Read Mizo Lushai Zakaria 4 Bible Online

Zakaria 4 - Mizo Lushai bible

Zakaria 4

¹Vântirhkoh mi betu kha a lo kal leh a, muhîl kaihthawh ang maiin mi rawn kai tho va.

²“Eng nge i hmuh le?” min ti a. Kei chuan, “Rangkachak hlîra siam khâwnvâr dahna ṭhuam sarih nei, a hmâwra hriak bâwm hmui nei ṭheuh ka hmu,” ka ti a.

³A kiangah Oliv thing pahnih a awm a, pakhat chu a ding lamah, pakhat a vei lamah.

⁴Vântirhkoh min betu hnênah chuan, “Ka pu, hêng hi eng tihna nge?” ka ti a.

⁵“Hêng hi eng tihna nge i hre lo maw?” mi ti a. “Hre lo, ka pu,” tiin ka chhâng a.

⁶Tichuan, ka hnênah heti hian a sawi: “Jerubabela hnêna LALPA thu lo thleng chu hei hi a ni: I chakna ni lovin, i thiltihtheihna ni hek lovin Ka Thlarau zâwkin le,” Engkim LALPA chuan a ti.

⁷Aw nang, dâltu tiang lian, eng nge i nih le? Jerubabela hmaah chuan râwt mâm vek i ni ang, Tempul sak zawhna lung hnuhnûng ber a rem hunah, Mipui chu, “A mawi mang e, a mawi mang e,” Tiin an au dur dur ang.

⁸ LALPA chuan heti hian min bia a:

⁹“Jerubabelan Tempul lung a phûma, a kuta a sak zawh hun chuan Engkim LALPA chuan an hnênah ka tîr che tih an hria ang.

¹⁰Tempul sak hna a chak loh avânga zak ta chu Jerubabelan sahal khaia hna a chhunzawm an hmuh chuan an lâwm hle ang, hêng khâwnvâr dahna pasarih hi LALPA mit, khawvêl pum pui thlîr ṭhîntu chu a ni,” a ti a.

¹¹Tin, a hnênah, “Hêng Oliv thing pahnih, khâwnvâr dahna ding lam leh vei lama awmte hi engtihna nge?

¹²Rangkachak hriak bâwm hmui nei sîr tuaka oliv zâr pahnihte hi engtihna nge?” ka ti a.

¹³Ani chuan, “Hêng hi engtihna nge i hre lo maw?” min ti a. Kei chuan, ‘Hre lo, ka pu,” ka ti a.

¹⁴Ani chuan, “Hêng hi mi pahnih, lei pum puia LALPA rawngbâwl tûra thlante chu an ni,” a ti a.