Read Mizo Lushai CHANCHIN ṬHA MATTHAIA ZIAK 11 Bible Online

CHANCHIN ṬHA MATTHAIA ZIAK 11 - Mizo Lushai bible

CHANCHIN ṬHA MATTHAIA ZIAK 11

¹Isuan zirtîr Sâwmpahnihte chu thu a pêk zawhin chuta ṭang chuan Galili ram khuaahte zirtîr tûr leh thu hril tûrin a kal ta a.

²Tin, tân ina awm Johana chuan, Krista thiltihte chu a lo hriatin,

³“Lo kal tûra chu i ni nge mi dang kan lo nghâk ang?” tia zâwt tûrin a zirtîrte Isua hnênah a tîr a.

⁴Isuan anni chu a chhâng a, “Kal leh ta ula, in thil hmuh leh in thil hriatte hi Johana va hrilh rawh u.

⁵Mitdelte an mit a vâr a, kebaite keiin an kal a, phârte tihthianghlimin an awm a, bengngawngten an lo hre thei ta a, mitthite kaihthawh an ni a, pachhiate hnênah pawh Chanchin Ṭha hrilh a ni ta bawk.

⁶Tu pawh ka laka beidawng lo chu an nihlawh e,” a ti a.

⁷Chu mite chu an kal tâk veleh, Isuan mipuite hnênah Johana thu a sawi ta a, “Eng ennawm en tûrin nge thlalêrah in kal? Thli chhêm nghîn luang maw?

⁸A nih loh leh, eng vânga kal nge in nih? Puan nêm sina inchei en tûrin em ni? Ngai teh u, puan nêm sinte chu lal inahte asin an awm.

⁹Eng vânga kal nge in nih? Zâwlnei en tûrin maw? A nih ngei kha, ka hrilh a che u, ani chu zâwlnei ai pawha ropui zâwk a ni: he mi hi alâwm,

¹⁰‘Ngai teh, ka tirhkoh i hmaah ka tîr a, Ani chuan i hmaah i kawng a buatsaih ang,’ tia a chanchin an ziaka kha.

¹¹Thu dik ka hrilh a che u, hmeichhe hrin zîngah Baptistu Johana aia ropui zâwk an la chhuak ngai lo; amaherawhchu, vânrama mi tê ber pawh ani ai chuan an ropui zâwk a ni.

¹²Baptistu Johana lo awm aṭanga tûn thlengin vânram chu an bawh huai huai a, a bei vakte chu an lût ṭhîn.

¹³Johana lo awm thlenga Dân thu leh zâwlnei zawng zawngten an sawi lâwk kha,

¹⁴in pawm duh a nih chuan ani hi Elija, lo kal tûra chu a ni.

¹⁵Ngaihthlâkna beng nei chuan ngaithla ngun rawh se.

¹⁶“Amaherawhchu, tûnlai mite hi eng nên nge ka tehkhin ang? Naupang, dâwrpui hmunahte ṭhu-a, an ṭhiante auva,

¹⁷‘Phênglâwng kan tumsak che u a, in lâm lo va, Kan ṭap vak a, in ṭap chuang bawk si lo,’ tite ang hi an ni.

¹⁸“Johana chu a lo kal a, a eiin a in lo va, ‘Ramhuai a zâwl a nih hi,’ an ti a.

¹⁹Mihring Fapa hi a lo kal a, a eiin a in a, ‘En teh u, mi vir, uain heh mi, chhiahkhawntute leh mi sualte ṭhian saw,’ an ti leh si a. Pathian finzia chu a thiltihah a lang a ni,” a ti a.

²⁰An sim loh avângin thil mak a tih tamna ber khuate chu a hau ta a.

²¹“Nang, Korazin, i chung a pik e; nang, Bethsaida, i chung a pik e; in zînga thil mak tihte kha Tura leh Sidona tih ni se, saiip sina vut inphulin an sim tih an tilang daih tawh ang.

²²Nimahsela, ka hrilh a che u, rorêl ni-ah chuan in tuar tûr aiin Tura leh Sidon tuar tûr chu a ziaawm zâwk ang.

²³Nang pawh, Kapernaum, vân thlenga chawi sân i ni dâwn em ni? Mitthi khaw thlenga nam thlâk asin i nih dâwn? Nangmaha thil mak tihte kha Sodom khuaa tih ni sela chu tûn thlengin a la awm reng tûr.

²⁴Nimahsela, ka hrilh a che u; rorêl ni-ah chuan in tuar tûr ai chuan Sodom khaw tuar tûr chu a ziaawm zâwk ang,” a ti a.

²⁵Chumi lai chuan Isuan heti hian a ti a: “Aw, ka Pa, lei leh vân Lalpa, nangin mi fing leh mi thiamte lakah hêng thu hi i thup a, mi mâwlte hnêna i puan avângin ka fak a che.

²⁶A ni, ka Pa, chutiang chu ṭha i tih zâwng tak a ni.

²⁷Ka pain engkim mi kawltîr tawh; Pa chauh lo chuan tu man Fapa hi an hre lo; Pa pawh chu Fapa leh an hnêna Fapain a puan duhnate chauh lo chuan tu man an hre lo.

²⁸“Nangni thawk rim leh phurrit phur zawng zawngte u, ka hnênah lo kal ula, keiman ka lo chawlhtîr ang che u.

²⁹Ka nghâwngkawl bât ula, ka hnênah zir rawh u; thuhnuairawlh tak leh rilru inngaitlâwm tak ka ni si a; tichuan, in thlarau tân chawlhna in hmu ang.

³⁰Ka nghâwngkawl chu a nuam a, ka phur pawh a zâng a ni,” tiin.