Read Mizo Lushai Zakaria 8 Bible Online

Zakaria 8 - Mizo Lushai bible

Zakaria 8

¹Engkim LALPA thu chu ka hnênah hetiangin a lo thleng leh a.

²Engkim LALPA chuan heti hian a ti: “Zion chu vei takzetin ka vei a ni. A chunga thinur khawpin asin ka thîk ni.

³ LALPA chuan heti hian a ti: Zion-ah ka lo kîr ang a, Jerusalem-ah ka chêng reng tawh ang. Engkim LALPA tlâng pawh Tlâng Thianghlim an ti ang.”

⁴Engkim LALPA chuan heti hian a ti: “Jerusalem kawtthlêrahte chuan pitar leh putar tiang hawl, Upa tak tak an ṭhu leh fer fur ang,

⁵Khawpui tual zau laiahte naupang an tualchai nuk nuk ang.”

⁶Engkim LALPA chuan heti hian a ti: “Tûna la dam chhunte tân chu chu thil mak lutuk a nih pawhin, Ka tân a mak ve dâwn em ni?” Engkim LALPA thuchhuak chuan a ti.

⁷Engkim LALPA chuan heti hian a ti: “Ngai teh u, ka mite chu chhak leh thlang ata Ka hruai khâwm dâwn.

⁸Jerusalem luah tûrin ka hruai haw ang, Ka mite an ni ang a, kei pawh an Pathian, Rinawm tak leh dik taka rorêlsaktu ka ni ang.”

⁹Engkim LALPA chuan heti hian a ti: “Engkim LALPA Tempul lungphûm an phûm laia Zâwlnei thu sawi kha hre reng ula, In sa zo tûrin ṭan la rawh u.

¹⁰Tûn hma kha chuan mihring leh ran hlawh tûr a awm lo va, Hmêlmate avângin vâk chhuak ngam an awm hek lo. Mi tin ka inhmêlmâktîr vek a ni.

¹¹A la awm chhunte tân tûn hma kha ka ang dâwn tawh lo,” Tih hi Engkim LALPA thuchhuak a ni.

¹²“Ralmuang takin thlai an chîng ang a, An grepte pawh a rah tiar tuar ang a, An thlai chînte a lo hlâwk ang a, Vân daifîmin a châwm ang. A la awm chhunte chu hêng malsâwmna hian ka vûr ang.

¹³Hnam dangten ânchhia an lawh ṭhîn che u a, Nangni Juda leh Israel-te u, Hnam dangten in zâr an zo theih nân, Ka chhan chhuak dâwn a che u; Hlau suh u, ṭan la sauh sauh rawh u.”

¹⁴Engkim LALPA chuan heti hian a ti: “In thlahtuten min tihthinur lai ang khân, Lainat lovin chhiatna in chungah thlentîr ka lo tum tawh a,” Engkim LALPA chuan a ti.

¹⁵“Amaherawhchu, Jerusalem leh Juda chungah Thil ṭha thlentîr ka tum ta zâwk asin, Hlau suh u.

¹⁶Hêng hi in tihtûr chu a ni: Thu dik inhrilhtawn ula, In rorêlna hmunah dik takin rêl rawh u.

¹⁷Intihchhiat tawn tum suh u, Dâwta chhechham chîng hek suh u, Chûng chu ka huatzâwng tak a ni,” Tih hi LALPA thuchhuak a ni.

¹⁸Engkim LALPA thu chu ka hnênah hetiangin a lo thleng a:

¹⁹Engkim LALPA chuan heti hian a ti: “Thla linaah te, thla nganaah te, thla sarihnaah te, Thla sâwmnaah te chaw in nghei ṭhîn a, Chu chu Juda chhûngte tân Kût hlimawm leh lâwmawm a ni tawh ang. Chuvângin, thu dik ngaina ula, remna zawng rawh u.”

²⁰Engkim LALPA chuan heti hian a ti: “Khawpui tam tak aṭangin mi an lo kal duah duah ang a,

²¹Khaw khata mite khaw danga kalin, ‘Hawh u, LALPA be tûrin i kal ang u, Engkim LALPA ka pan dâwn, Lo tel ve rawh u,’ an ti ang.

²²Engkim LALPA be tûr leh a malsâwmna dîl tûrin mi tam tak leh hnam thiltithei takte chu, Jerusalem-ah an lo kal dâwn a ni.”

²³Engkim LALPA chuan heti hian a ti: “Chutih hunah chuan hnam tin leh ṭawng tin zînga mi sâwm An lo kal ang a, Juda pakhat kawrfual vuan chungin ‘In zîngah kan tel ve dâwn, LALPA chu in hnênah a awm tih kan hria a ni,’ an ti ang.”