Read Mizo Lushai Zakaria 9 Bible Online

Zakaria 9 - Mizo Lushai bible

Zakaria 9

¹Hadrak leh Damaska chunga thleng tûr chungchânga LALPA thu chu: Mite mit chuan LALPA a thlîr a, Israel hnamte pawhin an thlîr.

²An ram ṭhenawm Hamat te, Tura te, Sidon khawpui te chu, an finnate chawpin a ta vek an ni.

³Tura chuan kulh a siam a, Vaivut ang maiin tangkarua a chhûng khâwm a, Rangkachak pawh kawtthlêr chirhdiak angin a chhêk khâwm.

⁴Mahse, LALPAN a thil neihte a chhuhsak ang a, A hausakna chu tuipuiah a paih ang a, khawpui chu a kâng ral ang.

⁵Askelon khuain an hmu ang a, an hlau vang, Gaza khua pawh hlauvin an khûr ang a, Ekron khua pawh an beidawng ang. Gaza khuaah lal chu a boral ang a, Askelon khua chu a ram ang.

⁶Asdod chu sâwnin a luah ang a, Hnam chapo Filistia chu ka titlâwm ang.

⁷A thisen nên sa an ei tawh lo vang a, Sa thiang lo an ei tawh hek lo vang. Thi bângte chu kan Pathian ta an ni ang a, Juda hnam ang an ni ang. Ekron mite pawh Jebus mite ang an ni ang.

⁸Sipai lo kal lakah ka in chu ka vêng tlat ang a, Hnehchhiahtuten an paltlang tawh ngai lo vang, Tûnah zawng ka vêng tlat tawh dâwn a ni.

⁹Aw Zion fanu, lâwm hle la, Aw Jerusalem fanu, hlim takin au rawh, En teh, i lal chu i hnênah a lo kal a, Mi dik tak a ni a, Chhandamtu a ni. Tlâwm takin sabengtung chungah a chuang a, A ni, sabengtung no chungah chuan

¹⁰Efraim indona tawlailîr leh Jerusalem sakawrte chu a tiral ang, Hnam tin a inremtîr ang a, A ram chu tuipui aṭanga tuifinriat thleng,. Luipui aṭanga kâwlkil thleng a ni ang.

¹¹Nang erawh chu, kan inkâra thisen thuthlung avângin, Khuarkhurum rova i mi tângte chu ka chhuah vek a,

¹²Nangni, mi tâng, chhuah beiseite u, In kulh lamah kîr leh ang che u, Ka hrilh a che u, in tuar man chu A lêt hnihin ka rûl ang che u.

¹³Juda chu thalngul atân ka hmang a, Efraim chu thal atân, Grik mite dona tûrin Zion fate chu ka chawk tho vang a, Mi huaisen khandaih angin ka hmang ang.

¹⁴ LALPA chu an chung lamah a lo lang a, A thal chu kâwlphe angin a de zawr zawr ang. Lalpa PATHIAN chuan tawtawrâwt a hâm ang a, Chhim thlipui na angin a lo thawk ang.

¹⁵Engkim LALPA chuan anni chu a hum ang a, An hmêlmate chu an hneh ang a, Kulh denna lungte chu an chîl ang. An hmêlmate thisenin an rui ang a, An au chêlchûl ang. Maichâm kila thisen tah a luang zuih ang leh Chawhtawlha liam zawih zawih ang hi a ni ang.

¹⁶Chutih hunah chuan LALPA, An Pathian chuan berâm angin A mite chu a chhanhim ang a, Lallukhuma lunghlute angin a ramah chuan an êng ang.

¹⁷An va ṭhain an va mawi êm! An buh chu tlangvâlten an ṭhat phah ang a, An uain chu nulaten an mawi phah ang.