Read Mizo Lushai Zakaria 5 Bible Online

Zakaria 5 - Mizo Lushai bible

Zakaria 5

¹Ka han dâk a, ka han hawi vêl a, lehkhabu zial thlâwk duai duai ka hmu a.

²Ani chuan, “Eng nge i hmuh?” a ti a. Kei chuan, “Lehkhabu zial thlâwk duai duai lai ka hmu, tawng sawmhniha sei, tawng sâwma hlai a ni,” ka ti a.

³Ani chuan, “Hei hi ram puma thleng tûr ânchhe ziakna a ni. A phêk lehlam hi rûkru zawng zawng tihboralna tûr thu ziakna a ni a, a lehlam hi chhechham apiang tihboralna tûr thu ziakna a ni bawk.”

⁴Engkim LALPA chuan heti hian a ti: “Ka tîr chhuak ang a, rûkru inah te, ka hminga dâwta chhechham ṭhîn inahte ka thlawh luhtîr ang. Tah chuan, a awm reng ang a, chu in hmanrua, thing leh lungte chu a tichhe vek ang,” tiin.

⁵Vântirhkoh mi betu kha a lo kal leh a, “Dâk la, han en vêl teh, eng nge i hmuh le?” mi ti a.

⁶“Eng nge lo lang ta hi?” ka ti a. Ani chuan, “Hei hi bâwm, tehnaa hman tûr chu a ni; lei pum pui sualzia tihlanna tûr a ni,” a ti a.

⁷Bâwm chhîn chu suan phêk a ni a; a han hawng a, bâwm chhûngah chuan hmeichhia a lo ṭhu a.

⁸Ani chuan, “Hei hi Sualbûri a ni,” a ti a. Tichuan, bâwmah chuan a nem lût leh a, suan phêk chuan a chhîn leh ta a.

⁹Ka han dâk chhuak a, ngai teh, hmeichhe pahnih an lo lang a, thlain an lo thlâwk a, an thla chu vacha thla ang a ni. Bâwm chu lei leh vân inkârah an thlawhpui ta a.

¹⁰Vântirhkoh mi betu hnênah chuan, “Khawiah nge bâwm chu an thlawhpui dâwn?” ka ti a.

¹¹Ani chuan, “Babulon ramah in an saksak dâwn a, an peih hunah ama awmna tûra an ruatah chuan an dah ang,” a ti a.