Read Mizo Lushai Zakaria 2 Bible Online

Zakaria 2 - Mizo Lushai bible

Zakaria 2

¹Ka han dâk a, ka han hawi vêl a, mi pakhat, tehna hrui keng ka hmu a,

²“Khawiah nge i kal dâwn?” ka ti a. Ani chuan, “Jerusalem zau zawng ka teh dâwn a ni,” a ti a.

³Tin, vântirhkoh mi betu kha a kal sawn a, vântirhkoh dangin a rawn tâwk a,

⁴a hnênah, “Tlân la, tlangvâl hnênah chuan heti hian ti rawh: ‘A chhûngah mipui leh ranrual an tam êm êm dâwn a, Jerusalem khawpui chu hung rual a ni lo vang.

⁵Kei hi a tân mei bang ka ni ang a, kei ngei hi a tiropuitu tûr chu ka ni,” LALPA thuchhuak chuan a ti.

⁶“Khaih, khaih, khaih! Hmâr lam ata kha lo chhuak teh u,” LALPA thuchhuak chuan a ti. “Hmun tinah ka hnawt darh che u a,” tih hi LALPA thuchhuak a ni.

⁷Nang pawh Zion, Babulon mite zîng ata lo tlân chhuak rawh.

⁸Engkim LALPA chuan heti hian a ti: “Chuvângin, nangmahni tichhetu hnam chu ka do dâwn a ni,” A ti tih sawi tûrin Ropuia chuan mi tîr a ni.

⁹Ngai teh, anni chu ka kut ka thin khum ang a, An chhiahhlawh ni ṭhînte chuan an rawk ang. Chutih hunah chuan Engkim LALPA chuan mi tîr tih in hria ang.

¹⁰Aw Zion, hlim takin au vak vak rawh, Ngai teh, in hnêna chêng tûrin ka lo kal e,” Tih hi LALPA thuchhuak a ni.

¹¹Chumi ni-ah chuan hnam tam takin LALPA an bêl ang a, A mite an ni ang. In hnênah a chêng ang a, Tichuan, Engkim LALPA chuan in hnênah min tîr tih in hria ang.

¹²Judai ram chu LALPA pual, ram thianghlim a ni leh ang a, Jerusalem pawh ama tân a thlang leh ang.

¹³ LALPA hmaah chuan mi tin ngawi ṭhiap rawh u, Ani chu a hmun thianghlim aṭangin a lo chhuak dâwn si a.