Read Mizo Lushai Zakaria 6 Bible Online

Zakaria 6 - Mizo Lushai bible

Zakaria 6

¹Ka han dâk leh a, sakawr-tawlailîr pali, tlâng lian pui pui inkâr aṭanga lo chhuak ka hmu a, tlângte chu dâr a ni.

²Tawlailîr pakhat chu sakawr sen rualin an hnûk a, pakhat chu a dumin,

³pakhat chu a vârin, a dang leh chu a rângin. An chak êm êm vek a.

⁴Mi betu hnênah chuan, “Ka pu, hêng hi engtihna nge?” ka ti a.

⁵Vântirhkoh chuan, “Hêng hi vân thli pali, lei pum pui LALPA hmaa inring renga awm ṭhîn, kal chhuak an ni,” a ti a.

⁶Sakawr sente chu khawchhak lama kal tûr an ni a, a dumte chu hmâr lamah, a vârte chu khawthlang lamah, a rângte chu chhim lamah.

⁷An lo per chhuak ṭek ṭek a, khawvêl fan chhuah an nghâkhlel hle a ni. An hnênah, “Kal ta ula, khawvêl fang chhuak rawh u,” a ti a. Tichuan, an fang ta a.

⁸Ani chuan mi han au va, “Ngai teh, hmâr lama kalte chuan hmâr lam ram chungchânga ka thinur an tidai ta,” a ti a.

⁹ LALPA thu chu ka hnênah hetiang hian a lo thleng a:

¹⁰“Saltângte thilpêk, Heldaia te, Tobija te, Jedaia te rawn ken chu la la, Babulon aṭanga lo thleng Zefania fapa Josia hnênah kalpui nghâl rawh.

¹¹Tangkarua leh rangkachak chu la la, lallukhum siam la, Jehozadaka fapa Josua, puithiam lalber chu khumtîr rawh.

¹²A hnênah heti hian ti ang che: ‘Engkim LALPA chuan heti hian a ti: Mi pakhat, Chawrnova an tih chu, a awmhmun lei aṭangin a chawr chhuak ang a, LALPA Tempul a sa ang.

¹³Amah ngei hi a ni LALPA Tempul satu tûr chu. Lal ropuinain a inthuam ang a, lalṭhutthlêngah a ṭhu ang. A ding lamah puithiam a ṭhu ang a, an lungrual hle ang.

¹⁴Lallukhum chu LALPA Tempulah, Helema te, Tobija te, Jedaia te, Zefania fapa Josia te hriatrengna tûr a ni ang.

¹⁵LALPA Tempul sa tûrin ram hla tak ata an lo kal ang a, Engkim LALPA chuan in hnênah min tîr tih in hria ang. In Pathian, LALPA thu in zawm phawt chuan hêng thil hi a lo thleng ngei ang,’ tiin,” a ti a.