Read Mizo Lushai CHANCHIN ṬHA MATTHAIA ZIAK 1 Bible Online

CHANCHIN ṬHA MATTHAIA ZIAK 1 - Mizo Lushai bible

CHANCHIN ṬHA MATTHAIA ZIAK 1

¹Isua Krista chu Davida thlah a ni a, Abrahama aṭanga an inthlah chhâwn dân chu hetiang hi a ni:

²Abrahaman fapa Isaka a nei a, Isakan Jakoba. Jakoban Juda leh a unaute.

³Judan Tamari lakah Faresa leh Zera, Faresan Esroma, Esroman Arama.

⁴Araman Aminadaba. Aminadaban Nasona, Nasonan Salmona.

⁵Salmonan Rahabi lakah Boaza, Boazan Ruthi lakah Obeda, Obedan Jesaia.

⁶Jesaian fapa, lal Davida a nei a. Davidan Uria nupui lakah fapa Solomona a nei a.

⁷Solomonan Rehoboama, Rehoboaman Abia, Abian Asafa.

⁸Asafan Jehosafata, Jehosafatan Jehorama, Jehoraman Uzia.

⁹Uzian Jothama, Jothaman Ahaza. Ahazan Hezekia.

¹⁰Hezekian Manasea, Manasean Amosa, Amosan Josia.

¹¹Babulon sala hruai lai vêl khân Josian Jekonia leh a unaute a nei a.

¹²Babulon-a sala an hruai hnuin Jekonian fapa Sealtiela a nei a. Sealtielan Zerubabela,

¹³Zerubabelan Abiuda, Abiudan Eliakima, Eliakiman Azora.

¹⁴Azoran Zadoka, Zadokan Akima, Akiman Eliuda.

¹⁵Eliudan Eleazara, Eleazaran Mathana. Mathanan Jakoba.

¹⁶Jakoban Josefa, Mari pasal chu a nei a; Mari lakah Isua, Krista an tih chu, a lo piang ta a.

¹⁷Tichuan, Abrahama leh Davida inkârah chhuan sâwm leh chhuan li an awm a, Davida leh Babulon sala hruai inkârah pawh chhuan sâwm leh chhuan li an awm a, Babulon sala hruai leh Krista inkârah chhuan sâwm leh chhuan li bawk an awm a ni.

¹⁸Isua Krista lo pian dân chu hetiang hi a ni: A nu Mari chu Josefa nupui hual a ni a, an inpâwl hmain Thlarau Thianghlimin nau a paitîr tih hriat a lo ni ta a.

¹⁹A pasal tûr Josefa chu mi fel tak a ni a, tihmualpho a duh lo va, a rûka ṭhen a tum a.

²⁰Nimahsela, chûng thu chu a ngaihtuah lai chuan, ngai teh, a mangah Lalpa tirh vântirhkoh a hmu a. “Josef, Davida fapa, i nupui hual Mari hi neih tîm suh, a nau pai chu Thlarau Thianghlim laka mi a ni asin.

²¹Fapa a hring ang a, a hmingah ISUA sa ang che; ani chuan a mite chu an sualte lak ata a chhandam dâwn si a,” a ti a.

²²Lalpan zâwlnei hmanga,

²³“Ngai teh, nula thianghlim chuan nau a pai ang a, Fapa a hring ang a, A hmingah Imanuela an sa ang,” (chu chu ‘Kan hnêna Pathian awm’ tihna a ni) tia a sawi kha a lo thlen theih nân hêng zawng zawng hi a lo awm a ni.

²⁴Josefa muhîl chu a lo harh a, Lalpa Vântirhkoh thupêk ang chuan a ti a. Mari chu nupuiah a nei ta a;

²⁵nimahsela, fapa a hrin hma chu a pâwl lo, nau hmingah chuan Isua a sa ta a.