan in tlân ang. Tin, Ka Pathian, LALPA chu, a mi thianghlim zawng zawng nên a lo kal ang a.

⁶Chumi ni-ah chuan êng a awm lo vang a, khua a vâwtin vûr a tla tawh hek lo vang.

⁷Ni danglam tak, LALPA ni an tih chu a lo thleng dâwn, chhûn a awm lo vang a, zân pawh a awm lo vang; tlai thlengin a êng reng ang.

⁸Chumi ni-ah chuan Jerusalem aṭangin tui nung a lo luang chhuak ang a, a zâtve chu Tuipui Thiah a luang lût ang a, a zâtve dang chu Mediteranean tuipuiah a luang lût ang. Fûrah pawh ṭhâlah pawh a kang lo vang.

⁹ LALPA chu lei pum pui tân lal a ni ang a, chumi hunah chuan LALPA chauh an bia ang a, a hming chauh an lam ang.

¹⁰Hmâr lam Geba khua aṭangin Jerusalem chhim lama Rimon khaw thlengin ram pum pui chu Araba zâwl angin tihhniam a ni ang a. Jerusalem erawh chu a hmun ngaiah tihsân a ni ang. Khua chuan Benjamin kawngka aṭanga kawngka pakhatna, a kil kawngka an tih leh Hanania in sâng aṭanga lal uain sâwrna hmun an tih thlengin a awh ang.

¹¹Chu chu an luah ang a, rawn tichhe tûr an awm tawh lo vang a, Jerusalem chu him takin a awm reng tawh ang.

¹²Jerusalem dotu hnam zawng zawng chu LALPA chuan he hri chhia hian a hrem dâwn: Ding chungin an tisa a ṭawih ang a; an mitkhurah an mitmu a keh ang a, an lei chu an ka chhûngah a ṭawih ral ang.

¹³Chumi ni chuan namên lovin LALPA chuan mite chu a tichiai ang a, mahni hnaih hnaih an man ang a, kut an inthlâk tawn ang.

¹⁴Juda pawhin Jerusalem tân ṭan a la ang a, an vêla hnam zawng zawng rangkachak te, tangkarua te, thawmhnaw tam tak te an la ang.

¹⁵Tichuan, hmêlmate riahhmuna an sakawr te, sabengtung te, sanghâwngsei te, sabengtung tê chi te leh an ranrual zawng zawng chungah hri chhia chu a lêng bawk ang.

¹⁶Hnam dang, Jerusalem rawn dotu, la dam zawng zawng chu, Engkim LALPA chu be tûrin kum tin Bâwkte kût hmangin an lo chho vang.

¹⁷Leia mi zawng zawng, Engkim LALPA chibai bûk tûra chho duh lote chungah chuan ruah a sûr lo vang.

¹⁸Aigupta mite pawh kût hmang tûra an lo chhoh duh loh chuan ruah an hmu lo vang. Bâwkte kûta lo kal duh lo hnam dang a hrem ang khân LALPA chuan a hrem ang.

¹⁹Hei hi Aigupta ram hremna leh hnam tin Bâwkte kût hmang duh lote hremna tûr chu a ni.

²⁰Chu mi ni chuan sakawr ṭhi-ah pawh ‘LALPA tâna serh hran’ tih a chuang ang a; LALPA ina bungbêlte pawh maichâm hmaa maihûn angin a thianghlim tawh ang.

²¹Jerusalem leh Judai rama bungbêl awm zawng zawng chu a lo thianghlim tawh ang a, inthawi tûra kalte chuan bêl chu inthawina sa chhum nân an hmang thei tawh ang. Chumi hunah chuan Engkim LALPA inah chuan sumdâwng tu mah an awm tawh lo vang.