Read Mizo Lushai Malakia 2 Bible Online

Malakia 2 - Mizo Lushai bible

Malakia 2

¹Khai le, puithiamte u, Ka thupêk hi in tân a ni asin.

²Engkim LALPA chuan heti hian a ti: “Ka thu in ngaihthlâk lohva, Tihtakzeta ka hming in chawimawi loh chuan, In chungah ânchhia ka thlentîr ang a, In chanvote pawh ânchhia ka lawh ang, A ni, tihtakzeta min chawimawi loh avângin, Chûng chu ânchhia ka lawh dêr tawh a ni.

³Ngai teh u, nangmahni avângin in thlahte ka hrem dâwn, In hmaiah in inthawina ran êk ka tât ang a, Êk kai luai chung chuan an paih ang che u.

⁴Levia hnêna ka thuthlung a ngheh zêl theih nân, He thupêk hi ka pe che u a ni tih in hria ang,” Engkim LALPA chuan a ti.

⁵An hnêna ka thuthlung chu nunna leh thlamuanna tûr a ni a, Min ṭih theih nân chu chu an hnênah ka pe a, Min ṭih ta ngei reng a, Ka hming pawh an pawisa ta a ni.

⁶Mite thu dik a zirtîr a, dâwt a sawi ngai lo, Ka hmaah ngaihngam tak leh dik takin a khawsa a, Thil sual ti lo tûrin mi tam tak a pui ṭhîn.

⁷Puithiamte chu thu dik kawltu an ni a, Miten an thu zirtîr an ngaichâng tûr a ni, Engkim LALPA thuchah kengtute an ni si a.

⁸Nangni erawh chuan kawng dik in pênsan a, In zirtîrna chuan mi tam tak a titlu a, Levia hnêna thuthlung in bawhchhe ta,” Engkim LALPA chuan a ti.

⁹“Tu man ka thu in zâwm lo va, Hleih nei taka ro in rêl avângin, Kei pawhin mi tin endawng leh Hmuhsitah ka siam che u a ni.”

¹⁰Kan vaiin pa pakhat thlah kan ni lo vem ni? Pathian pakhat siam vek kan ni lâwm ni? Kan pate thuthlung bawhchhiain Engah nge kan inphatsan ang?

¹¹Juda chuan bum a chîng a, Israel ramah leh Jerusalem-ah thil tenawm a ti ta, Nupuiah pathian dang bia a neih avângin Ram thianghlim, LALPA thlâkhlelh chu A tibawrhbâng ta si a.

¹²Engkim LALPA hnêna thil hlan rawn keng mah se, Chûng thil titu tawh phawt chu Jakoba puan in ata LALPA chuan a paih chhuak ang.

¹³In inthawina chu a lâwm lo va, a pawm hek loh avângin Hêng thil hi in ti bawk: In ṭap a, in chiau vawng vawng a, LALPA maichâm chu in mittuiin a far huh a.

¹⁴Nangnin, ‘Eng vângin nge a pawm loh?’ in ti maw? LALPA hriatah i tawn tirh nupui chu Rinawm taka neiin kawppui tlat i tiam a. I thutiam chu i bawhchhiat tâk avâng a ni.

¹⁵Pathianin i nupui nên chuan Tisa leh thlarau pumkhata Awm tûrin a siam che u a ni lâwm ni? ‘Eng atân maw?’ ‘Pathian mi, fa ṭha tak tak hring tûrin’ a ni. Chuvângin, i tawn tirh nupui nêna in thuthlung chu Bawhchhe lo tûrin fîmkhur rawh.

¹⁶ LALPA, Israel-te Pathian chuan heti hian a ti: “Inmâk hi ka haw takmeuh va, Nupuite râwng taka sawisak pawh ka hua a ni,” Engkim LALPA chuan a ti. “Chuvângin, in nun vêng ṭha ula, rinawm takin awm rawh u.”

¹⁷In thu sawiin LALPA a tihah ta, Nangnin, ‘Engtin nge kan tihhah?’ in ti a. ‘Thil sual titute chu LALPA mit hmuhah mi ṭha an ni a, An chungah pawh a lâwm hle a ni,’ in ti a, ‘Khaw nge dik taka rorêl ṭhîn Pathian chu a awm,’ In tihahte hian.”