Read Mizo Lushai CHANCHIN ṬHA MATTHAIA ZIAK 13 Bible Online

CHANCHIN ṬHA MATTHAIA ZIAK 13 - Mizo Lushai bible

CHANCHIN ṬHA MATTHAIA ZIAK 13

¹Chumi ni chuan Isua chu in ata a chhuak a, dîl kamah a ṭhu a.

²A hnênah mipui nasa tak an lo pung khâwm a; tichuan, lawngah a chuang a, a ṭhu a; mipui zawng zawng chu ṭiauphovah an ding a.

³Thu tam tak an hnênah tehkhin thuin a sawi a: “Ngai teh u, buh chi thehtu buh chi theh tûrin a feh a.

⁴A han theh chuan a ṭhen kawngah a tla a, savaten an rawn tlân zo ta mai a.

⁵A ṭhen pialtlêp chung lei pan hmunah a tla a, lei a chhah lo va, a lo ṭo thuai a;

⁶nimahsela, ni a lo tlângsâng deuh va, a em vuai a, zung a kaih theih loh avângin a râwp ta mai a.

⁷A ṭhen hnimhlîngnei zîngah a tla a, hnim chu a lo ṭhang a, a dîp ral ta a.

⁸Ṭhenkhat chu lei ṭhaah a tla a, ṭhenkhat a lêt za te, ṭhenkhat a lêt sawmruk te, ṭhenkhat a lêt sawmthum tein a lo rah ta a.

⁹Ngaihthlâkna beng nei chuan ngaithla ngun rawh se,” a ti a.

¹⁰Zirtîrte chu an lo kal a, a hnênah, “Engati nge an hnênah tehkhin thuin i sawi?” an ti a.

¹¹Ani chuan a chhâng a, “Vânram thu ril chu nangni hriat atân tih a ni a, an hriat atân tih a ni ve lo.

¹²Tu pawh a nei chu an pêk belhchhah ang a, a ngah lehzual ang; a nei lo chu a neih chhun pawh an lâksak ang.

¹³Chutih avâng chuan an hnênah tehkhin thuin ka sawi a ni; hmu reng chunga an hmuh ṭhin lohva, ngaithla reng chunga an hriat ṭhin lohva, an hriatthiam hek loh nân.

¹⁴Isaia hrilhlâwkna thu kha an chungah a lo thleng a nih hi: ‘In ngaithla in ngaithla ang a, a ngaihna in hre si lo vang. In hmu in hmu ang a, in hmu fuh si lo vang.

¹⁵He mite thinlung hi a lo chawlawl ta a. An bengte an chhu chhêt a, an maimitchhîng bawk a, Chuti ni lo se, an mitin an hmu ang a. An bengin an hria ang a, An thinlungin an hre bawk ang a, an hawi kîr leh ang a, Anmahni ka lo tidam tûr,’ a tih ang khân.

¹⁶“Nangni mit erawh chu a vânnei e, a hmuh ṭhin avângin; in beng pawh a vânnei e, a hriat ṭhin avângin,

¹⁷thu dik ka hrilh a che u zâwlneite leh mi fel tam tak pawhin in thil hmuhte hi hmuh an lo châk ṭhîn a, an hmu si lo; in thil hriatte pawh hi hriat an lo châk ṭhîn a, an hre si lo.

¹⁸“Chutichuan, buh chi theh tehkhin thu awmzia chu ngaithla rawh u;

¹⁹tu pawhin Pathian ram thu chu an ngaihthlâka, an hriatthiam si loh chuan mi sual chu a lo kal a, an thinlunga theh sa chu a chhuhsak ṭhîn. Chûng mi te chu kawnga tlate chu an ni.

²⁰Tin, pialtlêp hmuna tla chu, thu chu ngaithlaa, lâwm taka pawm nghâltu hi a ni;

²¹mahse, zung a nei lo va, rei lo tê chauh a daih a; thu avânga hrehawmna emaw, tihduhdahna emaw a lo awm veleh a tlu nghâl ṭhîn.

²²Hnimhlîngnei zînga tla chu thu chu a ngaithla a; nimahsela, khawvêl lungkhamna leh hausak nawmchenna chuan thu chu a dîp a, rah lovin a awm ṭhîn.

²³Lei ṭhaa tla chu, thu chu ngaithlaa hrethiam hi a ni; chumi chu a rah ta ngei a, ṭhenkhat a lêt za te, ṭhenkhat a lêt sawmruk te, ṭhenkhat a lêt sawmthumtein a pung ṭhîn,” a ti a.

²⁴Tehkhin thu dang an hnênah a sawi leh a; “Vânram chu, mi, a lova chi ṭha thehtu nên chuan tehkhin theih a ni.

²⁵Zânah mi an muthilh vek hlânin, a hmêlma a lo kal a, buh zîngah chuan buh lem a theh a, a kal bo leh ta a.

²⁶Buh chu a lo ṭo va, a vuih hun chuan buh lem chu a lo lang ta a.

²⁷In neitu bawihte chu an lo kal a, ‘Ka pu, i lovah chi ṭha i theh lo vem ni? Buh lem saw khawi ata lo awm nge ni le?’ an ti a.

²⁸Ani chuan, ‘Hmêlmain a lo theh a nih chu,’ a ti a. Bawihte chuan a hnênah, ‘A nih leh, chûng chu va lâwr khâwm mai ila rem i ti em?’ an ti a.

²⁹Ani erawh chuan a chhâng a, ‘Ti lo ve, buh lem in lâwr khâwm zâwngin buh chu in pawt tel hlauh dah ang e.

³⁰Buh seng thlengin ṭo za rawh se; buh seng hunah buh sengtute hnênah, ‘Buh lem chu lâwr khâwm hmasa zet ula, hâl tûrin têl rawh u; buh erawh chu ka buh inah seng lût rawh u,’ ka ti ang e,’” a ti a.

³¹Tehkhin thu dang a sawi leh a; “Vânram chu anṭam chi fang khat miin a lâka, a lova a theh ang hi a ni.

³²Chi azawnga tê ber a ni a; mahse, a lo ṭhan sân chuan thlai dangte ai chuan a lo lian a, thing a lo ni a; chutichuan, chunglêng savate an lo kal a, a zârahte an riak ṭhîn,” a ti a.

³³Tehkhin thu dang a sawi leh a: “Vânram chu hmeichhiain dawidim a lâka, chhangphut kho thum khat, zîngah a vaia a fan chhuah vek tûra a phul ang chu a ni,” a ti a.

³⁴Chûng zawng zawng chu Isuan tehkhin thu hmangin mipuite hnênah a sawi a, tehkhin thu lovin an hnênah eng mah a sawi lo; zâwlnei hmanga sawi kha a lo thlen theihna tûrin:

³⁵“Tehkhin thuin ka kâ ka âng ang a, Leilung pian tirh ata thil inthup chu ka sawi chhuak ang,” tih hi.

³⁶Mipuite chu a kalsan a, inah chuan a lût a, a zirtîrte a hnênah an lo kal a, “Lova buh lem tehkhin thu kha min hrilh fiah teh,” an ti a.

³⁷Ani chuan a chhâng a, “Chi ṭha thehtu chu Mihring Fapa hi a ni a, lo chu khawvêl hi a ni.

³⁸Chi ṭha chu Ram fate an ni a, buh lem erawh chu mi sual fate an ni; hmêlma, buh lem thehtu chu Diabola a ni.

³⁹Buh seng chu khawvêl tâwp hun tûr a ni a, a sengtute chu vântirhkohte an ni.

⁴⁰Tichuan, buh lemte chu an la khâwm a, meia an hâl ang hian khawvêl tâwpah chuan a la awm ang.

⁴¹Mihring Fapa hian vântirhkohte a tîr chhuak ang a, a ram ata mi titlu thei zawng zawng leh thil sual titu zawng zawng an thiar chhuak ang a,

⁴²rawhtuina meiah an paih ang; chutah chuan an ṭap ang a, ha an ṭhial ang.

⁴³Chumi hunah chuan mi felte chu an Pa ramah chuan ni angin an êng tawh ang. Ngaihthlâkna beng nei chuan ngaithla ngun rawh se.

⁴⁴“Vânram chu lova ro phûm rûk ang a ni; chu chu miin a hmu a, a chhilh leh a, lâwm êm êmin a kal a, a neih zawng zawng a va hralh a, lo chu a lei ta a.

⁴⁵“Vânram chu sumdâwng mi, tuikeplung ṭha tak zawngtu ang chu a ni leh a;

⁴⁶ani chuan tuikeplung hlu tak pakhat a hmu a, a neih zawng zawng a va hralh a, a lei ta a.

⁴⁷“Vânram chu lênkhang, tuipuia zâr, sangha chi tinrêng fûn khâwmna ang chu a ni bawk.

⁴⁸Chu chu a khah veleh vaukamah an hnûk chhuak a, an ṭhu a, a ṭha zawng bâwmah an dah khâwm a, a chhia erawh chu an paih a.

⁴⁹Khawvêl tâwpah chutiang bawkin a la awm ang. Vântirhkohte an lo chhuk ang a, mi fel zîng ata mi sualte chu an hlîr ang a,

⁵⁰rawhtuina meiah chuan an paih ang; chutah chuan an ṭap ang a, ha an ṭhial ang.

⁵¹“Chûng zawng zawng chu in hrethiam em?” a ti a. Anni chuan “Hrethiam e,” an ti a.

⁵²Ani chuan an hnênah, “Chuvângin, Dân zirtîrtu, vânram thu zir tawh apiang chu, in neitu, a robâwm ata thil hlui leh thil thar phawrh chhuaktu ang hi a ni,” a ti a.

⁵³Isuan chûng tehkhin thu chu a sawi zawhin chuta ṭang chuan a kal ta a.

⁵⁴An khua chu a lo thleng a, an sunagog-ah chuan anmahni a zirtîr a; tichuan, mak an ti hle a, “He mi hian he finna leh hêng thil mak tihtheihna hi khawi ata nge a hmuh?

⁵⁵He mi hi mistiri fapa kha a ni lo vem ni? A nu pawh Mari an tih kha a ni lo vem ni? A unaute pawh Jakoba te, Josefa te, Simona te, Juda te kha an ni lo vem ni? A farnute pawh kan zîngah an awm vek lo vem ni?

⁵⁶Hêng zawng zawng hi khawi aṭanga a hriat nge?” an ti a.

⁵⁷Amah chu an hmu thiam ta lo va. Isuan an hnênah, “Zâwlnei chu ama khaw lamah leh a chhûngte zîngah lo chuan an chawimawi ṭhîn,” a tihsan a.

⁵⁸An rin loh avângin chutah chuan thil mak a ti tam lo.