Read Mizo Lushai Malakia 3 Bible Online

Malakia 3 - Mizo Lushai bible

Malakia 3

¹“Ngai teh, ka tirhkoh ka rawn tîr dâwn, Ani chuan ka hmaah kawng min buatsaihsak ang. In zawn LALPA chu a Tempul-ah a lo lang thut ang a, Hmuh in nghahhlelh êm êm Thuthlung tirhkoh pawh a lo kal ang,” Engkim LALPA chuan a ti.

²Mahse, a lo kal ni chu tu nge dâwl zo vang? A lo lang chu tu nge tuar zo vang? Ani chu rawhtuina mei anga sa leh Puansutu sahbawn anga chak a ni si a.

³Tangkarua rawhtuia tithianghlimtu ang a ni ang a, Levia fate chu rangkachak leh tangkarua angin A tithianghlim ang a, Tichuan, LALPA hnênah inthawina dik tak an hlân ang.

⁴Hun kal ta, hmasâng nite ang khân, Judai ram leh Jerusalem mite thil hlan chu LALPA chuan a lo lâwm ang.

⁵Rorêl tûrin ka lo kal thuai dâwn, Dawithiam te, uire te, dâwta chhechham te, Hlawhfa hlawh pe ṭha duh lo te, Hmeithai te, fahrah te, hnam dang te hnehchhiaha, Min phatsantute chu thiam loh ka chantîr nghâl ang,” Engkim LALPA chuan a ti.

⁶“Kei LALPA hi ka danglam ngai lo va, Chuvângin, nangni Jakoba thlahte u, In la ral rih lo a nih hi.

⁷Nangni erawh chuan in pi leh pute aṭang tawh khân, Ka thuruat in hawisan a, in zâwm hek lo. Ka lam lo hawi ula, kei pawh in lam ka lo hawi ang,” Engkim LALPA chuan a ti. “Nangni erawh chuan, ‘Engtin nge i lam kan hawi ang?’ in ti a.

⁸Miin Pathian chanpual a rûksak tûr em ni? Nangni erawh chuan min rûksak si a. ‘Engah hian nge kan rûksak che?’ in ti a. ‘Sâwma pakhat leh thilhlanahte hian!’

⁹Ka chanpual min rûksak avângin in hnam pum pui chu ânchhia lawh a ni ta.

¹⁰Sâwma pakhat dik tak thawhlâwm bâwmah rawn dah ula, Tichuan, ka inah ei tûr a awm dâwn nia. He thilah hian mi han fiah teh rêng u, Vân tukverhte chu ka hawnsak ang che u a, Malsâwmna dawn sên loh ka vûr ang che u,” Engkim LALPA chuan a ti.

¹¹“Tichhetu ka vêng ang a, In lova thlaite chu a tichhe tawh lo vang. In huana grepte pawh a hlamtla tawh lo vang,” Engkim LALPA chuan a ti.

¹²“Hnam tinrêngin nihlawh an ti ang che u a, Hlim takin in ramah ngei in awm tawh ang,” Engkim LALPA chuan a ti.

¹³“Ṭawng chhe tak takin mi sawichhe ṭhîn,” LALPA chuan a ti. “ ‘Engtin nge kan sawichhiat che?’ in ti a.

¹⁴‘Pathian rawngbâwl hi thil sâwt lo tak a ni a, Engkim LALPA duhzâwng tih leh A hmaa lungchhe taka inlante hi, Eng nge a hlâwkna?’ in tihah hian.

¹⁵‘Mi chapote an nihlawh a, Thil sual titute an lian tual tual a, Pathian dawhtheihzia fiahtute hrem lohvin an chhuak a,’ In ti ṭhîn.”

¹⁶Tichuan, LALPA ṭihtute chu an inbia a, LALPA chuan a lo ngaithla a, a hre ta a, LALPA ṭiha a hming ngaisângtute hming chu, Hriatrengna lehkhabu-ah, a hmuh ngeiah ziak a ni ang.

¹⁷“Ka hun ruat tharah chuan anni chu Ka chanpual an ni ang a,” Engkim LALPA chuan a ti. “Miin a fa, amah châwmtu tûr a duat angin, Ani chu ka duat ve ang.

¹⁸Tichuan, mi dik leh mi sual danglamna te, Pathian rawngbâwltu leh rawngbâwl lotu te. An chan tûr a danglamna an thliar thei ang.”