Read Mizo Lushai CHANCHIN ṬHA MATTHAIA ZIAK 10 Bible Online

CHANCHIN ṬHA MATTHAIA ZIAK 10 - Mizo Lushai bible

CHANCHIN ṬHA MATTHAIA ZIAK 10

¹A zirtîr Sâwmpahnihte chu a ko va, thlarau bawlhhlawhte hnawt chhuak thei tûra thuneihna leh natna leh chak lohna tinrêng tidam thei tûrin thiltihtheihna a pe a.

²Tirhkoh Sâwmpahnihte hming chu hêng hi a ni: A hmasa berah Simona, Petera an tih leh a unau Andria te, Zebedaia fa Jakoba leh a unau Johana te, Filipa leh Bartholomaia te,

³Thoma leh chhiahkhawntu Mathaia te, Alfaia fa Jakoba leh Thadaia te,

⁴Kanan mi Simona leh a mantîrtu Juda Iskariota te an ni.

⁵Chûng Sâwmpahnihte chu Isuan a tîr chhuak a, thu a pe a, “Jentail-te chu tlawh suh ula, Samari mite khaw engah mah kal hek suh u;

⁶berâm bo, Israel hnam hnênah chuan kal zâwk rawh u.

⁷In zinnaah, “Vânram chu a lo hnai ta,” tiin hril zêl ang che u.

⁸Damlote tidamin mitthite kaitho ula, phârte tithianghlimin ramhuaite hnawt chhuak ang che u. A thlâwnin in hmu a, a thlâwnin pe ang che u.

⁹In kâwnghrênah rangkachak emaw, tangka emaw, dâr tangka emaw pai suh ula,

¹⁰zin kawng atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu ei tûr hmu tlâk a ni si a.

¹¹“Khaw lianah emaw, khaw tê-ah emaw, in luhna apiangah, thlenna âwm, mi zawng chhuak ula, in chhuah leh hma chu chutah chuan thleng reng ang che u.

¹²Ina in luhin chibai bûk ang che u.

¹³Chu ina mite chu chibai bûk tlâk an nih chuan in thlamuanna thu chu an chungah thleng rawh se; an tlâk loh erawh chuan in thlamuanna thu chu in chungah lo kîr leh rawh se.

¹⁴Mi tu pawhin an lo lawm loh che ua, in thu pawh an ngaihthlâk loh chuan, chu in ata emaw, chu khua ata emaw in chhuah hunin in kea vaivut chu thing thla ang che u.

¹⁵Thu dik ka hrilh a che u, rorêl ni-ah chuan chu khaw tuar tûr ai chuan Sodom leh Gomora ram tuar tûr chu a ziaawm zâwk ang.

¹⁶“Ngai teh u, chinghne zînga berâm lût angin ka tirh che u hi; chuvângin, rûl anga finga, ṭhuro anga pawi khawih lovin awm ang che u.

¹⁷Amaherawhchu, mite lakah fîmkhur rawh u; Sanhedrin-ah an thlen ang che u a, an Sunagog-ahte an vua ang che u.

¹⁸Keimah avângin hotute leh lalte hmaah, anni leh Jentail-ten ka thu an hriat theih nân an la thlen ang che u.

¹⁹Nimahsela, chutia an thlen hunah che u chuan in sawi tûr leh in sawi dân tûr engto suh ang che u; in sawi tûr chu a hun takah chuan hriattîr in ni dâwn si a.

²⁰A sawitu chu nangni in ni dâwn si lo va, nangmahnia awm Pa thlarauvin a sawi zâwk dâwn a ni.

²¹“Tin, unaupa in a unaupa tihhlum tûrin a mantîr ang a, pa pawhin a fa a mantîr ang; fate pawhin an nu leh pate an do vang a, an tihlum ang.

²²Ka hming avângin mi zawng zawngin an hua ang che u; a tâwp thlenga tuar peih apiang erawh chu chhandam an ni ang.

²³“He khuaah hian an tihduhdah hunah che u chuan khaw dangah tlân ang che u; thu dik ka hrilh a che u, Mihring Fapa a lo kal hmain Israel khuate in fang chhuak hman lo vang.

²⁴“Zirlai chu a zirtîrtu chungah a awm lo va, bawih pawh a pu chungah a awm hek lo.

²⁵Zirlai chu a zirtîrtu anga a awm leh, bawih chu a pu anga a awm chuan an tân a tâwk a ni. In neitupa mah Belzebula an tih chuan, a chhûngte chu an va ti lehzual dâwn êm!

²⁶“Chutichuan, anni chu hlau suh u; lang leh lo tûra thuhrûk eng mah a awm lo, hriat loh tûra zêp pawh eng mah a awm hek lo.

²⁷Thima ka hrilh che u hi, êngah sawi ula, a rûka in hriat hi in chunga chuangin tlângaupui ang che u.

²⁸Taksa tihluma thlarau tihlum thei lote chu hlau suh u; hremhmuna thlarau leh taksa tiboral theitu erawh chu hlau rawh u.

²⁹Chawngzawng pahnih pawisa pakhatah an hralh ṭhîn lo vem ni? Nimahsela, an zînga pakhat mah in Pa hriat lohvin leiah an tla lo vang.

³⁰In samzaite lam pawh hi chhiar vek a ni asin.

³¹Chuvângin, hlau suh u, chawngzawng tam tak aiin in hlu zâwk e.

³²“Chutichuan, mite hmaa mi ṭan apiang kei pawhin ka Pa vâna mi hmaah ka ṭan ve ang.

³³Tu pawh mite hmaa mi phat erawh chu, kei pawhin ka Pa vâna mi hmaah ka phat ve ang.

³⁴“Leiah hian rem lêntîr tûra lo kal ka nih ring suh u, rem lêntîr tûra lo kal ka ni lo va, khandaih lêntîr tûra lo kal ka ni zâwk e.

³⁵Fapa a pa dotîr tûr te, fanu a nu dotîr tûr te, mo a pasala nu dotîr tûr tea lo kal ka ni asin.

³⁶Mahni hmêlma tûr chu mahni chhûngkaw zînga mi ngei an ni ang.

³⁷Mahni nu emaw, pa emaw, fapa emaw keimah aia hmangaih zâwktu chu ka mi ni tlâk a ni lo.

³⁸Mahni kraws pua mi zui lo chu tu mah ka mi ni tlâk an ni lo.

³⁹Tu pawhin mahni nun humhim an tum chuan an chân ang a, keimah avânga an nun chân chuan an hmu ang.

⁴⁰“Tu pawh lâwm che u chu kei mi lâwm an ni; tu pawh mi lâwm chu mi tîrtu lâwm an ni.

⁴¹Zâwlnei chu zâwlnei a nih avânga lâwm apiang chuan zâwlnei lâwmman an hmu ang; mi fel chu mi fel a nih avânga lâwm apiang chuan mi fel lâwmman an hmu ang.

⁴²Thu dik ka hrilh a che u, hêng mi tê zînga pakhat pawh hi, zirtîr an nih avânga tui vâwt no khat pawh petu tu man an lâwmman tûr an chân tawp lo vang,” a ti a.