Read Mizo Lushai CHANCHIN ṬHA MATTHAIA ZIAK 14 Bible Online

CHANCHIN ṬHA MATTHAIA ZIAK 14 - Mizo Lushai bible

CHANCHIN ṬHA MATTHAIA ZIAK 14

¹Chumi lai vêl chuan lal Heroda chuan Isua chanchin a lo hria a,

²a chhiahhlawhte hnênah, “Chu mi chu Baptistu Johana kha a nih chu; mitthi zîng ata a tho leh ta zuk nia; chuvângin, chûng thiltihtheihna chuan amahah a thawk a nih chu,” a ti a.

³Heroda chuan a unaupa Filipa nupui Herodi avângin Johana chu a man a, a phuar a, tân inah a lo khung reng tawh a;

⁴Johanan a hnênah “Ani i neih hi a thiang lo ve,” a tihsak avâng khân.

⁵Ani chu tihhlum a duh a, zâwlneia an ruat avângin mipui a hlau si a.

⁶Amaherawhchu, Heroda pian champhaphâk ni-ah Herodi fanu chu a laiah a lâm a, Heroda chu a tilâwm ta a.

⁷Chuvâng chuan a dîl apiang pêk a tiam ta a.

⁸Ani chuan, a nu fuih angin, “Thlêngah tûnah Baptistu Johana lu mi pe rawh,” a ti a.

⁹Lal chuan pawi a ti hle a; mahse, a thutiam avâng leh a chaw kîlpuite avâng chuan pêk tûr thu a pe ta a.

¹⁰Tichuan, mi a tîr a, tân ina awm Johana lu chu a tantîr a.

¹¹A lu chu thlêngin an rawn la a, nula chu an pe a, ani chuan a nu hnênah a kalpui ta a.

¹²Tin, Johana zirtîrte chuan a ruang chu an va hlâwm a, an phûm a; Isua pawh an rawn hrilh a.

¹³Isuan a lo hriatin chuta ta chu lawngin hmun thlalêr lam panin a kal hrang ta a. Mipuiten an hriatin khua aṭangte chuan kea kalin an zui a.

¹⁴Lawng ata vaukama a chhuah chuan mipui nasa tak a hmu a, a khawngaih ta êm êm a, damlo an rawn hruaite chu a tihdamsak a.

¹⁵Tlai lam a lo nihin, zirtîrte chu a hnênah an lo kal a, “Hei hi hmun thlalêr a ni a, khua a tlai ta hle si a, khuaahte kalin an ei tûr an dap theih nân mipui hi kaltîr ta che,” an ti a.

¹⁶Isua erawh chuan, “An kal a ngai lo ve, nangmahnin ei tûr pe rawh u,” a ti a.

¹⁷Anni chuan, “Hetah hian chhang panga leh sangha pahnih chauh lo chu eng mah dang kan nei lo,” an ti a.

¹⁸Ani chuan, “Ka hnênah han la teh u,” a ti a.

¹⁹Hlobet chunga ṭhu tûrin mipui chu thu a pe a, chhang panga leh sangha pahnih chu a la a, vân lam enin mal a sâwm a, a phel a, chhang chu zirtîrte a pe a, zirtîrte chuan mipuite chu an pe a.

²⁰An za chuan an ei a, an tlai ta a. An sem bâng chu an la khâwm a, bâwm sâwm leh pahnih khat a ni.

²¹A eitute chu hmeichhia leh naupang tiam lovin patling hlîr pawh sângnga lai an ni.

²²Mipui chu a ṭîntîr vêl chhûngin râl lehlama lo va kai hmasa tûrin zirtîrte chu lawngah a chuan luihtîr a.

²³Mipui a ṭîntîr hnu chuan ṭawngṭai tûrin tlângah a kal hrang a; tin, khua a lo thimin chutah chuan amah chauhvin a awm ta a.

²⁴Lawng erawh chu dîlah, vaukam aṭanga hla takah a awm tawh a, thliin a ni lo zâwngin a nem a, tuifâwnin a vawrh a vawrh a.

²⁵Khawfîng chah dâwn laiin dîl chungah an lam panin a lo kal a.

²⁶Zirtîrten dîl chunga a kal an han hmuh chuan, “Hmuithla a nih saw,” tiin an thlaphâng a, hlauvin an au ta chûl a.

²⁷Mahse, Isuan anni chu a be thuai a, “Thlamuang takin awm rawh u, keimah ka ni e, hlau suh u,” a ti a.

²⁸Petera chuan a chhâng a, “Lalpa, nang i nih chuan tui chunga i hnêna kal thu mi pe rawh,” a ti a.

²⁹Ani chuan, “Lo kal ta che,” a ti a. Petera chu lawng ata a chhuak a, Isua lam panin tui chungah chuan kein a kal a.

³⁰Nimahsela, thli tleh chu a hmuhin a hlau va, a pil dâwn a, “Lalpa, mi chhanhim rawh,” tiin a au ta a.

³¹Isuan a ban ta nghâl a, amah chu a va chelh a, a hnênah, “Nang rin tlêm, engah nge i rinhlelh le?” a ti a.

³²Lawnga an luh chuan thli chu a bâng ta mai a.

³³Lawnga awmte chuan, “Pathian Fapa a lo nih takzet hi,” tiin, amah chu kûnin chibai an bûk a.

³⁴Dîl an kân a, Genesaret ramah chuan an kai a.

³⁵Chumi hmuna mite chuan ani chu an lo hria a, an kiang vêl ram zawng zawngah chuan mi an tîr a, damlo zawng zawng a hnênah an rawn hruai a;

³⁶a puan fêm tal deh an ngên chiam a; tin, a dek apiang chu an dam ta zêl a.